साल्न्हाका चात्या 19 - धिमालपावल एफिससता 1 अपोल्लोस कोरिन्थता हिलाउ पावल लिअ्ता माउजागेलाइ जेङतेङ एफिससता लोहि। इन्ता वा आधे चात्यागेलाइहेङ दुसुहि। 2 वा ओबालाइहेङ हिअ्हि, “हाइ नेलाइ प्रभुता खान्धुर पातेङ पुनित हाङसा निङसुन्हा?” ओबालाइ वासेहेङ दोअ्हि, “पुनित हाङसा हि दोअ्का ते केलाइ हिङका बुङ मान्थुन्हाहि।” 3 आरोङ पावल हिअ्हि, “एन्सानु नेलाइ हिसिका चिभुअ्लि र्हुसुन्हा?” ओबालाइ दोअ्हि, “युहन्नाको चिभुअ्लि निङन्हाहि।” 4 कोलाउ पावल दोअ्हि, “युहन्नाको पिका चिभुअ्लिचाहिँ कुकरमसो घुरिका चिभुअ्लि हिघाहि। वान्हुअ्सो लोका द्याङ इसुहेङ खान्धुर पासु दोअ्तेङ वा द्याङगेलाइहेङ दोअ्घाखे।” 5 इदोइ काथा हिङकान्हुअ्सो ओबालाइ प्रभु इसुको मिङता चिभुअ्लि र्हुहि। 6 जेलाउ पावल ओबालाइर्हुता खुर ताअ्हि, कोलाउ पुनित हाङसा ओबालाइर्हुता लोहि रो ओबालाइ भेनेङ राउता धुइहि रो आगाधुइका धुइलि तेङहि। 7 ओबालाइ जाम्मा तेन्हेमि झोको हिघाखे। 8 पावल कचहरिसाअ्ता हानेहि रो सुम माहिनाथिकापा परमेस्वरको सारभिको बारेता एम्बालाइदोफा माथिसिङ बहस पाहि रो द्याङगेलाइहेङ गेपाहि। 9 कुलाउ हेअ्मि मन थाङपातेङ प्रभुता खान्धुर मापाहि। उल्टाङ एम्बालाइ प्रभुको पिका मुक्तिको दामाहेङ झाराङको आगाता हेला पाहि। कोलाउ पावल कचहरिसाअ् लाअ्तेङ खान्धुरगेलाइहेङ दोसाङ चुम्पुतेङ टुरान्नसको स्कुलता बहस पालि तेङहि। 10 न्हे बाअ्सार एसाङ पाङ दोहि। कालाउ इङकोन्हुअ्सो खिनिङ एसिया माउजाता हिका यहुदि रो ग्रिक जात्याको द्याङगेलाइ न्हेमिङ प्रभुको कथन हिङहि। 11 परमेस्वर पावलको खुरसो नावा भारभुसाइका कामगेलाइ पाहि। 12 हाइपानु गाम्छा माकुनु नोसोइ वाको जिउता धेलपातेङ मासाअ्धेकालाइकोता चुमपुघाखे, कालाउ एम्बालाइको जिउसो रोगाइका हानेघाखे रो मासान बुङ ओल्हेघाखे। 13 कुलाउ इसोओसो घुराइगिल्का यहुदि ओझागेलाइ मासान खोअ्कालाइहेङ प्रभु इसुको मिङ ल्होपितेङ एसा दोअ्घाखे, “पावलको पारचार पाका इसुको मिङता का नासेहेङ ओल्हेलि हुकुम पिखा।” 14 इन्ता एमि स्केबास मिङ हिका यहुदि मुल धामिको न्हिअ्मि चानगेलाइ इसिका पाघाखे। 15 कोलाउ मासान उतर पितेङ एम्बालाइहेङ दोअ्हि, “इसुहेङ का नाल्खा, पावलहेङ बुङ का नाल्खा, कुलाउ नेलाइचाहिँ हासु एइ?” 16 कालाउ इङको मासान खोअ्का द्याङ एम्बालाइर्हुता तोङतेङ लोहि। एम्बालाइ झाराङहेङ बसता ताअ्तेङ एम्बालाइहेङ लोङपाहि रो एम्बालाइ इङको साअ्सो नाङघाङ घाइते जेङतेङ खाअ्हि। 17 इदोइ काथा एफिससता हिका यहुदि रो बोजात्याको द्याङगेलाइ हिङतेङ झाराङ थिहि। एम्बालाइ प्रभु इसुको मिङहेङ हेन्जाङ मानपाहि। 18 हेन्जाङ खान्धुर पाकालाइ इन्ता लोतेङ ताइको पाका मारेम्का कामगेलाइ द्याङगेलाइको आगाता कबोल पाहि। 19 हेन्जाङ खान्धुर पाकालाइ जाइ जादु पाघाखे एम्बालाइ जादुको बारेता लेखेका किताबगेलाइ चुमातेङ झाराङको आगाता दुपिहि। दुका किताबगेलाइको दाम आनुमान पालाउ झान्डाइ न्हेकुरिते हाजार रुपाको टाकाको हिसाब जेङलि लोहि। 20 एसापा प्रभुको कथन चारबितिङ चारचाराइतेङ हानेहि। एफिसस पुरता हुल्दुङगा 21 इङकोन्हुअ्सो पावल माकेडोनिया रो अखैया माउजा जेङतेङ यरुसलेम हानेलि भोहि। वा दोअ्हि, “यरुसलेम हानिकान्हुअ्सो का रोम पुर बुङ हानेलिङ गोयाङ।” 22 इङकोन्हुअ्सो वा ताइमिहेङ साघाइका सानाइतिगेलाइ तिमोथि रो इरास्तसहेङ माकेडोनियाभारि दिङगिल्हि, कालाउ वा ताइमिचाहिँ आसा दिनाथिकापा एसिया माउजाता दोङ हि। 23 इङको पहरता प्रभुको मुक्तिको दामाको पारचार जेङका हिनाङसिङ एफिसिसता बाराका खाइलाबाइला जेङहि। 24 हाइदोनु डेमेत्रियस मिङ हिका एमि आर्तेमिस देबिको रुपाको म्हुम्हुइका थानगेलाइ बान्हाइघाखे। इदोइ काम पातेङ वा रो वाको ताअ्का कामपाकालाइ सुदाङ हेन्जाङ टाका कामाइघाखे। 25 कालाउ डेमेत्रियस वाको कामपाकालाइ रो एम्बालाइभाइकाङ काम पाकालाइ झाराङहेङ जोम्पातेङ दोअ्हि, “ओनेगेलाइ, इदोइ कामसोङ केलाइ हेन्जाङ टाका कामाइका हिनाहि दोअ्तेङ नेलाइ दोङ गेसुखेना। 26 कुलाउ इदोइ पावल हाइ दोअ्दोङखे, नेलाइ ताइमिङ तिङदोङ सुखेना रो हिङदोङ सुखेना। वा द्याङको खुरहोइ बान्हाइका दिरचाहिँ दिर दोङ माको दोअ्दोङखे। वा इता एफिसस रो एसिया माउजाता हिका हेन्जा झोको द्याङगेलाइहेङ ताइको काथा धिरपातेङ केउपालि दोअ्खोइ। 27 एसापा केलाइको कामको खिनिङ माको कालाउ बाराका देबि आर्तेमिसको थानको बुङ हेला ज्यावा कालाउ एसिया रो दुनियाभरिको द्याङगेलाइ मानितेङ लोका देबि आर्तेमिसको पुजा बुङ बन्द ज्यावा।” 28 इदोइ काथा हिङतेङ इन्ता जोम्तेङ हिका द्याङगेलाइ चेर ताम्पाहि रो एम्बालाइ र्हिकाइतेङ दोअ्लि तेङहि, “एफिससता हिका देबि आर्तेमिसको जाइ ज्याको!” 29 इङको पुरता खाइलाबाइला जेङलि तेङहि। द्याङगेलाइ हुल धेउतेङ लोहि रो माकेडोनियासो लोका पावलको सानाइति गायस रो अरिस्तारखसहेङ रिम्तेङ घाकाथामेता चुमपुहि। 30 पावल द्याङगेलाइको चेसुमेसुकाता हानेलि भोहि, कालाउ बुङ प्रभुता खान्धुर पाका दादाओनेगेलाइ वासेहेङ इन्ता हानेलि मापिहि। 31 एसिया माउजाको आधेमि सारकारि हाकिमगेलाइ सुदाङ पावलको भालाइ चिताइतेङ वासेहेङ इङको घाकाथामेता देखाल मापि दोअ्तेङ मतो पिहि। 32 द्याङगेलाइको चेअ्सुता बाराका खाइलाबाइला जेङदोङ घाहि। आधेमि एथोक आधेमि भेनेङथोक दोअ्तेङ र्हिकाइघाहि। कालाउ हेन्जाङहेङ द्याङगेलाइ हाइपालि जोम्हि इङको बुङ गेका मान्थुघाहि। 33 एन्सालाउ यहुदिगेलाइ अलेक्जेन्डर दोअ्का द्याङहेङ आगा पाहि। चेअ्सुमेअ्सुकासो हेअ्मि र्हिकाइतेङ जेङका बारदातको बारेता वासेहेङ दोअ्लि लागाइहि। वा ताइको खुरको टिप्निहोइ झाराङहेङ सिपापा हिलि दोअ्तेङ ताइको काथा द्याङगेलाइता ताअ्हि। 34 कालाउ वासेहेङ यहुदि दोअ्तेङ नाल्कान्हुअ्सो इङको द्याङगेलाइ “एफिसिसता हिका देबि आर्तेमिसको जाइ ज्याको!” दोअ्तेङ न्हे घान्टाझोको र्हिकाइतेङहि। 35 इङकोन्हुअ्सो नगर कचहरिको सचिब द्याङगेलाइहेङ सिपापा हिलि दोअ्तेङ वा दोअ्हि, “एफिससको दादाओनेगेलाइ, एफिसिगेलाइको पुरचाहिँ बारा देबि आर्तेमिसको थान रो आदेलसो हुल्का वाको मुर्तिको काथा हासु मागेखे कुनु? 36 इदोइ काथा सत्ते हि, यासेहेङ हासु बुङ माको दोअ्लि माद्वावा। एन्सा जेङलाउ नेलाइ सिपापा हिसु। एसापा जोसता लोतेङ ठहर दोङ मापासिङ हिदिङ काम पालि रेम्का माको। 37 नेलाइको रिम्तेङ चुमाका द्याङगेलाइ ना केलाइको थान लुटिका हि ना एम्बालाइ केलाइको देबि आर्तेमिसको बारेता बादनामि पाका हि। 38 “यदि डेमेत्रियस रो वाको मुर्ति बान्हाइका सानाइतिगेलाइको खिलापता दुसिका काथा हिनु एम्बालाइ न्यायपाका थामेता हानितेङ उजुर पालि द्वावा। 39 आरोङ नेलाइ इङकोखान्तेङ बुङ हेन्जा हिदिङ काथा भोनु केलाइ कचहरि काइतेङ इङको काथाको बहस पापिलि द्वाङ। 40 नानि एसापा खाइलाबाइला जेङनाङसिङ केलाइर्हुताउत्पात माचाइका फतुर लोलि द्वाङ। इङको खाइलाबाइलाको फतुर केलाइता लोनु केलाइ हासुङ हाइदोङ दोअ्लि बुङ माद्वाङ।” 41 इदि दोअ्लिदोतेङ वा कचहरिहेङ दोपाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.