साल्न्हाका चात्या 18 - धिमालपावल कोरिन्थ पुरता हानेका 1 इङकोन्हुअ्सो पावल एथेन्ससो बिदा जेङतेङ कोरिन्थता हानेहि। 2 वा पोन्टसता हिका अकिलास मिङ हिका एमि यहुदिहेङ दुसुहि। वा ताइको बेअ् प्रिस्किलादोफा इटालियासो लोका हिघाखे, हाइपानु रोमि राजा क्लौडियस गोताङ यहुदिगेलाइहेङ रोमसो ओल्हेतेङहानेलि हुकुम पिका हिघाखे। पावल ओबालाइहेङ दुसुलि हानेहि। 3 एम्बालाइ पाल बान्हाइका काम पातेङ जिबिका चालाइघाखे। पावल एम्बालाइदोफाङ हितेङ काम पाहि। हाइपानु वा बुङ एम्बालाइभाइपाङ पाल बान्हाइका काम पातेङ जिबिका चालाइघाखे। 4 पावल माइसाका दिनाकिअ्पाङ कचहरिसाअ्ता यहुदि रो ग्रिकगेलाइदोफा बहस पातेङ ओबालाइहेङ मानेपालि भोघाखे। 5 जेलाउ सिलास रो तिमोथि माकेडोनियासो थुकालिलोहि, कोलाउ पावल पारचारको कामता लागितेङ हिलाउ यहुदिगेलाइहेङ इसु दोङ ख्रिस्ट हि दोअ्का दासि पिदोङघाखे। 6 कुलाउ जेलाउ ओबालाइ बिरोध पातेङ पावलको आपजस पालि तेङहि, कोलाउ वा ताइको धाबा थितेङ ओबालाइहेङ दोअ्हि, “नेलाइको हिति नेलाइकोङ कापालता पर्याको, कासेहेङ बादनामि माल्वाको। एला ओसो का पारचार पालि बोजात्यागेलाइकोता हानाङका।” 7 कोलाउ पावल इन्तासो परमेस्वरहेङ मानेका तितस युस्तस मिङ हिका एमि ग्रिक द्याङको साअ्ता हानेहि। वाको साअ् कचहरिसाअ्को भेर्पाङ हिघाहि। 8 कचहरिसाअ्को हाकिम क्रिस्पस रो वाको झाराङ खाल प्रभुहेङ खान्धुर पाहि रो कोरिन्थिगेलाइता बुङ हेन्जाङ पावलको कथन हिङतेङ प्रभुता खान्धुर पाहि रो चिभुअ्लि र्हुहि। 9 ए दिलिमा प्रभु पावलहेङ दरसन पितेङ दोअ्हि, “हासुदोफा बुङ माथि, सिपापा माहि, रेम्काबानाल हिङपातेङ हाने। 10 का नाङकोदोफा हिघा रो नासेहेङ हासुङ हाइदोङ पालि माद्वावा, हाइपानु इदोइ पुरता काङको हेन्जाङ द्याङगेलाइ हि।” 11 एसापा परमेस्वरको कथन धिरपातेङ पावल ए अ्बाअ्सार तु माहिनाथिकापा एम्बालाइदोफा हि। 12 जेलाउ गलियोन अखैयाको बाडाहाकिम जेङहि, कोलाउ यहुदिगेलाइ एमत जेङतेङ पावलहेङ रिम्हि रो वासेहेङ निया पाका थामेता चुमाहि 13 रो एसा दोअ्हि, “इदोइ द्याङ नियमको खिलाप परमेस्वरहेङ पुजिलि द्याङगेलाइहेङ धिरपादोङखे।” 14 जेलाउ पावल धुइलि तोमका हिघाहि, कोलाउ गलियोन इङको यहुदिगेलाइहेङ दोअ्हि, “यहुदिगेलाइ, इदोइ हिदिङ मारेम्का काम रो बारा आपाराधि काथा हिका हिनु का नेलाइको उजुर हिङतेङ निसाप पालि मुनासिप जेङधावा। 15 कुलाउ इदोइ काथा ते नेलाइकोङ धरम किताब, मिङ रो नियमको बारेता खिनिङ हिनाङसिङ नेलाइ ताइमिङ ठहर पासु। का इसिका काथागेलाइको निया मापाङका।” 16 एसा दोअ्तेङ गलियोन एम्बालाइहेङ नियापाकाथामेसो दिङगिल्पिहि। 17 कोलाउ यहुदिगेलाइ झाराङ कचहरिसाअ्को हाकिम सोस्थेनेसहेङ रिम्तेङ नियापाकाथामेको आगाता दान्हाइहि। कुलाउ गलियोन इङको काथाता हाइदोङ मातिङका भाइपिहि। पावल एन्टिओखियाता घुरिका 18 इङकोन्हुअ्सो पावल हेन्जाङ दिनाथिकापा कोरिन्थता हि। कालाउ खान्धुरि दादा ओनेगेलाइदोफा बिदा जेङतेङ वा चि जाहाजता सिरिया हानेहि। वाकोदोफा प्रिस्किला रो अकिलास बुङ हिघाखे। पावल भाकल पाका हिनाङसिङ वा किक्रियाता ताइको पुसिङ सिअ्पाहि। 19 एफिससता थुकाकान्हुअ्सो प्रिस्किला रो अकिलास एफिससताङ हि। पावलचाहिँ एलोङ कचहरिसाअ्ता दुल्तेङ यहुदिगेलाइदोफा बहस पालि तेङहि। 20 कोलाउ एम्बालाइ पावलहेङ आरोङ आधे दिना हिलि बिम्ति पालाउ, वा माकिअ्हि। 21 ओबालाइदोफा बिदा जेङलाउ वा दोअ्हि, “परमेस्वरको लाल्सा हिनु का आरोङ नेलाइकोता घुरितेङ ल्वाङका।” कोलाउ वा चि जाहाजता धोल्तेङ एफिसससो हानेहि। 22 जेलाउ वा कैसरियाता खुअ्हि कोलाउ र्हुता यरुसलेमता हानिहि रो इन्ताको मन्डलिगेलाइहेङ दुसुतेङ वा एन्टिओखियाभारि खुअ्हि। 23 वा इन्ता आधे दिनाथिकापा हितेङ इन्तासो गलातिया रो फ्रिगियाको माउजागेलाइ जेङतेङ झाराङ चात्यागेलाइहेङ आँट पितेङ भेनेङ भेनेङ थामेता हानेहि। अपोल्लोस एफिससता 24 इङकोङ माझाता अलेक्जेन्ड्रिया पुरता हिका अपोल्लोस मिङको एमि यहुदि एफिससता लोहि। वा एमि रेम्फा धुइका रो धरमकिताबता गेका हिघाखे। 25 वा प्रभु इसुको बारेता बिद्या निङका हिघाखे रो हङसता बोल्यातेङ इसुको बारेता काथागेलाइ मुनासिपसो धुइका रो धिरपा घाखे। कालाउ वा युहन्नाको चिभुअ्लि खिनिङ गिका हिघाखे। 26 वा कचहरिसाअ्ता माथिसिङ धुइलि तेङहि। कुलाउ अपोल्लोसको धुइका काथा हिङतेङ प्रिस्किला रो अकिलास वासेहेङ ताइको साअ्ता चुमपुहि। कालाउ ओबालाइ परमेस्वरको दामाको माने वासेहेङ रेम्फा गेपाहि। 27 इङकोन्हुअ्सो अपोल्लोस अखैया माउजाता हानेलि ठहर पाहि। एफिससता हिका प्रभुको चात्यागेलाइ वासेहेङ हानेलि आँट पितेङ वासेहेङ खाङसु दोअ्तेङ इन्ता हिका चात्यागेलाइहेङ एलोङ चिथि बुङ लेखेपिहि। अपोल्लोस अखैयाता थुकातेङ निगाहासो खान्धुर पाकालाइहेङ हेन्जाङ मदत पाहि। 28 हाइदोनु वा धरमकिताबको कथनसो इसु दोङ ख्रिस्ट हि दोअ्तेङ यहुदिगेलाइहेङ दासि पिहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.