साल्न्हाका चात्या 17 - धिमालपावल रो सिलास थेसोलोनिकेता 1 पावल रो सिलास अम्फिपोलिस पुरसो रो अपोल्लोनियाको दामा जेङतेङ थेसलोनिकेता लोहि। इन्ता यहुदिगेलाइको एलोङ कचहरिसाअ् हिघाहि। 2 दिनाङभाइपा पावल इङको कचहरिसाअ्ता हानेहि रो वा इन्ता सुम आथारथिकापा माइसाका दिनागेलाइता धरमकिताबसो बहस पातेङहि। 3 वा धरमकिताबसो दासि पितेङ एम्बालाइहेङ एसा गेपाहि, “ख्रिस्टहेङ तु: भोगेलि रो सिकासो सिन्हुलि गोइधाङ। इदोइ दोङ इसु, जाइको बारेता रेम्काबानाल का नेलाइहेङ हिङपाखा, वा दोङ ख्रिस्ट एइ।” 4 नेलाइता हेमि खान्धुर पातेङ पावल रो सिलासभारि लागेहि। एन्साङ पातेङ लागेकालाइता परमेस्वरको सेवा पाका हेन्जाङ ग्रिकगेलाइ रो हेमि मिङ चारचाराइका मुल बेबालाइ बुङ हिघाखे। 5 कुलाउ बो यहुदिगेलाइ चाहिँ रनथनि पातेङ हातेको फाटाहागेलाइहेङ जोम्पातेङ हुल ल्होपातेङ खाइलाबाइला पालि लागाइहि। कालाउ यासोनको साअ्ता दुल्तेङ पावल रो सिलासहेङ चुमातेङ द्याङगेलाइको आगाता जाअ्पालि भोहि। 6 एम्बालाइ दुसुलि मादोलाउ, ओबालाइ यासोन रो आधे दादा ओनेगेलाइहेङ पुरको हाकिमगेलाइकोता एसा दोअ्तेङ र्हिकाइतेङ हेरतेङ चुमाहि, “दुनियाहेङ उत्पात पाका इदोइ द्याङगेलाइ इता बुङ थुकालिलोका हि। 7 एबालाइ यासोनको बान्सालाइ जेङका हि। एम्बालाइ झाराङ इसु दोअ्का एमि भेनेङ राजा हि दोअ्तेङ कैसरको हुकुमको उल्टा काम पाखे।” 8 इदोइ काथा हिङतेङ द्याङगेलाइ रो पुरको हाकिमगेलाइ थिहि। 9 ओबालाइ यासोन रो वाको दोसा हिका द्याङगेलाइहेङ दस्तुर र्हुतेङ एम्बालाइहेङ लाअ्पिहि। पावल रो सिलास बेरियाता 10 जेलाउ बेल्हाहि कालाउ खान्धुरि दादाओनेगेलाइ पावल रो सिलासहेङ बेरिया दिङगिल्हि। जेलाउ एम्बालाइ इन्ता थुकाहि कोलाउ यहुदिगेलाइको कचहरिसाअ्ता हानेहि। 11 इताको यहुदिगेलाइ थेसलोनिकेगेलाइखान्तेङ हेन्जाङ रेम्का हिघाखे। हाइदोनु एबालाइ रेम्काबानाल मन पितेङ हिङहि रो लेङचातेङ कथन र्हुहि। इङको काथागेलाइ मुनासिप इन्सिकाङ जेङ ना माको दोअ्तेङ एम्बालाइ दिनाङ धरमकिताब पर्हितेङ जाच पाघाखे। 12 इदोइखातिर एबालाइता हेन्जाङ यहुदिगेलाइ प्रभुता खान्धुर पाहि। एन्साङ पातेङ मिङ चलिका ग्रिक बेबालाइ रो वाबालाइ सुदाङ खान्धुर पाहि। 13 कुलाउ जेलाउ परमेस्वरको वचन पावलसो बेरियाता बुङ पारचार जेङदोङखे दोअ्का थेसलोनिकेको यहुदिगेलाइ गेहि, कोलाउ ओबालाइ इन्ता बुङ जोम्का द्याङगेलाइहेङ तोल्हेलि रो उकलाइलि थुकालिलोहि। 14 इदोइ तिङतेङसाङ खान्धुरि दादा ओनेगेलाइ ओदोङघरि पावलहेङ जाहादिपाहा दिङगिल्पिहि। कालाउ सिलास रो तिमोथिचाहिँ इन्ता दोङ हि। 15 पावलहेङ सिरपुलि हानेकालाइ वासेहेङ एथेन्सथिकापा सिरपाहि। सिलास रो तिमोथिचाहिँ जेथे दोका मारफा वाकोता लोलिगोयाङ दोअ्का हुकुम निङतेङ एम्बालाइ घुरिहि। पावल एथेन्सता 16 पावल एम्बालाइहेङ एथेन्सता र्हुम्तेङहिलाउ, इङको पुरहेङ मुरति दोङ मुरतिहोइ पोङघाका तिङतेङ वाको मन हेन्जाङ तु:हि। 17 इदोङखातिर वा यहुदिगेलाइ रो परमेस्वरको सेवा पाका ग्रिकगेलाइदोफा कचहरिसाअ्ता रो दुसुका झोकोदोफा चाहिँ हातेता दिनाङ बहस पाघाखे। 18 इपिक्युरि रो स्तोइकि दरसिगेलाइता बुङ हेअ्मि पावलदोफा बहस पाहि। ओबालाइ हेअ्मि दोअ्हि, “या बेजेबेजेका हाइ दोअ्खे?” बोगेलाइ दोअ्हि, “बो हिदिङ भेनेङमुलुकको नावा देबि दिरगेलाइको पारचार पाकाभाइका तिङखे।” हाइपानु पावल इसुको बारेता रो वाको सिकासो सिन्हुका काथाको पारचार पाघाखे। 19 कोलाउ ओबालाइ पावलहेङ अरियोपागसता चुमपुहि रो हिअ्हि, “नाङको पारचार पाका इदोइ नावा बिद्या हाइ एइ, हाइ केलाइ गेलि द्वाङ? 20 हाइपानु ना केलाइको न्हातोङता नावा काथागेलाइ हिङपादोङखेना। इदोइखातिर इदोइ काथाको माने हाइ एइ इङको केलाइ गेलि भोन्हाखे।” 21 झाराङ एथेन्सताहिकालाइ रो इन्ता हिका भेनेङमुलुकसो लोकालाइ नावा नावा काथा दोअ्लि रो हिङलिबिना ताइको पहर बो हिदिङ काथाता मादोपाघाखे। 22 पावल अरियोपागस दोअ्का कचहरिको माझाता जाअ्तेङ दोअ्हि, “एथेन्सता हिकालाइ, नेलाइहेङ का गोताङ काथाता हेन्जा धरमाति तिङदोङखा। 23 हाइपानु घुराइतेङ हानेकाताङपालाउ नेलाइको पुजिका थामेगेलाइ बुङ तिङघा। का एलोङ इसिका भोक पिका थामे बुङ दुसुघा जाइता ‘मानाल्का दिरको भाअ्सिङ’ दोअ्तेङ खोपाइन्हाका हिघाहि। इदोइभाअ्सिङ जाइहेङ नेलाइ मागेसिङ पुजिसुखेना वासेहेङ का नेलाइको माझाता हुकुम पादोङखा। 24 “परमेस्वर, जाइ दुनिया रो इङकोता हिका गोताङ चिज सिरजाइहि, वा सादेल रो सुमिङको प्रभु हिका हिनाङसिङ खुरहोइ बान्हाइका थानता बासा माहिखे। 25 वासेहेङ हिदिङ चिजको जरुरि जेङनाङभाइपा पातेङ द्याङको खुरसो वाको सेवा जेङलिगोयाङ दोअ्तेङ माफोमपासु। हाइदोनु वा दोङ झाराङहेङ ज्यान, हुसि रो गोताङ चिज पिखे। 26 वा एमिसो गोताङ सुमिङता बासा हिलि द्याङको गोताङ जात्या सिरजाइहि। एम्बालाइहेङ हिलि गोइका थामे रो सिन्हुलि गोइका पहर बुङ तोकेपिहि। 27 द्याङगेलाइ परमेस्वरहेङ भोकाको रो भोलाउ निङलि द्वाको दोअ्तेङ वा एसा पाहि। एला बुङ वा केलाइसो दुरे हिकामान्थु 28 हाइदोनु ‘केलाइ वाता सिन्हुन्हाखे, वाता हिगिलन्हाखे रो वाताङ सिन्हुन्हाखे रो वाता केलाइको ज्यान हि।’ नेलाइको ताइकोङ कबिगेलाइ बुङ एसा दोअ्का हि, ‘केलाइ जातिङको वाकोङ खाल हिन्हाहि।’ 29 “एसापा केलाइ परमेस्वरको खाल जेङका हिनाङसिङ, परमेस्वरहेङ द्याङको आकिल रो खुरहोइ बान्हाइका सोना, रुपा रो उन्ठुइको मुरतिभाइका हि दोअ्तेङ फोमपालि माएल। 30 इदोइभाअ्सिङ लाम्फा मागेसिङ पाका मारेम्का कामहेङ परमेस्वर माफ पाहि। कुलाउ एला परमेस्वर गोताङ थामेता झाराङ द्याङगेलाइहेङ ‘ताताइको कुकरमहेङ मानितेङ लाअ्सु’ दोअ्का हुकुम पिहि। 31 हाइदोनु दुनियाको झाराङ द्याङगेलाइको न्याय पाका दिना वा तोकिपिलि दोकाहि रो इङको दिना वा ताइमिङ साल्का द्याङसो न्यायदोसा निसाफ पावा। वासेहेङ सिकासो सिन्हुपातेङ परमेस्वर झाराङ द्याङगेलाइहेङ याको दासि पिका हि।” 32 सिकासो द्याङ सिन्हुखे दोअ्का हिङतेङ आधेमि पावलहेङ लेङपिहि। कालाउ आधेमि दोअ्हि, “याको बारेता आरोङ भेनेङखेप बुङ केलाइ हिङलि भोन्हाखे।” 33 कालाउ पावल एम्बालाइसो बिदा जेङतेङ हान्हेहि। 34 आधेमि द्याङगेलाइ वाकोदोफा लागितेङ प्रभुहेङ खान्धुर पाहि। एम्बालाइता अरियोपागस कचहरिको सदस्य डियनुसियस, दामारिस दोअ्का बेबाल रो बोमि बुङ प्रभुता खान्धुर पाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.