साल्न्हाका चात्या 16 - धिमालतिमोथि पावल रो सिलासहेङ दुसुका 1 पावल डर्बि रो लुस्त्राता बुङ लोहि। इन्ता तिमोथि मिङ हिका एमि चात्या हिघाखे। वा युनिस मिङ हिका एमि खान्धुरि यहुदि बेबालको चान हिघाखे, कुलाउ वाको आबाचाहिँ ग्रिक हिघाखे। 2 लुस्त्रा रो आइकोनियनको दादाओनेगेलाइता वाको मिङ चलिका हिघाहि। 3 वासेहेङ पावल दोसाङ चुमपुलि मन पाहि। इङको थामेगेलाइता हिका यहुदिगेलाइको खातिरहोइ पातेङ पावल वासेहेङ चुमपुतेङ खतना पाहि। हाइपाङ वाको आबा ग्रिक हिघाखे दोअ्का ओबालाइ झाराङ गेका हिघाखे। 4 इङकोन्हुअ्सो एम्बालाइ पुरगेलाइको दामा जेङतेङ हानेलाउ यरुसलेमको साल्तेङ दिङगिल्कालाइ रो एल्डरगेलाइको पाका निधोगेलाइ एबालाइहेङ मानेसु दोअ्तेङ हिङपापिहि। 5 एसापा मन्डलिगेलाइ खान्धुरता बोल्याका जेङतेङ दिनादिनाङ बार्हेतेङहान्हेहि। पावल त्रोआस पुरता निङका दर्सन 6 पुनित हाङसासो पावल, सिलास रो तिमोथिहेङ एसियाता पारचार पालि रोकेनाङसिङ एम्बालाइ फ्रिगिया रो गलातियाको माउजागेलाइ जेङतेङ हानेहि। 7 माइसियाको सिमानाता लोकान्हुअ्सो एम्बालाइ बिथिनियाभारि हानेलि ठहर पाहि। कुलाउ इसुको हाङसा एम्बालाइहेङ हानेलि मापिहि। 8 कोलाउ माइसिया जेङतेङ एम्बालाइ त्रोआसता हानेहि। 9 न्हिसिङ पावल एलोङ नजर निङहि: माकेदोनियाको एमि द्याङ जाअ्तेङ वासेहेङ एसा दोअ्तेङ पुकार पातेङ हिघाहि, “माकेडोनिया लोपि रो केलाइहेङ साघाइ।” 10 जेलाउ पावल इदोइ नजर निङहि, ओदोङघरि केलाइ माकेडोनिया हानेलि साजेन्हाहि। हाइदोनु इन्ताको द्याङगेलाइहेङ रेम्काबानाल पारचार पालि परमेस्वर दोङ काइकाहिघाहि दोअ्तेङ केलाइ गेन्हाहि। लिडिया प्रभुता खान्धुर पाका 11 कोलाउ केलाइ त्रोआससो चि जाहाज धोल्तेङ सोझाङ सामोथ्राकेभारि हानेन्हाहि रो जुम्निदिना नियापोलिसता थुकान्हाहि। 12 इन्तासो तेतेङ फिलिप्पिता थुकालिलोन्हाहि, जाइ माकेडोनियाको मुल पुर रो रोमि सारकारको खाबराता हिघाहि। इन्ता केलाइ आधे दिनाथिकापा हिन्हाहि। 13 झोराको काम्बेता यहुदिगेलाइको पुकार पाका थामे हिवाला दोअ्का फोमपातेङ केलाइ माइसाका दिना इन्ता हानेन्हाहि। कोलाउ इन्ता जोम्तेङ हिका बेबालाइदोफा योम्तेङ काथा पालि तेङन्हाहि। 14 कालाउ थिआटिरा पुरता हिका, जाङका बेङगाना रङको पाइकार पाका लिडिया मिङ हिका एमि परमेस्वरहेङ पुजिका बेबाल केलाइको कथन हिङहि। पावलको धुइका काथा रेम्फा हिनाको दोअ्तेङ प्रभु वाको कोन्धाङ हेपिहि। 15 जब वा रो वाको साअ्को झाराङको चिभुअ्लि र्हुहि, कोलाउ वा केलाइहेङ पुकार पातेङ एसा दोअ्हि, “नेलाइ कासेहेङ प्रभुको खान्धुर पाका दोअ्सुखेना पानु केलाइको साअ्ता लोतेङ हिपिसु।” पावल रो सिलास थुना निन्चाका 16 जेलाउ केलाइ पुकार पाका थामेता हानेदोङन्हाखे, कोलाउ खरि खाङका हाङसा हिका एमि बान्धाइति बेजानहेङ दुसुन्हाहि। जाइ खरि खान्तेङ ताइको गिर्हिगेलाइको भाअ्सिङ हेन्जा कामाइ पापिघाहि। 17 इङको पावल रो केलाइहेङ पिताइलि तेङहि रो एसा दोअ्तेङ र्हिकाइहि, “इदोइ द्याङगेलाइ झाराङखान्तेङ बाराका परमेस्वरको सेबकगेलाइ एइ। एबालाइ नेलाइहेङ मुक्तिको दामाको पारचार पाखे।” 18 इङको हेन्जा दिनाथिकापा एसा पागिल्हि। कोलाउ पावल दिक मानितेङ तु:सो घुरितेङ इङको आसाति हाङसाहेङ दोअ्हि, “इसु ख्रिस्टको मिङता का नासेहेङ इङकोसो ओल्हेलि हुकुम पाखा।” कालाउ इङको मासान ओदोङघरि ओल्हितेङ हानेहि। 19 कालाउ मालिकगेलाइ इङको बेजानसो कामाइका दामा दोङ राम्का तिङतेङ एम्बालाइ पावल रो सिलासहेङ रिम्तेङ हातेको चोकता हिका नियापाका थामेता हेरतेङ चुमपुहि। 20 कालाउ एम्बालाइहेङ पुरको रोमि हाकिमगेलाइकोता चुमातेङ दोअ्हि, “यिदोइ द्याङगेलाइ यहुदि एइ, एबालाइ केलाइको पुरता गोलमाल पादोङखे। 21 एबालाइ रोमि कानुनता बुङ मान्थुका रो जेङका माजेङका रितगेलाइ धिरपाखे, जाइहेङ मानेलि उचित मान्थु।” 22 ओदोङघरि द्याङगेलाइ पावल रो सिलासहेङ दान्हाइलि भोहि। हाकिमगेलाइ एम्बालाइको धाबा थेअ्तेङ थाल्पिगिल्हि रो एम्बालाइहेङ छरि म्हेअ्लि हुकुम पिहि। 23 ओबालाइ एम्बालाइहेङ हेन्जाङ छरि म्हेअ्कान्हुअ्सो थुनाको हाकिमकोता चुमपुतेङ इङको न्हेमिहेङ खाअ्लि मादोपाङ थुनिलि हुकुम पिहि। 24 इसिका हुकुम निङतेङ थुनाको हाकिम पावल रो सिलासहेङ थुनाको लिअ्ताको कोठाता चुमपुतेङ एम्बालाइको खोकोइता ठिङगुर तातेङ ताअ्पिहि। 25 कुलाउ आधा न्हिसिङता पावल रो सिलास पुकार पातेङ परमेस्वरको ले लेदोङघाखे रो बो काइदिगेलाइ चाहिँ हिङतेङ हिघाखे। 26 कोलाउ ओदोङघरि एलोङ बाराका भुइचाल हानेहि। थुनाको जगगेलाइ हेङघालाइन्हाहि, गोताङ फिनुगेलाइ हेन्हाहि रो काइदि झाराङको धेउन्हाका खाइन्हाहि। 27 थुनाको हाकिम निन्धाकासो नाङघाहि रो थुनाको फिनुगेलाइ हेनाका तिङतेङ काइदिगेलाइ झाराङ खाअ्होइवाला दोअ्तेङ वा ताइमिङ सिलि ठहरपातेङ ताइको काति होअ्हि। 28 कुलाउ पावल बारागाला पातेङ एसा दोअ्तेङ र्हिकाइहि, “एन्सा मापा, केलाइ झाराङ इताङ हिन्हाहि।” 29 कोलाउ गेसा र्हेतेङ वा काल्हाम्तेङ लिअ्ता लोहि रो थितेङ फिर्तेङ पावल रो सिलासको खोकोइता सेउपाहि। 30 एम्बालाइहेङ बाहार चुमपुतेङ वा दोअ्हि, “मुक्ति निङलि का हाइ पालि गोयाङ?” 31 कालाउ एम्बालाइ दोअ्हि, “प्रभु इसु ख्रिस्टता खान्धुर पा कालाउ ना रो नाङको खालसुदाङ मुक्ति निनाना। एसापाङ ना रो नाङको जाहानगेलाइ बुङ मुक्ति निनावा।” 32 पावल रो सिलास वासेहेङ रो वाको साअ्ता हिका झोको झाराङहेङ प्रभुको कथन हिम्पाहि। 33 कोलाउ न्हिसिङको इदोङखातिर पहर वा एम्बालाइहेङ चुमपुतेङ एम्बालाइको पेचारा झापिहि। कालाउ वा रो वाको खालहोइ ओदोङघरि चिभुअ्लि र्हुहि। 34 इङकोन्हुअ्सो पावल रो सिलासहेङ वा साअ्ता चुमपुतेङ बान्सा बुझाइहि रो परमेस्वरहेङ खान्धुर पाघा दोअ्का काथाता वाको झाराङ खालदोफा वा लेङचाहि। 35 कुलाउ फाइसालाम्कान्हुअ्सो पुरको हाकिमगेलाइ सिपालाइहेङ इदोइ हुकुम पिगिल्हि, “इङको द्याङगेलाइहेङ लाअ्पिसु।” 36 कोलाउ थुनाको हाकिम पावलहेङ इदोइ काथा हिङपाहि, “पुरको हाकिमगेलाइ नेलाइहेङ लाअ्पिलि हुकुम पिका हि। इदोइभाअ्सिङ एला ओल्हेतेङ नेलाइ सुबिस्तासो हानेसु।” 37 कुलाउ पावल एम्बालाइहेङ दोअ्हि, “केलाइ रोमि नागरिकहेङ हाइदोङ फतुर मालागाइसिङ ओबालाइ द्याङगेलाइको आगाता दान्हाइहि, थुनाता बुङ ह्वाअ्हि रो एला केलाइहेङ सिपापा ओल्हेपालि भोखे? इदोइ जेङलि माद्वाङ। ओबालाइ ताइमिङ ल्वाको रो केलाइहेङ ओल्हेपातेङ चुमप्वाको।” 38 कालाउ पावलको दोअ्का काथा सिपाल्हाइ हाकिमगेलाइकोता हानितेङ हिम्पाहि। पावल रो सिलास ते रोमि नागरिक हि दोअ्का हिङतेङ एम्बालाइ थिहि। 39 ओबालाइ लोतेङ एम्बालाइदोफा माफ र्हेहि रो एम्बालाइहेङ बाहार चुमपुहि रो पुर लाअ्तेङ हानेलि बिम्ति पाहि। 40 थुनासो ओल्हेकान्हुअ्सो पावल रो सिलास लिडियाको साअ्ता हानेहि। इन्ता एम्बालाइ खान्धुरि दादाओनेगेलाइदोफा दुसुतेङ ओबालाइहेङ आट रो हाउसाला पितेङ इन्तासो दामा लाअ्हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.