साल्न्हाका चात्या 15 - धिमालयरुसलेमको कचहरि 1 एला आधेमि द्याङगेलाइ यहुदियासो एन्टिओखियाता लोतेङ दादाओनेगेलाइहेङ इसिका बिद्या पिलि तेङहि, “मोसाको नियमआन्सार खाताना मापानु नेलाइ मुक्ति निङलि मादोस्वाना।” 2 कोलाउ पावल रो बारनाबासको एम्बालाइदोफा हेन्जाङ गालाबाजि जेङहि। इन्ताको दादा ओनेगेलाइ पावल, बारनाबास रो बो हेअ्मिहेङ इदोइ काथाको फाइसालाको भाअ्सिङ साल्तेङ दिङगिल्कालाइ रो एल्डरगेलाइकोता यरुसलेम हानेलि भरना पाहि। 3 मन्डलिको दादाओने रो बाइओनेगेलाइ एम्बालाइहेङ इन्तासो दिङगिल्हि। एम्बालाइ फोनिके रो सामरिया जेङतेङ हानेलाउ बोजात्यागेलाइ प्रभुहेङ र्हुका काथा एम्बालाइहेङ माबिराइसिङ हिम्पाहि। इदोइ बानालसो इन्ताको दादाओनेगेलाइ हेन्जाङ लेङचाहि। 4 जेलाउ एम्बालाइ यरुसलेम थुकालिलोहि, कोलाउ एम्बालाइहेङ मन्डलि, साल्तेङ दिङगिल्कालाइ, रो एल्डरगेलाइ मान पाहि। परमेस्वर एम्बालाइदोफा पाका गोताङ काथाको बिबरन एम्बालाइ इन्ता पिहि। 5 कोलाउ खान्धुर पाका हेअ्मि फरिसिगेलाइ जाअ्तेङ दोअ्हि, “बोजात्यागेलाइको खाताना जेङलि रो एम्बालाइहेङ मोसाको पिका नियम मानेलि हुकुम पिलि जरुरि हि।” 6 इदोइ बारेता ठहर पालि साल्तेङ दिङगिल्कालाइ रो एल्डरगेलाइ जोम्हि। 7 हेन्जा गालबाजि जेङकान्हुअ्सो पत्रुस ल्होतेङ एम्बालाइहेङ दोअ्हि, “दादाओनेगेलाइ, नेलाइ दोङ गेसुखेना, लाम्फाको दिनागेलाइता हेसापा परमेस्वर काङको नुइसो बोजात्यागेलाइ रेम्काबानालको कथन हिन्को रो खान्धुर पाको दोअ्तेङ नेलाइको माझासो कासेहेङ साल्हि। 8 कोन्धाङको काथा गिका परमेस्वर एम्बालाइहेङ बुङ केलाइहेङ भाइपाङ पुनित हाङसा पितेङ एम्बालाइहेङ र्हुका काथा तिङपाहि। 9 वा एम्बालाइ रो केलाइको माझा हिदिङ पछेपात माताअ्हि। कुलाउ एम्बालाइको कोन्धाङ खान्धुरसो पुनित पाहि। 10 इदोइखातिर चात्यागेलाइको कान्धेता इदोइ जुङगेले ताअ्पितेङ हाइपालि परमेस्वरको जाच पाल? इदोइ जुङगेले ना केलाइको आबाखाल ना केलाइ फालि दोन्हाहि। 11 कुलाउ केलाइ खान्धुर पान्हाखे, जेसापा प्रभु इसुको प्रतापसो केलाइ मुक्ति निङका हिन्हाहि, एन्सा दोङ एम्बालाइ बुङ निङका हि।” 12 कोलाउ कचहरिता झाराङ सिपा हि, कालाउ बोजात्यागेलाइको माझाता परमेस्वर एम्बालाइसो हिसिका चिनोगेलाइ रो भारभुसाइका कामगेलाइ पाहि इङकोको बाखिन पावल रो बारनाबास पाहि। ओबालाइ इदोइ बाखिन हिङहि। 13 एम्बालाइ धुइलिदोअ्कान्हुअ्सो याकुब एसा दोअ्हि, “दादाओनेगेलाइ, काङको काथा हिङसु, 14 परमेस्वर ताइकोङ मिङको भाअ्सिङ बोजात्यागेलाइसो एलोङ जात्या साल्लि निगाह पाहि दोअ्का काथा सिमोन पत्रुस दोअ्पिका हि। 15 इदोङ काथादोफा आगाधुइकालाइको कथन बुङ मिलिखे, जिसिका लेखेन्हाका हि: 16 ‘इदोइ काथान्हुअ्सो का घुर्याङका, दाउदको र्हाअ्न्हाका हिका थामे आरोङ बान्हायाङका, इङको र्हाअ्न्हाका का आरोङ बान्हायाङका रो इङकोहेङ जाअ्पाङका, 17 हिका द्याङगेलाइ परमप्रभुहेङ भोलि द्वाको, झाराङ बोजात्यागेलाइ बुङ, जेदोङगेलाइ काङको मिङसो काइन्हाका हि, 18 इदोइ काथा दोअ्तेङ परमप्रभु दोअ्खे, जाइ लाम्फाको पहरसो इदोइ काथागेलाइ दोअ्पिका हि, जाइ सिरजाइको थालनिसो गेन्हाका हि।’” 19 “इदोइखातिर काङको ठहर इदोइ हि, परमेस्वरभारि घुरिका बोजात्यागेलाइहेङ केलाइ तु: माप्याइने, 20 कुलाउ एम्बालाइहेङ इदोइ काथा लेखेप्याइने: एम्बालाइ मुर्तिपुजिकाको अपुनितसो, दुराचारसो, निरघा एरेतेङ सेअ्का गुपुसको बिह्या रो हितिसो फारापा ह्याको। 21 हाइदोनु लाम्फाको खालसो दोङ पुरकिअ्पाङ मोसाको नियम पारचार जेङदोङखे रो इदोइ गोताङ कचहरिसाअ्ता माइसाका दिनाता पर्हिदोङखे।” कचहरिको निधो 22 कोलाउ साल्तेङ दिङगिलन्हालाइका, एल्डरगेलाइ रो गोताङ मन्डलि मिलितेङ ताइको माझासो हेथे द्याङगेलाइहेङ साल्तेङ पावल रो बारनाबासदोफा एन्टिओखियाता दिङगिल्लि मुनासिप तिङतेङ एम्बालाइता मुल द्याङगेलाइ, यहुदा दोअ्का बारनाबास रो सिलासहेङ साल्हि। 23 एम्बालाइ दोसा ओबालाइ इदोइ चिथि पिगिल्हि: “एन्टिओखिया, सिरिया रो किलिकियाता हिका बोजात्या खान्धुरि दादाओनेगेलाइहेङ, साल्तेङ दिङगिल्कालाइ रो एल्डरगेलाइको सेउपागिल्का। 24 केलाइ हिङका हिन्हाहि, केलाइको माझासो हेअ्मि द्याङगेलाइ केलाइको हुकुम माकोसिङ माजेङका काथा दोअ्तेङ नेलाइको मन तु: पिका हि। 25 इदोइखातिर केलाइ झाराङ एमतसो पाका निधोमाफिक हेथे द्याङगेलाइहेङ साल्तेङ एम्बालाइहेङ मोन्दाताका बारनाबास रो पावलदोफा नेलाइकोता दिङगिल्लि केलाइहेङ मुनासिप लागेहि। 26 एबालाइ इसिका एइ, जाइगेलाइ केलाइको प्रभु इसु ख्रिस्टको भाअ्सिङ ताइको बायुसुदाङ पिलि त्यार हि। 27 इदोइखातिर केलाइ इङको न्हेमिदोफा यहुदा रो सिलासहेङ दिङगिल्का हिन्हाहि। केलाइको लेखेका काथागेलाइ एम्बालाइ ताइकोङ नुइसो बुङ नेलाइहेङ दोअ्तावा। 28 एला मानेलि गोइका मुल काथागेलाइबिना बो हेन्जा भारि माफुपालि दोङ पुनित हाङसा रो केलाइहेङ मुनासिप लागेहि। 29 एला इदोइ मुल काथाहेङ चातेङ ताअ्सु: मुर्तिहेङ भोग पिका चिज माचासु, हिदिङ जन्तुको बुङ हिति माआम्सु, निर्घा एम्तेङ सेअ्का गुपुसको बिय्हा माचासु, दुराचारसो खेङन्हातेङ हिसु। इदोइ काथागेलाइसो खेङन्हातेङ हिसुन्हा पानु रेम्का जेनावा। सेउपान्हाखे।” 30 बिदाबारि जेङकान्हुअ्सो एम्बालाइ एन्टिओखियाता लोहि रो इन्ता एम्बालाइ मन्डलिको झाराङ द्याङगेलाइहेङ काइतेङ इङको चिथि पिहि। 31 चिथिता हिका काथागेलाइ पर्हितेङ एम्बालाइ झाराङ लेङचाहि। 32 यहुदा रो सिलास ताइमिङगेलाइ बुङ आगाधुइका हिनाङसिङ एम्बालाइहेङ कथनगेलाइसो आँट पितेङ बोल्याका बान्हाइहि। 33 आसा दिनान्हुअ्सो यहुदा रो सिलासहेङ इन्ता हिका खान्धुरि दादाओनेगेलाइ बेराजापा हानेसु दोअ्तेङ एम्बालाइहेङ दिङगिल्का दादाओनेगेलाइकोता दोङघुरिपागिल्हि। 34 [कालाउ बुङ सिलास इन्ता दोङ हिलि मन पाहि।] 35 पावल रो बारनाबासचाहिँ बिद्या पितेङ रो प्रभुको कथन पारचार पातेङ बो हेन्जा द्याङगेलाइदोफा एन्टिओखियाता हि। पावल रो बारनाबास खेङन्हाका 36 आधे दिनान्हुअ्सो पावल बारनाबासहेङ दोअ्हि, “लोउ, जेदोङ जेदोङ पुरगेलाइता प्रभुको कथन केलाइ पारचार पाका हिघान्हाहि इङको पुरगेलाइता घुरितेङ दादाओनेगेलाइहेङ दुस्वाइने रो एम्बालाइ हाइ हिसिका हि खानाइने।” 37 बारनाबास मर्कुस दोअ्का युहन्नाहेङ एम्बालाइदोफाङ चुमपुलि लाल्सा पाहि। 38 कुलाउ पावल मर्कुसहेङ दोफाङ चुमपुलि मुनासिफ फोममापाहि। हाइदोनु वा पामफिलियासो खेङन्हातेङ हानेका हिघाखे रो एम्बालाइदोफा कामता हानेका मान्थुघाखे। 39 इङको काथाता पावल रो बारनाबास मामिलिसुतेङ एम्बालाइ एमि भेनेङसो खेङन्हाहि। कोलाउ बारनाबासचाहिँ मर्कुसहेङ दोसाङ चुमपुतेङ साइप्रसभारि हानेहि। 40 कुलाउ पावल ताइमिहेङ साघाइलि सिलासहेङ साल्हि। कालाउ परमेस्वरको प्रतापता अखान्धुरि दादाओनेगेलाइसो बिदा जेङतेङ इन्तासो एम्बालाइ दामा लाअ्हि। 41 मन्डलिगेलाइहेङ बोल्यापातेङ वा सिरिया रो किलिकिया घुराइ गिल्हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.