साल्न्हाका चात्या 14 - धिमालपावल रो बारनाबास आइकोनियनता 1 आइकोनियनता बुङ पावल रो बारनाबास एदोफाङ कचहरिसाअ्ता हानेहि। एम्बालाइ कचहरिसाअ्ता दुल्तेङ धुइलाउ इन्ता हिका हेन्जाङ यहुदि रो बोजात्याको द्याङगेलाइ खान्धुर पाहि। 2 कुलाउ खान्धुर मापाका यहुदिगेलाइ चाहिँ बोजात्यागेलाइहेङ तोल्हेतेङ दादाओनेगेलाइको खिलाप ओबालाइको मन खाका बान्हाइपिहि। 3 एन्सा जेङलाउ बुङ पावल रो बारनाबास हेन्जाङ लिङकाथिकापा इन्ताङ हि। एम्बालाइ माथिसिङ प्रभुको बारेता धुइहि। प्रभु एम्बालाइको खुरसो चिनोगेलाइ रो सरबङ हिका कामगेलाइ पापातेङ ताइको निगाहाको कथनको दासि पिहि। 4 कुलाउ पुरको द्याङगेलाइ न्हे खेमाता बाखाराइन्हाहि रो आधेमि यहुदिगेलाइभारि रो आधेमि साल्तेङ दिङगिल्कालाइभारि खेङन्हाहि। 5 बोजात्याक रो यहुदिगेलाइ ओबालाइको हाकिमगेलाइदोफा मिलितेङ पावल रो बारनाबासहेङ सान्ताइका रो उन्ठुइ तोलि चेस्टा पाहि। 6 पावल रो बारनाबास इदोइ काथा गेतेङ खाअ्तेङ लुकोनिया माउजाता हिका लुस्त्रा रो डर्बि पुरता हानेहि। 7 इन्ता बुङ एम्बालाइ रेम्काबानाल पारचार पातेङ दोङ हि। लुस्त्रा रो डर्बिता 8 लुस्त्रा पुरता एलोङ नेङगारा द्याङ हिघाहि। इङको जोलोमसोङ कुज्या जेङनासिङ हेअ्लाउ तेलि दोका मान्थुघाहि। 9 पावल धुइका इङको हिङदोङघाहि। पावल बुङ वाको आकारता रेम्फा खाङहि। इङको द्याङ “का बुङ एल्लि द्वाङका” दोअ्तेङ खान्धुर पाखे दोअ्का पावल गेहि। 10 पावल बारा गालाहोइ र्हिकाइतेङ दोअ्हि, “नाङको खोकोइको आरता सोझा जाअ्।” कालाउ इङको जुरुक्पा ल्होहि रो तेलि तेङहि। 11 जेलाउ पावलको पाका इदोइ काम तिङहि, कोलाउ एम्बालाइ लुकानियाको राउता बारा गालाता एसा दोअ्हि, “दिरगेलाइ द्याङको आकारता केलाइकोता खुअ्तेङ लोहि।” 12 एम्बालाइ बारनाबासहेङ जिउस दिर रो पावलहेङ हर्मेस दिर दोअ्लि तेङहि, हाइपानु वाचाहिँ मुल धुइका हिघाखे। 13 पुरको आगाभारि हिका जिउसको थानता धामि मुल फिनुगेलाइता पियागेलाइ रो ल्हेअ्को हारगेलाइ चुमातेङ इन्ताको द्याङगेलाइदोफा मिलितेङ भोक पिलि लाल्सा पाहि। 14 कुलाउ जेलाउ पावल रो बारनाबास इदोइ काथा हिङहि, कोलाउ एम्बालाइ ताइको धाबा थेअ्तेङ एसा दोअ्तेङ र्हिकाइतेङ द्याङगेलाइको माझाता धाअ्तेङ हानेहि रो दोअ्हि, 15 “माको, नेलाइ हाइपालि इसिका काम पासुखेना? केलाइ बुङ ते नेलाइभाइकाङ द्याङगेलाइ एइ। नेलाइहेङ इदोइ बेकारको काथागेलाइसो सिन्हुका परमेस्वरभारि घुरिपालि रेम्काबानाल हिम्पान्हाखे। जेदोङ परमेस्वर सादेल, सुमिङ, जाहादि रो इन्ता हिका गोताङ चिज सिरजाइहि। 16 वा लाम्फा सिलिदोका खालता गोताङ जात्यागेलाइहेङ ताताइको रितबमोजिम पालि पिहि। 17 वा हेअ्लाउ बुङ रेम्का रो हितको कामगेलाइ पालि लाअ्नाङ मान्थु। वा आदेलसो वाइ लोपापितेङ मुनासिप पहरता उब्जनि पापिखे। हेन्जाङ चाकाचिज जुराइपितेङ द्याङगेलाइको कोन्धाङहेङ लेङचाकाहोइ पोङघापापिखे। एसापा परमेस्वरको कामगेलाइहोइ दोङ वाको दासि पिखे।” 18 इदोइ काथा दोअ्तेङ पावल रो बारनाबास ताइमिगेलाइहेङ पिलि भोका भोग हेन्जाङ मुस्किलसो इङको द्याङगेलाइसो रोकेलि दोहि। 19 कुलाउ पिसिदिया माउजाको एन्टिओखिया रो आइकोनियनसो आधे यहुदिगेलाइ इन्ता लोहि। एम्बालाइ द्याङको चेअ्सुहेङ उल्काइतेङ पावलहेङ उन्ठुइ तोहि रो सिहोइ वाला दोअ्तेङ वासेहेङ हेरपुतेङ पुरसो बाहार थालगिल्हि। 20 कुलाउ जेलाउ चात्यागेलाइ पावलको कोरबितिङ जोम्लाउ वा ल्होहि रो पुरभारि दुल्हि। जुम्निदिना बारनाबासदोफा ओल्हेतेङ डर्बिता हानेहि। सिरियाको एन्टिओखियाता 21 पावल रो बारनाबास डर्बि पुरता रेम्काबानाल हिम्पातेङ हेन्जा चात्या बान्हाइहि। एम्बालाइ लुस्त्रा, आइकोनियन रो एन्टिओखियाता घुरिहि। 22 एम्बालाइ चात्यागेलाइको आत्माहेङ बोल्याका बान्हाइतेङ ओबालाइहेङ खान्धुरता हितेङहिलि आर्ति पिहि। हेन्जाङ पिर सहितेङ केलाइ परमेस्वरको सारभिता दुल्लि गोयाङ दोअ्तेङ ओबालाइहेङ दोअ्हि। 23 जेलाउ पावल रो बारनाबास ओबालाइको गोताङ मन्डलिता एल्डरगेलाइ साल्हि, कोलाउ पुकार रो म्हितुपाङ हितेङ ताइमिको खान्धुर पाका प्रभुको जिम्माता ओबालाइहेङ जिम्मापिहि। 24 इङकोन्हुअ्सो पावल रो बारनाबास पिसिदियासो पामफिलियाता लोहि। 25 पर्गाता कथन पारचार पातेङ एम्बालाइ अटालियाता खुअ्हि। 26 कालाउ इन्तासो एम्बालाइ चि जाहाजता धोल्तेङ एन्टिओखियाता हानेहि। जेता एम्बालाइ पोङघा पाका कामको भाअ्सिङ परमेस्वरको निगाहाता एम्बालाइहेङ भाकल पाका हिघाहि। 27 जेलाउ एम्बालाइ एन्टिओखियाता थुकालिलोहि, कोलाउ मन्डलिहेङ जोम्पाहि। कालाउ परमेस्वर एम्बालाइ दोसा पाका गोताङ कामको बाखान पाहि रो हेसापा वा बोजात्यागेलाइको भाअ्सिङ खान्धुरको फिनु हेपिहि इङको हिङपाहि। 28 कालाउ एम्बालाइ इन्ता चात्यागेलाइदोफा हेन्जाङ दिना हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.