साल्न्हाका चात्या 13 - धिमालबारनाबास रो साउल साल्तेङ दिङगिल्का 1 एन्टिओखियाको मन्डलिता आगाधुइकालाइ रो धिरपाकालाइता बारनाबास, दाका दोअ्का सिमियोन, कुरेनिको लुकियस, प्रान्तिय राजा हेरोददोफा हुरकिका मनेन रो साउल हिघाखे। 2 एम्बालाइ प्रभुको पुकार पातेङहिका रो म्हितुपाङ हिका पहरता पुनित हाङसा दोअ्हि, “काङको भाअ्सिङ बारनाबास रो साउलहेङ इङको कामको भाअ्सिङ साल्सु, जेदोङ कामको भाअ्सिङ का नेलाइहेङ काइका हिघा।” 3 कोलाउ म्हितुपाङ रो पुकार पातेङ एम्बालाइ बारनाबास रो साउलर्हुता खुर ताअ्तेङ एम्बालाइहेङ प्रभुको कामता दिङगिल्हि। बारनाबास रो साउल साइप्रसता 4 कोलाउ पुनित हाङसासो दिङगिल्का बारनाबास रो साउल सिलुकिया हानेहि रो इन्तासो चि जाहाजता धोल्तेङ साइप्रसभारि हानेहि। 5 सलामिस पुरता थुकालिलोकान्हुअ्सो एम्बालाइ यहुदिगेलाइको कचहरिसाअ्गेलाइता परमेस्वरको रेम्काबानाल पारचार पाहि। एम्बालाइहेङ साघाइलि मर्कुस दोअ्का युहन्ना एम्बालाइदोफा हिघाखे। 6 जेलाउ एम्बालाइ गोताङ साइप्रस टपुभारि घुराइतेङ पाफोसथिकापा थुकालिलोहि। कोलाउ इन्ता एम्बालाइ एमि ढाटाइका आगाधुइका बारइसु दोअ्का यहुदि चटकेहेङ दुसुहि। 7 इङको चटके एलोङ प्रान्तको बाराहाकिम सर्गियस पौलसदोफा हिघाहि। सर्गियस पौलुस आकिलहिका द्याङ हिघाखे। वा साउल रो बारनाबासहेङ काइतेङ परमेस्वरको कथन हिङलि लाल्सा पाहि। 8 कालाउ बुङ बारइसु (ग्रिक राउता याको माने एलिमस जेङखे) चटके सर्गियस पौलसहेङ खान्धुरसो घुरिपालि भोतेङ एम्बालाइदोफा खिचोला पालि तेङहि। 9 कुलाउ साउल (जाइहेङ पावल बुङ दोअ्खे) पुनित हाङसासो पोङघान्हातेङ एलुमासहेङ खाङका खाङकाङ पाहि 10 रो दोअ्हि, “ना दियाबलसको चान, गोताङ धरमको दुस्मन, आसाति चालसो पोङघाका! हाइ ना प्रभुको सोझा दामा केउपालि मालाअ्ताना? 11 एला खाङ, प्रभुको खुर नार्हुता परेका हि। ना एला आधे पहरथिकापा सानेको फाइसालामका मातिङका जेङतेङ कान्हा जेनाना।” कालाउ ओदोङघरि कुकुह्वा रो कितिकितिकाहोइ इङकोहेङ थुम्हि। कोलाउ हासुङ इङकोको खुर चातेङ थोनावा बे दोअ्तेङ इङको इसोउसो हानेलि तेङहि। 12 कोलाउ प्रान्तको बाराहाकिम सर्गियस पौलुस इदोइ जेङका तिङतेङ प्रभुको बिद्याता भारभुसाइहि कालाउ वा प्रभुता खान्धुर पाहि। पिसिदियाको एन्टिओखियाता 13 पावल रो वाको सानाइतिगेलाइ पाफोससो चि जाहाज धोल्तेङ पामफिलियाको पर्गाता थुकाहि। इन्तासो मर्कुस दोअ्का युहन्ना पावल रो बारनाबाससो खेङन्हातेङ यरुसलेम घुरिहि। 14 कुलाउ पावल रो बारनाबास पर्गासो ओल्हेतेङ पिसिदियाको एन्टिओखियाता लोहि रो माइसाका दिनाता कचहरिसाअ्ता हानितेङ हि। 15 एला नियम रो आगाधुइकाको किताबको पाठ पर्हेकान्हुअ्सो कचहरिसाअ्को आगुवागेलाइ पावल रो बारनाबासकोता एसा दोअ्तेङ दिङगिल्हि, “ओइ ओनेगेलाइ, नेलाइदोसा द्याङगेलाइको भाअ्सिङ आर्तिको कथन आधे हि पानु दोअ्सु।” 16 कोलाउ जाअ्तेङ पावल खुरको टिप्नि पातेङ दोअ्हि, “इस्राएलि दादाओनेगेलाइ रो परमेस्वरहेङ मानपाकालाइ हिङसु, 17 इस्राएलि जात्याको परमेस्वर केलाइको आबाखालगेलाइहेङ साल्हि रो मिस्रमुलुकता हिलाउ एम्बालाइहेङ मिङचलेका जात्या बान्हाइहि। वाको सरबङ तिम्पातेङ परमेस्वर एम्बालाइहेङ मिस्रमुलुकसो ओल्हेपातेङ चुमाहि। 18 एम्बालाइ उदादाङका थामेता हिलाउ परमेस्वर न्हेकुरि बाअ्सार थिकापा एम्बालाइहेङ ख्याल पाहि। 19 वा कनान पुरको न्हिअ् लोङ जात्याहेङ मुअ् पाहि रो द्यासाइ न्हेकुरिते बाअ्सारथिकापा इङको मुलुक केलाइको पुर्खागेलाइहेङ पिहि। 20 इदोइ काथान्हुअ्सो समुएल आगाधुइकाको पालाथिकापा वा नियापाकालाइहेङ पिहि। 21 इङकोन्हुअ्सो केलाइको खालगेलाइ राजा र्हेहि रो परमेस्वर ओबालाइहेङ बेन्यामिन खालको किसको चान साउलहेङ राजा बान्हाइहि। साउल न्हेकुरि बाअ्सार थिकापा राज पाहि। 22 परमेस्वर साउलहेङ गादिसो लाअ्पातेङ दाउदहेङ राजा जेङलि जाअ्पाहि। वाको बारेता परमेस्वर दासि पितेङ एसा दोअ्हि, ‘का यिसैको चान दाउदहेङ काङको दोअ्का भाइपाङ मनचाका द्याङ निङघा, जाइ काङको गोताङ लाल्सा पोङघा पावा।’ 23 “इदोङ द्याङको न्हुअ् खालसो ताइमिको पाका बाचा पुरा पातेङ परमेस्वर इस्राएलिगेलाइको भाअ्सिङ एमि मुक्तिपिका इसुहेङ चुमाहि। 24 वा लोकाखान्तेङ लाम्फा युहन्ना इस्राएलको गोताङ द्याङहेङ कुकरम मानेकाको चिभुअ्काको पारचार पाका हिघाहि। 25 युहन्ना ताइको काम दोपालि तोम्लाउ दोअ्का हिघाखे, ‘नेलाइ हाइ दोअ्सुखेना, का हासु एइ? का वा माको। कुलाउ कान्हुअ्सो एमि ल्वावा, जाइको खोकोइको जुताथिकापा बुङ होअ्का लायकको का मान्थुघा।’ 26 “ओइ आब्राहामको खालको सान्तान रो नेलाइता परमेस्वरदोफा थिका ओइ ओनेगेलाइ, केलाइकोता दोङ इदोइ मुक्तिको बानाल पिगिल्का हि। 27 हाइदोनु यरुसलेमता हिका रो एम्बालाइको हाकिमगेलाइ वासेहेङ नाल्लि मदोहि। आगाधुइकालाइको कथनगेलाइ जेलाउ बुङ माइसाका दिना पर्हेलाउ बुङ मागेतेङ वासेहेङ सेअ्लि लागाइतेङ इङको कथन पोङघा पाहि। 28 सेअ्लि गोइका हिदिङ दुस मानिङलाउ बुङ एम्बालाइ इसुहेङ सेअ्लि गोयाङ दोअ्तेङ बाराहाकिम पिलातसदोफा बिनइ पाहि। 29 “एसापा वाको बारेता लेखेका गोताङ काथा एम्बालाइ पोङघा पाकान्हुअ्सो वासेहेङ क्रुससो खुअ्पातेङ तोमता ताअ्हि। 30 कुलाउ परमेस्वर इसुहेङ सिकासो सिन्हुपाहि। 31 गालिलसो वाकोदोफाङ यरुसलेमता लोकालाइकोता वा हेन्जा दिनाथिकापा देखालपिहि रो एम्बालाइचाहिँ एला इस्राएलको द्याङगेलाइता दासि जेङका हि। 32 “एला परमेस्वर आबाखालहेङ पाका इङको बाचाको रेम्काबानाल केलाइ नेलाइकोता लोका हिन्हाहि। 33 हाइपानु परमेस्वर इसुहेङ सिकासो सिन्हुपातेङ इङको काथा केलाइ, एम्बालाइको खालको भाअ्सिङ पोङघा पापिहि। जिसिका ले न्हेता बुङ लेखेन्हाका हि: ‘नानिसो ना काङको चान जेङन्हा रो का नाङको आबा जेङघा।’ 34 “वा ख्रिस्टहेङ हेअ्लाउ माआइसिङ सिकासो सिन्हुपाका बारेता चाहिँ एसा दोअ्का हि: ‘का नेलाइहेङ दाउदहेङ पिका पुनित रो जातिङको सहसाम्पा प्याङका।’ 35 “आरोङ लेकिताबको भेनेङ थामेता दाउद एसा दोअ्खे: ‘ना ताइको पुनित जनको जिउ आइलि माप्याना।’ 36 “हाइपानु दाउदको ताइकोङ खालता परमेस्वरको सेवा पातेङ सिकान्हुअ्सो वाको आबाखालदोफा लिअ्न्हाहि रो वाको जिउ आइतेङ हानेहि। 37 कुलाउ जाइहेङ परमेस्वर सिकासो सिन्हुपाहि वाको जिउचाहिँ माआइहि। 38 “इदोइखातिर दादाओनेगेलाइ, नेलाइ गिसु, इदोइ दोङ इसुसो कुकरम माफ ज्याङ दोअ्तेङ केलाइ नेलाइहेङ दोअ्लि भोन्हाखे। 39 नेलाइ खान्धुर पाकालाइ झाराङ वासोङ दोङ गोताङ काथागेलाइसो लाअ्पिन्हाका निङकाहिसुन्हा, जेदोङ ल्अ्पिन्हाका नियमसो नेलाइको भाअ्सिङ जेङलि मादोधाङ। 40 इदोइखातिर होसपातेङ हिसु रो माकोनुते आगाधुइकालाइको दोअ्का इदोइ काथा नेलाइर्हुता लोलिद्वावा: 41 ‘ओइ गिल्ला पाकालाइ, खाङसु रो भारभुसाइसु, कालाउ मुअ्तेङ हान्हेसु! हाइपानु नेलाइको पहरता का एलोङ काम पाङका, इसिका काम जाइको बारेता हासुङ बाखिन पापिलाउ बुङ नेलाइ हेअ्लाउ खान्धुर मापास्वाना।’” 42 पावल रो बारनाबास कचहरिसाअ्सो ओल्हेतेङ हानेलि तोम्लाउ लोका माइसाका दिनाता बुङ इदोइ काथा हिम्पापिसु दोअ्तेङ द्याङगेलाइ एम्बालाइहेङ भनसुन पाहि। 43 कचहरि दोकान्हुअ्सो हेन्जा यहुदिगेलाइ रो यहुदि धरम मानेकालाइ पावल रो बारनाबासहेङ पिताइहि। एम्बालाइ ओबालाइदोफा धुइतेङ ओबालाइहेङ परमेस्वरको निगाहाता हितेङहिलि दोअ्तेङ बिनइ पाहि। 44 भेनेङ माइसाका दिना पुरको द्याङगेलाइ परमेस्वरको कथन हिङलि उल्टितेङ लोहि। 45 हेन्जा द्याङगेलाइ जोम्का तिङतेङ यहुदिगेलाइ चेर ताम्पाहि रो पावलको दोअ्का काथा पोपितेङ वाको बादनामि पाहि। 46 कुलाउ पावल रो बारनाबास माथिसिङ दोअ्हि, “परमेस्वरको कथन झाराङखान्तेङ लाम्फा नेलाइहेङ दोङ हिम्पालि गोइका हिघाहि। नेलाइ इदोइ हिङलि माकिअ्तेङ ताइमिहेङ हेअ्लाउ मासिका ज्यान निङलि लायक बान्हाइनाङ केलाइ एला बोजात्यागेलाइकोता हानाङ। 47 हाइपानु परमेस्वर केलाइहेङ इसिका हुकुम पिका हि: ‘सुमिङको झाराङ द्याङगेलाइ मुक्ति निनाको दोअ्तेङ का नेलाइहेङ बोजात्यागेलाइको भाअ्सिङ फाइसालामका जेङलि भरना पाका हिघा।’” 48 जेलाउ बोजात्यागेलाइ इदोइ कथन हिङहि, एम्बालाइ लेङचातेङ परमेस्वरहेङ बाखिन्हि रो हेअ्लाउ मासिसाका ज्यानको भाअ्सिङ भरना जेङकालाइ झोको खान्धुर पाहि। 49 परमेस्वरको कथन गोताङ माउजाभारि बिअ्न्हाहि। 50 कुलाउ पावल रो बारनाबासको खिलाप यहुदिगेलाइ परमेस्वरहेङ मानेका, मिङचलेका बेबालाइ रो पुरको मुलमुल द्याङगेलाइहेङ उल्काइतेङ ओबालाइहेङ ताइको साधसिमानासो बाहार गिल्गिल्हि। 51 कुलाउ ओबालाइचाहिँ ताइको खोकोइको धुला एम्बालाइको खिलाप थितेङ आइकोनियनता लोहि। 52 चात्यागेलाइ लेङचातेङ पुनित हाङसाहोइ पोङघा न्हाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.