साल्न्हाका चात्या 12 - धिमालराजा हेरोद मन्डलिहेङ सान्ताइका 1 इङको पहरता राजा हेरोद अग्रिपा मन्डलिको हेथे दादाओनेगेलाइहेङ आतिचार पालि तेङहि। 2 वा युहन्नाको दादा याकुबहेङ कातिहोइ सेअ्हि। 3 इदोइ कामसो यहुदिगेलाइ लेङचाका तिङतेङ पत्रुसहेङ बुङ रिम्लि तरखर पाहि। इदोइ वारदात लाअ्पिका पारबाको पहरता जेङका हिघाहि। 4 हेरोद पत्रुसहेङ रिम्तेङ थुनाता ह्वाअ्पिहि। कोलाउ वासेहेङ र्हुम्लि सिपाल्हाइको द्या डफ्फाको जिम्मा लागाइपिहि। लाअ्पिका पारबाको न्हुअ्सो पत्रुसहेङ यहुदिगेलाइको आगाता चुमालि हेरोदको ठहर हिघाहि। 5 एसापा पत्रुसहेङ थुनाता ताअ्लाउ मन्डलि एलोङ मनको जेङतेङ वाको भाअ्सिङ परमेस्वरदोफा पुकार पातेङ हिघाखे। पत्रुस थुनासो ओल्हेका 6 हेरोद पत्रुसहेङ बाहार ओल्हेपातेङचुमालि भोकाङ न्हिसिङ, वा न्हेमि सिपाल्हाइको माझाता न्हेलोङ झिन्झिरिहोइ धेउन्हातेङ जिम्तेङ हिघाखे। बो सिपाल्हाइ बुङ फिनु आगाता जाअ्तेङ वासेहेङ र्हुमतेङ हिघाखे। 7 एकासि प्रभुको एलोङ सादेलचर इन्ता देखाल पिहि रो कोठा दोङ फाइसालामहि। सादेलचर पत्रुसको कोखेता दान्हाइतेङ “मार्फा ल्हो” दोअ्तेङ वासेहेङ ल्होपाहि। कोलाउ झिन्झिरिगेलाइ वाको खुरसो खाइन्हातेङ हुल्हि। 8 सादेलचर पत्रुसहेङ दोअ्हि, “लोखोन रो जुता लागाइ।” कोलाउ वा एन्साङ पाहि। सादेलचर पत्रुसहेङ दोअ्हि, “धाबा गुअ्तेङ कासेहेङ पिताइ।” 9 कालाउ वा ओल्हेतेङ सादेलचरहेङ पिताइहि। सादेलचरसो पाका इदोइ काथा जातिङकोङ एइ दोअ्का वा मागेहि। कुलाउ नजर तिङदोङखा दोअ्दोङ वा गेहि। 10 जेलाउ ए रो न्हे र्हुम्का थामे काल्हाम्तेङ पुरता दुल्का चिरको द्वारता एम्बालाइ थुकालाउ, इङको द्वार ताइमिङ एम्बालाइको भाअ्सिङ हेनाहि। एम्बालाइ बाहार ओल्हेतेङ एलोङ चेअ्का दामा जेङतेङ हानेहि। कोलाउ सादेलचर पत्रुसहेङ लाअ्तेङ हानेहि। 11 जेलाउ पत्रुसको होस खुलिहि कोलाउ वा दोअ्हि, “एला कासेहेङ जातिङको दोङ था जेङहि, प्रभु ताइको सादेलचर दिङगिल्पितेङ राजा हेरोदको खुरसो रो यहुदिगेलाइ जे पालि भोघाखे इङको झाराङसो कासेहेङ लाअ्पाहि।” 12 इदोइ काथा गेकान्हुअ्सो, वा मर्कुस दोअ्का युहन्नाको आमाइ मरियमको साअ्ता हानेहि। इन्ता हेन्जाङ द्याङगेलाइ जोम्तेङ पुकार पादोङ घाखे। 13 पत्रुस फिनुता चालापिलाउ रोदा मिङ हिका कामपाका फिनु हेलि लोहि। 14 पत्रुसको गाला नाल्तेङ वा लेङचातेङ फिनुङ माहेसिङ लिअ्ता धाअ्तेङ हानेहि रो दोअ्हि, “पत्रुस फिनुता जाअ्तेङ हि।” 15 एम्बालाइ इङकोहेङ दोअ्हि, “ना पागिलि जेङन्हा ना हाइको?” कुलाउ इङको दोअ्हि, “जातिङकोङ पत्रुस दोङ एइ।” दोअ्तेङ जिद्दि पाहि। कोलाउ एम्बालाइ दोअ्हि, “एन्सा नु वासेहेङ खाङका सादेलको बालाल चुमाका वाला!” 16 कुलाउ पत्रुस चाहिँ फिनु चालापादोङघाहि। फिनु हेलाउ वासेहेङ तिङतेङ एम्बालाइ भारभुसाइहि। 17 एम्बालाइहेङ पत्रुस “सिपापा हिसु” दोअ्तेङ खुरहोइ टिप्नि पाहि। कालाउ प्रभु वासेहेङ हेसापा थुनासो ओल्हेपाहि इङको एम्बालाइहेङ दोअ्पिहि। इदोइ काथाको बानाल याकुब रो बो ओनेगेलाइहेङ बुङ पिसु दोअ्तेङ वा बिदा जेङतेङ भेनेङ थामेता हानेहि। 18 फाइसालामका जेङकान्हुअ्सो पत्रुसहेङ हाइ जेङहि दोअ्तेङ सिपाल्हाइको माझाता बाराका खलबल जेङहि। 19 हेरोद वासेहेङ भोतेङ बुङ मादुसुलाउ, सिपाल्हाइहेङ जाच पातेङ एम्बालाइहेङ ज्यानदारको हुकुम पाहि। इङकोन्हुअ्सो हेरोद चाहिँ यहुदियासो कैसरिया हानेतेङ इन्ताङ दोङ हि। राजा हेरोद सिका 20 हेरोद टुरोस रो सिदोनको द्याङगेलाइदोफा हेन्जाङ चेरताम्पाका हिघाखे। एम्बालाइ ए हुल जेङतेङ वाकोता लोहि रो राजाको दरबार लिअ्ताको द्याङ बलस्तसदोफा खुसामद पातेङ मिलापको भाअ्सिङ बिम्ति पाहि। हाइपानु एम्बालाइको मुलुक चाका आम्का चिजको भाअ्सिङ राजाको मुलुकता भर परिलि गोइघाहि। 21 तोकिका दिनाता राजाको धाबा लागाइतेङ हेरोद वाको गादिता योम्हि 22 रो एम्बालाइहेङ “इदोइ ते परमेस्वरको गाला एइ, द्याङको माको!” दोअ्तेङ र्हिकाइहि। 23 कुलाउ परमेस्वरहेङ प्रताप मापिकाता इङको दोङ पहर प्रभुको एलोङ सादेलचर वासेहेङ मासाअ्धेपाहि रो पेअ्सा पेअ्तेङ वा सिहि। 24 कुलाउ प्रभुको कथन बार्हितेङ रो फिजाइन्हातेङ हानेहि। 25 बारनाबास रो साउल ताइको काम पोङघा पातेङ यरुसलेमता घुरिहि। एम्बालाइदोफा मर्कुस दोअ्का युहन्ना बुङ हिघाखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.