साल्न्हाका चात्या 11 - धिमालपत्रुस यरुसलेमको मन्डलिता 1 यहुदियाता हिका दिङगिल्कालाइ, खान्धुरि दादा ओनेगेलाइ रो बोजात्यागेलाइ बुङ परमेस्वरको कथन र्हुहि दोअ्का हिङहि। 2 जेलाउ पत्रुस यरुसलेमता लोहि, कोलाउ खाताना पाकालाइ वासेहेङ एसा दोअ्तेङ दुसिहि। 3 एम्बालाइ पत्रुसहेङ दोअ्हि “खाताना मापाका द्याङगेलाइकोता हानेतेङ एम्बालाइदोफा हाइपालि चाकाआम्का पान्हा?” 4 कोलाउ पत्रुस मेलोसो एम्बालाइहेङ हिङपालि तेङहि: 5 “का योप्पा पुरता हिलाउ पुकार पादोङघाखा, का ध्यान पालाउ इसिका एलोङ दरसन तिङघा। सादेलसो एलोङ धाबा चिज द्या सुरता चातेङ लेता काभारि हुल्तेङहिका तिङघा। 6 का रेम्फा खाङलाउ इन्ता सुमिङको गोताङ खालको द्यालोङ खोकोइ हिका गुपुस, ह्यालतेङ हिगिल्का जिब रो आदेलको जिह्याँ जुइलेङगेलाइ तिङघा। 7 कोलाउ एलोङ गाला का हिङघा, ‘ओइ पत्रुस, ल्हो रो एबालाइहेङ सेअ्तेङ चा।’ 8 कुलाउ का दोअ्घा, ‘माको प्रभु, हिदिङ हुकुम रो अपुनित चिज काङको नुइता हेअ्लाउ दुल्का मान्थु।’ 9 सादेलसो आरोङ इसिका गाला हिङघा, ‘परमेस्वर चोखो बान्हाइका काथाहेङ अपुनित मादो।’ 10 सुम्खे थिकापा इसिकाङ जेङहि रो इङको आरोङ सादेलता चुमपुन्हाहि। 11 “इङको दोङ पहर कैसरियासो काता दिङगिलन्हाका सुमि द्याङगेलाइ केलाइ हिका साअ्ता थुकालिलोहि। 12 दोमन मापासिङ एम्बालाइदोफा हानेलि कासेहेङ पुनित हाङसा दोअ्हि। इदोइ तुमि खान्धुरि दादाओनेगेलाइ बुङ काङकोदोफा लोका हिघाखे रो केलाइ झाराङ कर्नेलियसको साअ्ता दुलन्हाहि। 13 वा केलाइहेङ दोअ्हि, एलोङ सादेलचर वाको साअ्ता जाअ्तेङ एसा दोअ्का वा हिङहि, ‘योप्पाता द्याङ दिङगिल्तेङ पत्रुस दोअ्का सिमोनहेङ काइलिदिङगिल। 14 वा नासेहेङ कथन हिम्पावा, जाइसो ना रो नाङको गोताङ खाल बानच्यावा।’ 15 “जेलाउ का धुइलि तेङघा, कोलाउ लाम्फा केलाइर्हुता खुअ्काभाइपाङ पुनित हाङसा एम्बालाइर्हुता बुङ खुअ्हि। 16 कोलाउ प्रभुको दोअ्का इदोइ कथन कासेहेङ फोम जेङहि, ‘युहन्ना ते चिहोइ चिभुअ्लि पिहि, कुलाउ पुनित हाङसासो नेलाइको चिभुअ्लि ज्यावा।’ 17 प्रभु इसु ख्रिस्टता खान्धुर पालाउ परमेस्वर केलाइहेङ जेदोङ बरदान पिहि, नेलाइहेङ बुङ इङकोङ बरदान पिकान्हुअ्सो परमेस्वरहेङ हासु रोकेलि द्वावा कुनु?” 18 इदोइ काथा हिङकान्हुअ्सो एम्बालाइ सिपापा हि रो एसा दोअ्तेङ परमेस्वरहेङ बाखिन्हि, “एला ते परमेस्वर बोजात्यागेलाइहेङ बुङ हेअ्लाइ मासिका ज्यानको भाअ्सिङ कुकरम मानेतेङ घुरिलि बखत पिका हि।” एन्टिओखियाको मन्डलि 19 स्तिफनसहेङ सेअ्कान्हुअ्सो प्रभु इसुता खान्धुर पाकालाइहेङ सान्ताइलि तेङनाङ हेअ्मि खाअ्हि रो हेअ्मि फोनिके माउजाता थुकाहि, हेअ्मि साइप्रस टपु रो हेअ्मि एन्टिओखिया पुरथिकापा बुङ थुकाहि। लाङफोरति एम्बालाइ रेम्काबानाल यहुदिगेलाइहेङ खिनिङ हिङपाहि। 20 कालाउ बुङ हेअ्मि साइप्रस रो कुरेनिको द्याङगेलाइ हिघाखे। एम्बालाइ एन्टिओखियाता लोतेङ ग्रिकगेलाइहेङ बुङ प्रभु इसुको बारेता हिङपाहि। 21 प्रभुको सरबङ एम्बालाइदोफा हिनाङ खान्धुर पाकालाइ हेन्जाङ प्रभुभारि घुरिहि। 22 जेलाउ इदोइ बानाल यरुसलेमता हिका मन्डलिता थुकाहि, एम्बालाइ बारनाबासहेङ एन्टिओखियाता दिङगिल्हि। 23 इङको इन्ता लोतेङ परमेस्वरको निगाहा तिङतेङ लेङचाहि रो एम्बालाइ झाराङहेङ पुराङ कोन्धाङसो प्रभुता खान्धुरि हितेङहिलि हाउसाला पिहि। 24 हाइदोनु बारनाबास रेम्का, पुनित हाङसा रो खान्धुरसो पोङघान्हाका द्याङ हिघाखे रो वासो हेन्जाङ द्याङगेलाइ प्रभुता खान्धुर पाहि। 25 कोलाउ साउलहेङ भोलि बारनाबास टार्ससता हानेहि। 26 जेलाउ वा साउलहेङ दुसुहि कोलाउ वासेहेङ एन्टिओखियाता चुमाहि। इङकोन्हुअ्सो बाअ्सारथिकापाङ इङको न्हेमि मन्डलिको द्याङगेलाइदोफा सङगति पातेङ द्याङगेलाइहेङ बिद्या पिहि। चात्यागेलाइ लाङफोरति एन्टिओखियाता दोङ ख्रिस्टियान दोअ्न्हाहि। 27 इङको पहर आधेमि आगाधुइकालाइ यरुसलेमसो एन्टिओखियाता लोहि। 28 एम्बालाइता अगाबस मिङ हिका एमि जाअ्तेङ, गोताङ दुनियाता बाराका आनिकाल जेङलि तोम्का हि दोअ्का पुनित हाङसासो न्हुअ्सो जेङका काथा धुइहि। इङको आनिकाल क्लौडियसको राजकालता जेङहि। 29 कोलाउ चात्यागेलाइ ताताइको आउकात आन्सार यहुदियाता हिका दादाओनेगेलाइको भाअ्सिङ भेटि पिगिल्लि ठहर पाहि। 30 एम्बालाइको भेटि बारनाबास रो साउलको खुरसो एल्डरगेलाइकोता पिगिल्हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.