३ युहन्ना 1 - धिमाल1 सेउपाखा! का मन्डलिको आगुवा युहन्नासो, काङको मोन्दाताका सानाइति गायसहेङ इदोइ चिथि लेखेदोङखा। नासेहेङ का जातिङको माया पाखा। 2 मोन्दाताका सानाइति, का पुकार पाखा, नाङको खान्धुरि ज्यान रेम्फा हिका भाइपाङ गोताङ काथाता नाङको भाला ज्याको रो नाङको जिउ बुङ रेम्फा ह्याको दोअ्का का भोखा। 3 ख्रिस्टहेङ खान्धुर पाकालाइ हेअ्मि काङकोता लोतेङ कासेहेङ दोअ्हि। ना परमेस्वरको सत दामाता हिगिल्खेना कालाउ जातिङकोङ ना इङको आन्सार दोङ पाखेना दोअ्का हिङतेङ का हेन्जाङ लेङचाघा। 4 काङको चान चामिन्दिगेलाइ सतहेङ पिताइखे दोअ्का लेङचाका काथा हिङलि निङलाउ काङको भाअ्सिङ बो हाइ जेङलि द्वावा कुनु? चाकर पाकालाइहेङ सामर्हाइलि 5 काङको मोन्दाताका सानाइति, ना ख्रिस्टता हिका दादाओने बाइओनेगेलाइहेङ साघाइतेङ खान्धुरलाएक काम तिम्पादोङखेना। कालाउ ना इङको मानाल्का दादाओने बाइओनेगेलाइहेङ बुङ साघाइ दोङखेना। 6 इदोइ दादाओने बाइओनेगेलाइ नाङको मायाको बारेता मन्डलिहेङ दोअ्हि। दायातेङ एम्बालाइहेङ हिगिल्काता साघाइ। एम्बालाइहेङ रेम्फा साघाइन्हा पानु परमेस्वर लेङचावा। 7 हाइदोनु अखान्धुरिगेलाइसो हाइदोङ मार्हुसिङ एम्बालाइ प्रभुको बारेता हिङपालि ओल्हेहि। 8 इदोइभाअ्सिङ इसिका द्याङगेलाइहेङ मानभाउ पालिगोयाङ, कोलाउ केलाइ सतता दोसाङको सानाइति जेङलि द्वाइने। 9 का मन्डलिहेङ हाइदोङ काथा लेखेका हिघाखा। कालाउ नेलाइता बारालि भोका डियोत्रिफस काङको काथा हिङलि माकिअ्खे। 10 जेलाउ का नेलाइकोता ल्वाङका कोलाउ नेलाइ झाराङहेङ डियोत्रिफस केलाइको खिलापता हाइ पाहि, हिसिका मारेम्का काथा पाहि, इङको गोताङ नेलाइहेङ हिङपाङका। इङको खिनिङ माको, इङको बोमुलुकि दादाओने बाइओनेगेलाइहेङ खिलाप पाखे रो एम्बालाइहेङ बान्सा माबुझाइखे। कालाउ एम्बालाइहेङ बान्साबुझाइलि खाङलाउ मन्डलिसोङ बाहार ओल्हे पागिल्खे। 11 मोन्दाताका सानाइति, आखेकाहेङ मापिताइ, कालाउ भालाइहेङ पिताइ। जाइ भालाइ पाखे, इङको परमेस्वरको एइ। जाइ आखेका पाखे, इङको परमेस्वरहेङ नालकाङ मान्थुखे। 12 झाराङ द्याङगेलाइ डेमेत्रियसहेङ रेम्काङ दोअ्खे रो वाको तिङपाका सत ज्यान बुङ इङकोङ दासि पिखे। कालाउ केलाइ बुङ दासि पिन्हाखे रो ना बुङ गेखेना केलाइको दासि सत हि। आखिर सेउपाका 13 का नासेहेङ हेन्जाङ काथागेलाइ दोअ्लि हिलाउ बुङ इदोइ चिथिता गोताङ काथा लेखेलि माभोखा। 14 का ना दोफा मारफाङ दुसुलि आस पाखा। इङको पहर केलाइ दोसाङ योम्तेङ काथा पालि द्वाङ। 15 नासेहेङ सुबिस्ता ज्याको। इता हिका सानाइतिगेलाइ बुङ नेलाइहेङ सेउपाका पिगिल्का हि। कालाउ इन्ता हिका सानाइतिगेलाइहेङ सेउपाका हिङपापि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.