2 तिमोथि 4 - धिमालरेम्काबानाल हिम्पाका जिमा 1 सिन्हुका रो सिका झाराङ द्याङगेलाइको निया पालि रो झाराङ र्हुता राजपालि लोका ख्रिस्ट इसु रो परमेस्वरको आगाता का नासेहेङ हुकुम पिखा, 2 परमेस्वरको रेम्काबानाल पारचार पा, पहर हिलाउ बुङ मान्थुलाउ बुङ रेम्काबानाल पारचार पालि त्यार जेङ रो एम्बालाइहेङ बिद्या पिलाउ सान्तिहोइ साम्झाइ रो हाउसाला पि। 3 हाइपानु एला द्याङगेलाइ जातिङको बिद्याहेङ सहेतेङमासहेका पहर बुङ लोदोङखे। एम्बालाइ ते ताइकोङ लाल्सागेलाइको न्हु लाग्यावा। एम्बालाइ ताइमिहेङ माजा लागेका काथा हिङपाका मास्टरगेलाइहेङ दोङ हेन्जा कायावा। 4 एम्बालाइ ते सत काथागेलाइहेङ हिङतेङ माहिनावा कालाउ निङका काथागेलाइ हिङलिचाहिँ मोन्दाताकावा। 5 कालाउ नाचाहिँ गोताङ काथाता बोल्याका जेङतेङ हि। तु: सहेका जेङ, रेम्काबानाल पारचार पा रो परमेस्वर नासेहेङ पिका गोताङ कामको जिमा पोङघा पा। 6 हाइदोनु का ते परमेस्वरको भाअ्सिङ भोक जेङलि तोम्का हिघा रो काङको इदोइ ज्यान लाअ्का पहर लोलि दोका हि। 7 का रेम्फा खान्धुरको धुम फेअ्सुका हिघा, ताइको धाअ्का दोपाका हिघा रो खान्धुरहेङ जोगाइतेङ ताअ्का हिघा। 8 एला ते परमेस्वरको आगा उचित ठार्हाइन्हाका ताज खिनिङ निङलि दाइका हि। उचित निया पाका प्रभु दोङ कासेहेङ वा लोका दिना इङको सिरपेच बिङपाप्यावा। कासेहेङ खिनिङ माको, वाको दामा खाङका झोको झाराङहेङ दोङ इङको बिङपाप्यावा। ताइको काथागेलाइ 9 दोकाझोको कासेहेङ मारफाङ दुसु। 10 डेमास इदोइ दुनियाहेङ माया पातेङ कासेहेङ लाअ्तेङ थेसलोनिकेता हानेहि। कालाउ परमेस्वरको काम पालिको भाअ्सिङ क्रेसेन्सचाहिँ गलातियाता रो तितसचाहिँ दलमातियाता हानेका हि। 11 कादोफा ते एला लुका खिनिङ हि। मर्कुसहेङचाहिँ दोसाङ चुमतेङ लो। इङको काङको कामता साघाइलि द्वावा। 12 तुखिकसहेङ का एफिससता दिङगिल्का हिघा। 13 त्रोआस पुरता हिका कारपस दोअ्का द्याङको साअ्ता लाअ्धिका काङको गुअ्का धाबा ना लोलाउ चुमतेङ लो कालाउ इन्ता हिका किताबगेलाइ रो धालेता लेखेन्हाका किताबगेलाइचाहिँ मानिल्सिङ पिपा। 14 ताम्बाको तासाला भान्दाको काम पाका अलेक्जेन्डर कासेहेङ हेन्जाङ मारेम्का पाहि। इङकोको पाका कामको फल प्रभु दोङ इङकोहेङ प्यावा। 15 इङको केलाइको काथाको हेन्जाङ बाइरि जेङका हि। एन्सा जेङलाउ ना बुङ होस पातेङ हि। 16 लाङ खेप काङको मुदा चलेलाउ हासु बुङ काङको पछेता माधुइहि रो झाराङ कासेहेङ लाअ्हि। याको दुस एम्बालाइहेङ मालाग्याको। 17 कोलाउबुङ प्रभु दोङ काङको दोसा हितेङ कासेहेङ सरबङ पिहि। एन्साङ का बो जात्याको द्याङगेलाइहेङ परमेस्वरको रेम्काबानाल रेम्फा हिङपालि दोघा। एसापा वा कासेहेङ सिकासो सिन्हुपाहि। 18 प्रभु दोङ कासेहेङ गोताङ खाल्को आखेकागेलाइसो सिन्हुपावा। वा कासेहेङ जोगाइतेङ ताइको सादेलको सारभिता चुमप्वावा। वाको दिनाङ प्रताप हितेङह्याको। आमेन। आखिर सेउपाका 19 प्रिस्कला, अकिलास रो ओनेसिफरसको साअ्को जाहानगेलाइहेङ काङको सेउपाका हि। 20 इरास्तस कोरिन्थता दोङ हिका हि। त्रोफिमस मासाअ्धेका जेङका हिनाङ इङकोहेङ का मिलेटसता दोङ लाअ्धिघा। 21 चुङदिङ लोलि मानिङसिङ मारफाङ लो। युबुलस, पुडेस, लिनस, क्लौडिया रो इता हिका झाराङ खान्धुरिगेलाइ नासेहेङ सेउपाका पिगिल्का हि। 22 प्रभु नाङको हाङसादोफा ह्याको। नेलाइता परमेस्वरको निगाहा ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.