2 तिमोथि 3 - धिमालआखिरि दिनागेलाइ 1 आखिरि दिनागेलाइता तु:को पहर ल्वावा दोअ्तेङ नेलाइ गितेङ हिसु। 2 इङको पहरको द्याङगेलाइ ताइमिङहेङ खिनिङ दायाका, टाकाकाउरिको लाल्चा पाका रो ताइमिहेङ बाराका फोमपाका, तुजुक रो बादनामि पाका ज्यावा। एम्बालाइ ताइको आबाआमाइहेङ मासाअ्का, अपगुनि, अपुनित जेनावा। 3 हासुहेङ माया मापाका, निथुरि, एन्साङ चुक्लि चुका, फुका, थिलिगोइका, रेम्का काथा मोन्दामाताका जेनावा। 4 एम्बालाइ बोमिहेङ छल पातेङ, मनमानि पातेङ तुजुकहोइ फुलितेङ हिगिलावा रो परमेस्वरहेङ माया पाका खान्तेङ भुरुङ मोजमजा दोङ मोन्दा ताकावा। 5 एम्बालाइ धरमाति तिङपालि ते भोखे कालाउ वाको सरबङहेङ चाहिँ मार्हुखे। इसिका द्याङगेलाइसो बुङ ना फारापाङ हि। 6 एम्बालाइको माझाता हेथे द्याङगेलाइ साअ्साअ्ता हानेतेङ कुकरमकुकरमहोइ रो कुकरमकोङ लाल्सा ताअ्का बेबाल द्याङगेलाइहेङ ताइको बसता ताअ्तावा। 7 इङको बेबाल द्याङगेलाइ धिरनु ते दिनाङ दोङ धिरतेङहिखे, कालाउ सतहेङ हेअ्लाउ नाल्लि माद्वावा। 8 यान्नेस रो याम्ब्रेस जेसापा मोसाको खिलाप पाका हिघाखे, एन्सा दोङ इदोइ द्याङगेलाइ बुङ सतको खिलाप पावा। एबालाइको ते आकिल दोङ बिगिरका हि रो खान्धुरदोङ राम्पाका हि। 9 कालाउ एम्बालाइ दिनाङ एसा पातेङहिलि माद्वावा हाइदोनु यान्नेस रो याम्ब्रेसको भाइपाङ दोङ एम्बालाइको निर्बुदि झाराङ दोङ ग्यावा। आखिरि बिद्यागेलाइ 10 कालाउ ना चाहिँ काङको बिद्या, काङको आनिबानि रो बिचारहेङ र्हुका हिना। काङको खान्धुर, सहेका सरबङ, दाया रो धिरताहेङ तिङकाङ हिन्हा। 11 एन्टिओखिया, आइकोनियन रो लुस्त्राता काङको भोगेका तु: ना रेम्फा गेका हिन्हा। कालाउ प्रभु दोङ कासेहेङ इङको गोताङ बिपतगेलाइसो सिन्हुपाहि। 12 ख्रिस्ट इसुको चाकर जेङतेङ ज्यान दोपालि भोकालाइहेङ सान्ताइका ते लोतेङसाङ ह्यावा। 13 आसाति रो ठगेकागेलाइ चाहिँ बोमिहेङ ठग्याङका दोअ्लाउ ताइमिङ ठगेन्हातेङ एम्बालाइ झनझन बिगिरतेङ हानावा। 14 कालाउ नाचाहिँ ताइको बिद्या निङतेङ खान्धुर पाका सतता लागेतेङहि। हासुहासुसो ना बिद्या निङन्हा, इदोइ ना ताइमिङ गेखेना। 15 ना आतुइनाङसो पुनित धरमकिताबको काथागेलाइ गिका हिन्हा। इदोङ काथाहोइ ख्रिस्ट इसुता खान्धुर पालाउ निङका छुटकाराबारे गिका आकिल पिखे। 16 इदोइ गोताङ धरमकिताब परमेस्वरसो लोका हिनाङ इदोइ धिरपालि, आरति पिलि, साच्याइलि रो धरमाति द्याङ जेङलिको भाअ्सिङ तालिम पिलि हेन्जाङ रेम्का हि। 17 परमेस्वरको द्याङगेलाइ गोताङ रेम्का कामगेलाइ पालि दोका ज्याको दोअ्तेङ दोङ धरमकिताब पिका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.