2 तिमोथि 2 - धिमालइसु ख्रिस्टको रेम्का सिपाल्हाइ 1 काङको चान तिमोथि, नाचाहिँ ख्रिस्ट इसुको पिका निगाहाहोइ बोल्याका जेङ। 2 का नासेहेङ हेन्जाङ द्याङगेलाइको आगाता पिका बिद्या बो धिरपालि दोका खान्धुरि द्याङगेलाइहेङ जिमा पि। 3 ख्रिस्ट इसुको रेम्का रो जातिङको सिपाल्हाइ जेङतेङ ना बुङ तु: ल्होपा। 4 पल्टनता भार्ना जेङका सिपाल्हाइ ताइको हाकिमहेङ लेङचा पालि बो कामता माआवाइ पाखे। 5 एन्साङ पातेङ घाकाता भाग र्हुकालाइ घाकाको नियमहेङ साअ्तेङ घानु खिनिङ इङको इनाम निङलि द्वावा। 6 भेम्ति ह्याअ्पातेङ मिलिङ चोइतेङ थिङकालाइ दोङ बालिको लाङ आसि निङलि गोयाङ। 7 काङको दोअ्का इदोइ काथागेलाइ सोम पा। हाइदोनु प्रभु दोङ नासेहेङ इदोइ गोताङ काथागेलाइ गिका सरबङ प्यावा। 8 ख्रिस्टहेङ फोम पा, वा सिकासो सिन्हुहि। वाचाहिँ राजा दाउदको बङसावलि हिघाहि, का पारचार पाका रेम्काबानाल इदोइ दोङ। 9 इङकोङ रेम्काबानाल पारचार पाका हिनाङ का तु: भोगेका। इङकोझोको खिनिङ माको, आपराधि भाइपाङ झिन्जिरिता धेउन्हातेङ का थुना निङचाका हिघा। कालाउ रेम्काबानालचाहिँ थुनिन्हाका मान्थु। 10 इदोइभाअ्सिङ परमेस्वरको साल्का वाको द्याङगेलाइको भाअ्सिङ ख्रिस्ट इसुसो निङका छुटकारा रो हेअ्लाउ बुङ माओताका प्रताप निङलि द्वाको दोअ्तेङ का इदोइ तु: भोगेदोङखा। 11 इदोइ धुइका काथागेलाइ जातिङको: “केलाइ वाकोदोफाङ सिन्हाहि पानु, आरोङ केलाइ वादोफाङ सिन्हुताङ। 12 केलाइ तु: सह्याङ पानु, वाकोदोफाङ राज पाङ। केलाइ वासेहेङ इन्कार पानु, वा बुङ केलाइहेङ इन्कार पावा। 13 केलाइ अखान्धुरि हिन्हाहि पानु, वा खान्धुरिहिका हितेङह्यावा। हाइपानु वा ताइमिहेङ इन्कार पालि माद्वावा।” न्हे खालको मास्टरगेलाइ 14 इदोइ काथाता नाङको द्याङगेलाइहेङ साम्झाइ। काथाङ काथाता चेरसुका काम मापासु दोअ्तेङ एम्बालाइहेङ परमेस्वरकोङ आगाता चेतानि पि। चेरसुकासो ते हाइदोङ लाभ माजेङखे कालाउ हिङका द्याङगेलाइहेङ दोङ बिगिरपाखे। 15 लेदेरलि मागोइका रो सतको बानालहेङ उचितसो चालाइका चाकरभाइपाङ परमेस्वरहेङ मोन्दाताका पातेङ वाको आगाता वाकोङ काथा धुइलि त्यार हितेङहिलि चेस्ता पा। 16 दुनियाको निरबुदि काथागेलाइसो पान्साइन्हातेङ हि। इदोइ ते द्याङगेलाइहेङ परमेस्वरसो झनझन दुरे थुकापाखे। 17 इन्सिका बिद्या आइतेङ बार्हेतेङ हानेका पेचाराभाइकाङ जेनावा। एम्बालाइता हुमेनियस रो फिलेतसको बिद्या बुङ इसिकाङ हि। 18 एबालाइ सतहेङ लाअ्का हि रो सिकासो सिन्हुका काम लाम्फा दोङ जेङहोइ। एला माज्याङ दोअ्का बिद्या धिरपातेङ एम्बालाइ हेअ्मिको खान्धुर दोङ बिगिरपापिहि। 19 कालाउ परमेस्वर ताइमिङ लागाइका जग दिनाङ बोल्याका जेङतेङ हितेङह्यावा। इदोइता लेखेन्हाकाङ हि, “प्रभु ताइकोगेलाइहेङ नाल्खे” रो “परमेस्वरको मिङ र्हुका झोको झाराङ आखेका कामसो फारापाङ ह्याको।” 20 हिकाचाकाको साअ्ता खाल खालको भान्दागेलाइ हिखे। इन्ता रुपाको रो सोनाको खिनिङ माको लकरिको रो भोनोको भान्दागेलाइ बुङ हिखे। हिदिङहिदिङ भान्दागेलाइ आदरहिका कामता चालाइन्हाखे रो हिदिङ भान्दागेलाइ चाहिँ अनादरहिका कामता चालाइन्हाखे। 21 गोताङ काथा आखेका कामगेलाइसो पुनित जेङतेङ हिका द्याङ हि पानु बाराका मानको भान्दा भाइपाङ ज्यावा। हाइदोनु इङको ते ताइमिङहेङ पुनित ताअ्तेङ गोताङ रेम्का कामको भाअ्सिङ गिर्हि चालाइलि द्वावा। 22 इदोइभाअ्सिङ बोइसाता लोका मारेम्का लाल्सागेलाइहेङ लाअ्तेङ पुनित मनहोइ परमेस्वरदोफा साहेता र्हेतेङ वासेहेङ काइकालाइदोफा वाको आगाआगा उचित ठर्हाइन्हाका काथाता खान्धुर, दाया रो सान्तिता हि। 23 कालाउ काम मालागेका बादबिबादसो फारापाङ हि। ना दोङ गेखेना, इदोइसो ते चेरसुका खिनिङ जेङखे। 24 प्रभुको चाकर चेरसुलि माएल। इङको झाराङदोफा मिलिका हिलिगोयाङ कालाउ बिद्या धिरपालि दोका रो गोताङ काथा सहेलि दोका जेङलिगोयाङ। 25 इङको बिरोधिगेलाइहेङ नोइका जेङतेङ साम्झाइलि दोका हिलिगोयाङ। एन्सा जेङहि पानु खिनिङ परमेस्वर बाइरिगेलाइको मन फेरेपिलि द्वावा रो एम्बालाइ सतहेङ नालावा। 26 एसापा एम्बालाइ ताइको हुसता लोतेङ दियाबलसको आस्तिसो खाअ्लि निनावा। हाइदोनु एम्बालाइहेङ दियाबलस ताइको कामको भाअ्सिङ रिम्तेङ ताअ्का हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.