Biblia Todo Logo
Bìoball air-loidhne

- Sanasan -

2 तिमोथि 1 - धिमाल

1 परमेस्‍वरको लाल्‍साहोइ ख्रिस्‍ट इसुता हिका ज्‍यानको कबोलको बारेता हिङपालिको भाअ्‌सिङ का पावल ख्रिस्‍टको साल्‍तेङ दिङगिल्‍का जेङका।

2 काङको जातिङको चान तिमोथिहेङ इदोइ चिथि लेखेदोङखा। परमेस्‍वर आबा रो केलाइको प्रभु इसु ख्रिस्‍ट नासेहेङ निगाहा, दाया रो सान्‍ति प्‍याको।


च्‍याबास रो आट

3 काङको आबाखालगेलाइ चाकर पाका भाइपाङ का बुङ सुदो आकिलहोइ परमेस्‍वरको चाकर पाखा कालाउ का नितिमन्‍हिसिङ पुकार पालाउ दिनाङ नासेहेङ फोमपातेङ परमेस्‍वरहेङ च्‍याबास चार्‍हाइखा।

4 नाङको खारका फोमपातेङ नासेहेङ हेथे दुसुलि मन जेङखे। नासेहेङ दुसुलि निङनु का हेथे लेङचाधाङका।

5 कासेहेङ नाङकोता हिका इङको जातिङको खान्‍धुरको फोम एला बुङ लोतेङ हिखे। नाङको आजाइ लोइसता रो आमाइ युनिसता जातिङको खान्‍धुर हिघाहि। नाता बुङ इन्‍सिकाङ जातिङको खान्‍धुर हिका कासेहेङ फोम हि रो एला बुङ नाता इन्‍सिकाङ खान्‍धुर हि दोअ्‌का का खान्‍धुर पाखा।

6 इदोइभाअ्‌सिङ का नासेहेङ आरोङ फोम पापातेङ दोअ्‌खा, का नार्‍हुता खुर ताअ्‌लाउ परमेस्‍वरको पिका बरहेङ ना बाहेतेङ हि।

7 हाइदोनु परमेस्‍वर केलाइहेङ थिकाको हाङसा माको कालाउ सरबङ, माया कालाउ ताइमिङहेङ आधिनता ताअ्‌का हाङसा पिका हि।

8 एन्‍साङ केलाइको प्रभुको दासि पिलि रो का वाको भाअ्‌सिङ थुना निन्‍चाकाता मालेदेर भुरुङ ना बुङ परमेस्‍वरको सरबङता रेम्‍काबानाल हिङपालि तु: ल्‍होपा।

9 परमेस्‍वर दोङ केलाइहेङ सिन्‍हुपातेङ ताइकोङ द्‍याङ जेङलि काइहि। केलाइको पाका कामहोइ माको, कालाउ वाको ताइकोङ बिचार रो निगाहाहोइ केलाइहेङ ताइको बान्‍हाइलि काइहि। सिरजाइ खान्‍तेङ लाम्‍फा दोङ केलाइहेङ ख्रिस्‍ट इसु इदोइ निगाहा पिका।

10 जेदोङ निगाहा केलाइहेङ छुटकारापिका प्रभु इसु ख्रिस्‍ट लोकान्‍हुअ्‌सो देखाल जेङका। वा दोङ सिकाहेङ मुअ्‌पाहि रो रेम्‍काबानालसो हेअ्‌लाउ मासिका ज्‍यान तिङपाहि।

11 परमेस्‍वर कासेहेङ इदोङ रेम्‍काबानाल हिङपालि पारचारपाका, साल्‍तेङ दिङगिल्‍का रो मास्‍टर जेङलि खाटाइका।

12 इदोइभाअ्‌सिङ का इदोइ काथागेलाइता तु: भोगेदोङखा। कालाउ का इदोइता मालेदेरखा हाइदोनु का हासुता खान्‍धुर पाका हिघा इङको का गेखा। परमेस्‍वर कासेहेङ जिमा लागाइका काथाहेङ वा दोङ ख्रिस्‍ट मालोपाधाउ जोगाइतेङ ताअ्‌तावा। इदोइता का ढुक हिघा।

13 का नासेहेङ पिका जातिङको बिद्‌यागेलाइ नामुनाको आकारता ख्रिस्‍ट इसुता हिका खान्‍धुर रो मायाता जोगाइतेङताअ्।

14 नाङको जिमाता पिका रेम्‍का काथागेलाइहेङ केलाइलिअ्‌ताङ बासा हिका पुनित हाङसाको सरबङहोइ जोगाइतेङताअ्।

15 नाआङ दोङ गेखेना, एसियाता हिका झाराङ कासो खेङन्‍हातेङ हानेहि रो एम्‍बालाइता फुगेलस रो हर्मोगेनस सुदाङ कासेहेङ लाअ्‌हि।

16 ओनेसिफरसको जाहानता प्रभुको दाया ह्‍याको हाइदोनु इङको कासेहेङ हेन्‍जाङ खेप हाउसाला पिहि। कालाउ का थुनाता झिन्‍जिरिता धेउन्‍हातेङ हिलाउ बुङ इङको मालेदेरहि।

17 कालाउ इङको रोमता लोतेङसाङ कासेहेङ भोकाभोकाङ पाहि रो दुसुहि।

18 ख्रिस्‍ट लोका दिनाता प्रभुसो इङको निगाहा निङलि द्‍वाको। एफिससता हिलाउ इङको कासेहेङ हेथे काथाता साघाइका हिघाखे इङको बुङ ना गेखेना।

© 2024 (Active), Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan