2 थेस्लोनिकि 3 - धिमालपुकारको भाअ्सिङ बिनए 1 आखिरता दादाओने बाइओनेगेलाइ, केलाइको भाअ्सिङ पुकार पापिसु, एसा पानु नेलाइको माझाता हिकाभाइपाङ प्रभुको रेम्काबानाल चारबितिङ मारफाङ चारचाराइतेङ याको मान ज्यावा। 2 बिगिर्का रो दुरजन द्याङगेलाइसो केलाइ छुटकारा निङलि द्वाको दोअ्तेङ पुकार बुङ पासु, हाइपानु हेन्जाङ द्याङगेलाइ रेम्का बानालता खान्धुर मापाखे। 3 कालाउ प्रभु खान्धुरलाएक हिनाङसिङ दोङ वा नेलाइहेङ बोल्याका बान्हायावा, कालाउ दियाबलससो बान्चेपावा। 4 केलाइको दोअ्का भाइपाङ नेलाइ पादोङसुखेना रो पातेङ बुङ हिस्वाना दोअ्तेङ केलाइ नेलाइको भाअ्सिङ प्रभुता दोङ भर पाका हिन्हाहि। 5 परमेस्वर नेलाइहेङ पाका माया रो ख्रिस्टको सहेका सरबङ गेलिको भाअ्सिङ नेलाइ प्रभुसोङ थोङगिलन्हाका जेङसु। कुर्ह्याहेङ चेतानि 6 दादाओने बाइओनेगेलाइ, प्रभु इसु ख्रिस्टको मिङता केलाइ नेलाइहेङ हुकुम पिन्हाखे। केलाइको धिरपाका बिद्या मासाअ्का रो कुर्ह्या लुका द्याङगेलाइसो दुरे हिसु। 7 हाइपानु नेलाइदोफा हिलाउ केलाइ कुर्ह्या लुतेङ माहिन्हाहि। केलाइ पाकाभाइपाङ पालिगोयाङ दोअ्का काथा ते नेलाइ ताइमिङ गेसुखेना। 8 केलाइ नेलाइहेङ तु: माज्याको दोअ्तेङ नितिमन्हिसिङ मादोअ्सिङ काम पान्हाहि। कालाउ टाका मातिरिसिङ केलाइ हासुङकोता माचान्हाहि। 9 नेलाइ दोङ केलाइको खारचा बारचा बेहोरेलि गोइस्वाना दोअ्का हक मान्थुतेङ माको, कालाउ केलाइको बेभार नेलाइको भाअ्सिङ एलोङ उपमा ज्याको दोअ्तेङ केलाइ एन्सा पान्हाहि। 10 नेलाइदोफा हिलाउ केलाइ नेलाइहेङ लाम्फाङ दोअ्का हिघान्हाहि, “जाइ काम मापाखे इङको मामाचाको।” 11 केलाइ हिङन्हाखे, नेलाइता आधेमि कुर्ह्या जेङतेङ काङको मिङता खिरिन्जा बुङ माथुर्का हिसुन्हा आङ, कालाउ इन्सिकालाइ बोमिको कामता आवाइ पागिल्खे आङ। 12 केलाइ इन्सिकालाइहेङ प्रभु इसु ख्रिस्टको मिङता चेतानि पितेङ दोअ्दोङन्हाखे, “एम्बालाइ सिपापा ताइको काम पाको रो ताइको हेमुङ भेलपालि ताइमिङ कामायाको।” 13 दादाओने बाइओनेगेलाइ, कालाउ नेलाइचाहिँ बोमिको भालाइ पालि हेअ्लाउ मालाअ्सु। 14 नेलाइता हासुङ केलाइ इदोइ चिथिता लेखेका बिद्यागेलाइ मासाअ्खे पानु, इन्सिकालाइहेङ रेसेतेङ इन्सिकालाइदोफा सङगत दोङ मापासु। एदि नेलाइ एन्सा पासुन्हा पानु इन्सिकालाइ तामिङ लेदेरावा। 15 कालाउबुङ इन्सिकालाइहेङ नेलाइको दुस्मन भाइपाङ बेभार मापासु रो नेलाइको ताइकोङ दादाओने बाइओने भाइपाङ फोमपातेङ चेतानि पिसु। आखिरि सेउपाका 16 केलाइहेङ सान्ति पिका प्रभु ताइमिङ नेलाइहेङ जेलाउबुङ गोताङ काथाता सान्ति प्याको। कालाउ नेलाइ झाराङदोफा प्रभु हितेङ ह्याको। 17 का पावल, ताइकोङ खुरहोइ इदोइ सेउपाका लेखेदोङखा। काङको चिथिहेङ नाल्पाका जुक्ति इदोङ, का चिथि लेखेलाउ एसाङ पातेङ दोङ लेखेखा। 18 केलाइको प्रभु इसु ख्रिस्टको निगाहा नेलाइ झाराङदोफा ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.