2 थेस्लोनिकि 2 - धिमालकुकरमि द्याङ 1 दादाओने बाइओनेगेलाइ, केलाइको प्रभु इसु ख्रिस्ट लोकाको बारेता रो वासेहेङ दुसुलि केलाइ एदोसा जोम्का बारेता नेलाइहेङ बिम्ति पान्हाखे, 2 एदि हासुङ हिदिङ बुङ आगाधुइ, धुइका काथा माकोनु लेखेन्हाका काथासो प्रभु लाम्फा दोङ लोलि दोका हि दोअ्तेङ दोअ्खे पानु इङको काथा केलाइसो लोका फोमपातेङ नेलाइ सुरता मापासु रो माथिसु। 3 कालाउ हासुङ नेलाइहेङ हिदिङ खाल्सो छलपालि मानिनाको। हाइदोनु परमेस्वरको खिलापता बाराका हुलदाङगा माजेम्पाधाउ रो मुअ्लिगोइका नियम मासाअ्का द्याङ मालोपाधाउ प्रभुको इङको दिना माल्वावा। 4 इङको नियम मासाअ्का द्याङ ताइमिङ बारातेङ द्याङगेलाइ परमेस्वर थानेका गोताङ काथागेलाइहेङ रो पुजिका गोताङ थोकको खिलाप पावा। इङको ते परमेस्वरको थानता योम्तेङ ताइमिहेङ परमेस्वर दोअ्तावा। 5 का नेलाइदोफा हिलाउ दोङ इदोइ काथागेलाइ दोअ्का हिघाखा, हाइ नेलाइ निल्सुहोइना? 6 इङकोको पहर जेङकान्हुअ्सो इङको नियम बिनास पाका देखाल ज्यावा। इङकोहेङ हिदि काथाहोइ एला थिकापा रोकेतेङताअ्का हि, इदोइ काथा ते नेलाइ दोङ गेसुखेना। 7 हाइपानु नियम मासाअ्का ताइको सरबङको काम लिअ्तालिअ्ताङ सुरु पालिदोका हि। कालाउ इङकोहेङ थामेतेङ ताअ्का सरबङ मालाअ्न्हापाधाउ याको आसाति कामगेलाइ बाहार मातिन्हावा। 8 इङकोन्हुअ्सो नियम मामानेका देखाल ज्यावा, प्रभु इसु ख्रिस्टको नुइको हुसिहोइ रो वा लोलाउ ताइको जोल्का सरबङहोइ इङकोहेङ मुअ्पावा। 9 इङको नियम मासाअ्का दियाबलसको सरबङदोफा ल्वावा रो इङको गोताङ खाल्को असत चिनो रो भारभुसाइका कामगेलाइ पावा। 10 इङको मुअ्कालाइ झोको झाराङहेङ इङकोको आसाति कामहोइ आवाइपावा, हाइपानु एम्बालाइ छुटकारा पिका सतहेङ मोन्दा माताहि। 11 इदोइभाअ्सिङ एम्बालाइ असत काथाता दोङ खान्धुर पाको दोअ्तेङ परमेस्वर आवाइपाका सरबङहेङ दिङगिलावा। 12 हाइदोनु एम्बालाइ सतहेङ खान्धुर मापासिङ आसाति काम पालि मोन्दाताकालाइ एम्बालाइहेङ दार पिलिको भाअ्सिङ दोङ परमेस्वर एसा पाका। खान्धुरता बोल्याका जेङका काथा 13 प्रभुको माया पाका दादाओने बाइओनेगेलाइ, नेलाइको भाअ्सिङ केलाइ परमेस्वरता दिनाङ च्याबास चार्हाइलिङ गोयाङ, हाइपानु लाम्फासो दोङ पुनित हाङसाको पुनित पाका कामसो रो सत बानालको खान्धुरसो छुटकाराको भाअ्सिङ परमेस्वर नेलाइहेङ साल्हि। 14 याकोङ भाअ्सिङ केलाइको हिङपाका रेम्काबानालसो परमेस्वर नेलाइहेङ काइहि। एन्साङ पातेङ नेलाइ केलाइको प्रभु इसु ख्रिस्टको प्रताप निङलि दोस्वाना। 15 इदोइभाअ्सिङ दादाओने बाइओनेगेलाइ, नेलाइ खान्धुरता बोल्याका जेङतेङ हिसु रो केलाइको दोअ्का माकोनु लेखेका बिद्या सत हि दोअ्तेङ खान्धुर पातेङ हिसु। 16 केलाइको प्रभु इसु ख्रिस्ट रो परमेस्वर आबा केलाइहेङ माया पाहि। कालाउ वाको निगाहासो हेअ्लाउ मादोका हाउसा रो रेम्का आस प्याको। 17 वा दोङ गोताङ रेम्का काथागेलाइ पालि रो दोअ्लिको भाअ्सिङ हाउसा रो सरबङ प्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.