२ पत्रुस 3 - धिमालप्रभुको दिना 1 मोन्दाताकालाइ, नेलाइहेङ लेखेका इदोइ काङको न्हे चिथि एइ रो लाङ चिथि भाइपाङ इदोइ चिथिता बुङ नेलाइहेङ हेन्जाङ काथागेलाइको फोम पापातेङ हाउसाला पिका हिघा। 2 लाङफोरतिको पहरता पुनित आगाधुइकालाइ दोअ्का काथा रो नेलाइको प्रेरितगेलाइसो पिका प्रभु रो छुटकारा पिकाको हुकुमहेङ नेलाइ फोम पासु। 3 झाराङखान्तेङ लाम्फा नेलाइ इदोइ काथा गिलि गोइस्वाना, आखिरि दिनागेलाइता निन्दा पाकालाइ निन्दा पातेङ रो एम्बालाइको ताइकोङ दुरजन लाल्साता एसा दोअ्तेङ ल्वावा, 4 “हाइ ख्रिस्ट ल्वाङका दोअ्तेङ कबोल पाका माको कुनु? केलाइको आबा खालगेलाइ सितेङ हानेलि दोहोइ, कालाउ बुङ दुनिया सिरजाइसो चलितेङ लोका भाइपाङ एला बुङ हिदोङहि।” 5 एम्बालाइ गिका गिकाताङ बुङ सिरजाइको काथा मागेपा भाइपाङ पाखे। हाइदोनु परमेस्वरको ताइकोङ कथनसो दोङ सादेल रो सुमिङ सिरजाइहि। कालाउ सुमिङहेङ चिसो बान्हाइहि रो चिसोङ खेङहि। 6 इङको पहरको दुनिया चिता डुबितेङ मुअ्का जेङहि। 7 कालाउ इङकोङ कथनहोइ परमेस्वरहेङ मासाअ्का द्याङको निसाप रो बिगारको दिनाथिकापाको भाअ्सिङ एलाको आदेल रो सुमिङ मेको भाअ्सिङ जोगाइतेङ ताअ्का हि। 8 मोन्दाताकालाइ, इदोइ एलोङ काथा मानिल्सु, प्रभुको भाअ्सिङ ए दिना हाजार बाअ्सारझोको रो हाजार बाअ्सार ए दिनाझोको ज्यावा। 9 ताइको कबोलको बारेता प्रभु बेलोमखे दोअ्का हासुङ हासुङको कथन हिलाउ बुङ वा बेलोम मापाखे। कालाउ हासु बुङ मामुअ्ताको रो झाराङ पछुतो पाको दोअ्का लाल्सा पातेङ प्रभु नेलाइहेङ धिर जेङतेङ र्हुमतेङ हि। 10 कालाउ प्रभुको नियपाका दिना ते खुकाभाइपाङ सिपापा ल्वावा। आदेलचाहिँ बाराका गाला पातेङ रामावा। आदेलता हिका बेला, तालि रो फुरुगेलाइ मेको रापसो गाल्यावा। सुमिङ रो इन्कोता हिका गोताङ थोक बुअ्सिरि ज्यावा। 11 इदोइ गोताङ काथागेलाइ एसापा गाल्यावा दोअ्का गेतेङ पुनितता रो परमेस्वरहेङ लेङचापाका ज्यानता नेलाइ हिसिका खाल्को द्याङ हिलि गोयाङ दोअ्तेङ बिचार पासु। 12 नेलाइ परमेस्वरको निसापको दिना र्हुमतेङ हिलाउ इङको दिना मारफाङ ज्याको दोअ्तेङ पालि गोइका काम पासु। जेदोङ दिना आदेलगेलाइ ओअ्तेङ बुअ्सिरि ज्यावा रो आदेलता हिका बेला, तालि रो फुरुगेलाइ मेको रापता गाल्यावा। 13 कालाउ वाको कबोल आन्सार केलाइ नावा सादेल रो नावा सुमिङको दामा खाङन्हाखे, जाइता धरमाति बासा ह्यावा। 14 इदोइखातिर मोन्दाताकालाइ, नेलाइ इदोइ काथाहेङ र्हुमकालाइ हिनाङसिङ, वाको नजरता नेलाइ दागा माकोनु दुस मान्थुकालाइ रो सान्तिता हिलि बल पासु। 15 केलाइको प्रभुको धिरताहेङ छुटकाराभाइपाङ फोमपासु। केलाइको मोन्दाताका, ओने पावल बुङ वासेहेङ पिन्हाका आकिलआन्सार नेलाइहेङ इदोङ काथा लेखेहि। 16 वाको गोताङ चिथिगेलाइता बुङ वा इदोइ काथागेलाइ बाखान पाका हि। इङकोता हिदिङहिदिङ काथागेलाइ गेलि मुसकिल हि। काथा माबुझिका रो खान्धुरता लुरमान्थुका द्याङगेलाइ इदोइ काथागेलाइहेङ बो धरम किताबगेलाइहेङ भाइपाङ उल्टापाल्ति पाखे रो ताइकोङ बिगार चुमाखे। 17 मोन्दाताकालाइ, लाम्फासोङ इदोइ काथा गेतेङ हुसपातेङ हिसु। आसाति द्याङगेलाइको माजेङका काथाता आवाइतेङ ताइको धिरता माराम्पासु। 18 कालाउ केलाइको प्रभु रो छुटकारापिका इसु ख्रिस्टको निगाहा रो आकिलता बार्हेतेङ हानेसु। वासेहेङ एला रो दिनादिनाङ प्रताप ज्याको। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.