२ पत्रुस 2 - धिमालअसत मास्टरगेलाइ 1 लाम्फालाम्फा जेसापा इस्राएलिगेलाइको माझाता असत आगाधुइकालाइ बुङ हिघाखे, एन्साङ पातेङ नेलाइको माझाता असत मास्टरगेलाइ जाअ्तावा। एम्बालाइ सिपापा मुअ्पाका असत बिद्यागेलाइ चुमावा रो ताइमिहेङ छुटकारा पिका प्रभुहेङ सुदाङ लाअ्वा। कालाउ ताइमिङर्हुता मारफाङ मुअ्का चुमावा। 2 हेन्जाङ द्याङगेलाइ एम्बालाइको लेदेरपाका मारेम्का दामा पितायावा। कालाउ एम्बालाइको कामहोइ पातेङ सतको दामाको बुङ बादनामि ज्यावा। 3 लोभलालचता वालातेङ इङको असत मास्टरगेलाइ काथा बान्हाइतेङ दोङ नेलाइसो लाभ र्हुकावा। कालाउ एम्बालाइको दारको काथाता लाम्फा दोङ निया जेङलिदोका हि रो जातिङकोङ एम्बालाइ मुअ्तावा। 4 परमेस्वर कुकरम पाका सादेलचरगेलाइहेङ सुदाङ मालाअ्हि रो एम्बालाइहेङ पातेलता थालगिल्हि। कालाउ एम्बालाइहेङ नियाको दिनाथिकापा पातेलको कितिकितिकाता ताअ्का हि। 5 परमेस्वर लाम्फाको दुनियाहेङ सुदाङ मालाअ्हि। वासेहेङ मासाअ्कालाइहेङ बाने चुमातेङ मुअ्पाहि। कालाउ धरमातिको पारचार पाका नोआ रो वाको न्हिअ् मि जाहानहेङ खिनिङ बान्चिपाहि। 6 परमेस्वर सदोम रो गमोरा पुरहेङ मेहोइ ओअ्पातेङ मुअ्पाहि। एसापा वासेहेङ मासाअ्कालाइको हालत हिसिका जेङखे दोअ्तेङ इदोइ इङकोको एलोङ नामुना जेङहि। 7 वा दुरजनगेलाइको लेदेरपाका मारेम्का कामसो दिकदार जेङका धरमाति लोतहेङ बान्चिपाहि। 8 लोत इदोइ द्याङगेलाइको माझाता हिलाउ, दिनाङ एम्बालाइको कुकरम तिङलाउ रो हिङलाउ वाको कोन्धाङ तु:घाखे, हाइदोनु वा धरमाति हिघाखे। 9 एसापा ताइको चाकरगेलाइहेङ आपतको दिनाता जोगाइतेङ तअ्लि रो दुरजनगेलाइहेङ साजाइ पिलि नियाको दिनाथिकापा ताअ्लि प्रभु गेखे। 10 खासपातेङ एम्बालाइहेङ, जाइ अपुनित पाका कामातुरता वालातेङहिखे रो परमेस्वरको खाबाराहेङ आनादर पाखे। एबालाइ अजिर, तुजुकि हिखे रो सादेलचरगेलाइको इजत बुङ मापाखे। भुरुङ उल्ताङ बादनामि पाखे। 11 सादेलचरगेलाइ इदोइ असत काथा धिरपाकालाइखान्तेङ हेन्जा सरबङहिका रो बाराका हिखे। कालाउ बुङ एम्बालाइ प्रभुको प्रतापता हिकालाइहेङ प्रभुको आगाता निन्दा पातेङ मादुसिखे। 12 कालाउ इदोइ द्याङगेलाइ ताइमिङ मागेका काथागेलाइको बादनामि पाखे। एबालाइ झार गुपुसगेलाइभाइका हिखे रो ताइको लाल्सागेलाइको जिउकोबसता हिखे। एबालाइ रिम्तेङ सेअ्न्हालि जोन्मिकालाइभाइकाङ हि रो एबालाइ झार गुपुसगेलाइभाइपाङ मुअ्तावा। 13 एम्बालाइ जेसापा बोमिहेङ तु: पिखे एम्बालाइ बुङ एन्साङ तु: निङचालि गोयावा। हाइपानु एम्बालाइ नितिमाङ ताइ जिउको लाल्सागेलाइ पोङघापालि भोखे। एम्बालाइदोफा चालिआम्लि योम्लि दोङ नेलाइको भाअ्सिङ लेदेरपाका रो बादनामको काथा एइ। एम्बालाइ दिनाङ छलछाम पालि मोन्दाताखे। 14 एम्बालाइको मिँ दुराचारहोइ पोङघाका हिखे रो जेथे कुकरम पालाउ बुङ माघाइखे। एम्बालाइ खान्धुरता लुरमान्थुका द्याङगेलाइहेङ कुकरमको जालेता फासेपाखे। एम्बालाइको कोन्धाङ दिअ्काता धिरपाका निङका हिखे। एम्बालाइ सारापनिङचाका चानचामिन्दि एइ। 15 एम्बालाइ सोझा दामा लाअ्तेङ कुकरमता लागिका हि। एम्बालाइ लाभको भाअ्सिङ आखेका काम पातेङ लेङचाका बओरको चान बालामको दामा पिताइका हि। 16 इङको मारेम्का काम पालाउ हाप्काइ चालि गोइहि। माधुइका गाधा बुङ द्याङ भाइपाङ धुइतेङ इङको पागाला आगाधुइकाको कामहेङ रोकिपिहि। 17 इसिका द्याङगेलाइ ते चि सिअ्का मुल भाइकाङ रो दुमभेर्माको उराइपाका कुकुह्वा भाइकाङ एइ। एम्बालाइको भाअ्सिङ परमेस्वर पातेलको कितिकितिका सान्तितेङ ताअ्का हि। 18 एम्बालाइ तुजुक रो निरबुदि काथागेलाइ पाखे। कालाउ जिउहेङ लालचपाका कामगेलाइ तिङपातेङ असतसो घुरिकालाइहेङ बुङ फासेपाखे। 19 एम्बालाइ द्याङगेलाइहेङ खुला पापिलि कबोल पाखे, कालाउ एम्बालाइ ताइमिङ कुकरमको बान्धाइ जेङखे। हाइपानु जेदोङ काथाहोइ द्याङहेङ जितिखे इङकोङ काथाहोइ इङकोहेङ बान्धाइ बान्हाइखे। 20 एम्बालाइ केलाइको प्रभु रो छुटकारापिका इसु ख्रिस्टहेङ नाल्तेङ बुङ दुनियाको आखेका पापाका काथासो खाअ्कान्हुअ्सो आरोङ कुकरमता वालातेङ इङकोको बसता परिखे पानु, एम्बालाइको न्हु हालत लाम्फाको खान्तेङ झन आखेका ज्यावा। 21 हाइदोनु एम्बालाइहेङ परमेस्वरको पिका पुनित हुकुम गितेङ बुङ न्हु पासाइका खान्तेङ ते भुरुङ एम्बालाइहेङ धरमातिको दामा हेअ्लाउ मागेका हिनु रेम्का जेङधावा। 22 एम्बालाइ ते इदोइ सत दोअ्का एम्बालाइता ओसाभारापाङ मिलिखे, “खिया ओअ्तेङ ताइमिङ चाखे” रो “चिउपापिका पाया आरोङ खिचाताङ लोताइखे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.