२ पत्रुस 1 - धिमाल1 का इसु ख्रिस्टको साल्तेङ दिङगिल्का रो चाकर सिमोन पत्रुससो, केलाइको परमेस्वर रो छुटकारापिका इसु ख्रिस्टको धरमातितासो केलाइको भइपाङ हेन्जाङ जाङका खान्धुर निङकालाइहेङ इदोइ चिथि लेखेदोङखा। 2 नेलाइ परमेस्वर रो केलाइको प्रभु इसु ख्रिस्टहेङ नालनासिङ परमेस्वर नेलाइहेङ हेन्जाखान्तेङ हेन्जा निगाहा रो सान्ति प्याको। परमेस्वर काइका रो साल्का 3 पुनित ज्यान सिन्हुलिको भाअ्सिङ गोइका गोताङ काथा केलाइ परमेस्वरको सरबङसो दोङ निङका हिन्हाहि। हाइदोनु ताइको प्रताप रो भालाइसो काइका परमेस्वरहेङ केलाइ नाल्का हिन्हाहि। 4 इदोङसो वा केलाइहेङ वाको दामि रो बाराका कबोलगेलाइ पिका हि, कोलाउ इदोइ दुनियाको मारेम्कालाल्सासो लोका आखेका काथासो खाअ्तेङ नेलाइ परमेस्वरको आनिबानिता भाग र्हुलि दोसु। 5 इदोइखातिर जेथे दोका नेलाइको खान्धुरता रेम्का काम पालि दिनाङ बल पासु। कालाउ जाइ एल्का हि इङको पातेङ आकिल बुङ बार्हेपासु। 6 नेलाइ आकिलता बार्हेलि ताइमिहेङ बसता ताअ्सु। ताइमिहेङ बसता ताअ्लि धिर पासु रो धिर पातेङ भक्ति पासु। 7 कालाउ भक्ति पातेङ दादाओने बाइओनेगेलाइहेङ दायासु, दादाओने बाइओनेगेलाइहेङ दायातेङ मायाता बार्हेतेङ हानेसु। 8 नेलाइहेङ गोइका काथागेलाइ इदोङ एइ। कालाउ इदोइ काथागेलाइ नेलाइको ज्यानता बार्हेतेङ हानेहि पानु नेलाइ प्रभु इसु ख्रिस्टहेङ नाल्नाङसिङ एल्का कामसो नेलाइको ज्यानता लाभ ज्यावा। 9 कालाउ बुङ इसिका आनिबानि मान्थुका द्याङगेलाइचाहिँ रेम्फा मिँ मातिङका जेङखे। इङको लाम्फा पाका कुकरम परमेस्वर माफ पिका काथा दोङ निल्लिदोका हिखे। 10 इदोइखातिर दादाओने बाइओनेगेलाइ, नेलाइको काइन्हाका रो साल्का निधो पालि आरोङ बोल्याका जेङसु। हाइपानु इदोइ काथा पासुन्हा पानु नेलाइ हेअ्लाउ बुङ परमेस्वरसो दुरे माजेङस्वाना। 11 हाइपानु एसापा केलाइको प्रभु रो छुटकारापिका इसु ख्रिस्टको असिम सारभिलिअ्ता नेलाइ गाजाबसो दुल्लि निङस्वाना। धरमकिताबको आगाधुइ 12 इदोइखातिर इदोइ काथागेलाइ नेलाइहेङ का दिनाङ फोमपापाङका, कालाउ नेलाइ इदोइ गोताङ गेसुखेना रो नेलाइता हिका सतता नेलाइ बोल्याका हिसुन्हा। 13 का बान्चिपाधाउ नेलाइहेङ इदोइ काथागेलाइ फोम पापातेङ सजक पालि का मुनासिप चिताइखा। 14 हाइदोनु काङको इदोइ जिउ लाअ्का पहर मारफा दोङ लोदोङखे दोअ्तेङ का गेखा। इदोइ काथा केलाइको प्रभु इसु ख्रिस्ट दोङ कासेहेङ तिम्पापिका हि। 15 काङको इदोइ जिउ लाअ्कान्हुअ्सो बुङ नेलाइ इदोइ काथाहेङ हिदिङ बुङ पहर फोमपालि दोसु दोअ्तेङ का दोअ्तेङ ह्याङका। 16 केलाइको प्रभु इसु ख्रिस्ट बाराका प्रताप रो बाराका सरबङता आरोङ ल्वावा दोअ्तेङ केलाइ नेलाइहेङ एन्साङ दोअ्का माको। कालाउ केलाइ ताइकोङ मि होइ वाको बाराका प्रताप तिङन्हाहि। 17 जेलाउ वा परमेस्वर आबासो मान रो प्रताप निङहि कोलाउ सादेलसो, “या काङको दायाका चान एइ, जाइदोफा का हेन्जाङ लेङचाका हिघा” दोअ्का गाला लोलाउ केलाइ इन्ताङ हिघान्हाहि। 18 इङको पहर केलाइ वाकोदोफा पुनित आरदाङता हिलाउ सादेलसो लोका इङको गाला केलाइ ताइमिङ हिङका हिघान्हाहि। 19 इदोइखातिर आगाधुइकालाइ पारचार पाका कथनता केलाइ निधो जेङका हिन्हाहि। नेलाइ बुङ इदोइ काथाता मन लागाइसुन्हा पानु रेम्का जेनावा, हाइदोनु इङको दिना मालोपाधाउ रो नेलाइको कोन्धाङता र्हिमाको फुरु ख्रिस्ट माल्होपाधाउ कितिकितिकाता जोल्तेङहिका गिसाको काम पावा। 20 कालाउ आगाधुइकालाइसो धरमकिताबता लेखेन्हाका काथागेलाइचाहिँ ओबालाइको ताइकोङ बिचारहोइ लेखेन्हाका माको दोअ्तेङ नेलाइ गेलि गोइस्वाना। 21 हाइपानु आगाधुइकालाइको दोअ्का काथा द्याङको कोन्धाङसो लोका माको, कालाउ पुनित हाङसाको आधिनता हितेङ परमेस्वरसो धुइका कथन एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.