२ युहन्ना 1 - धिमाल1 सेउपाखा! का मन्डलिको आगुवासो, परमेस्वरसो साल्तेङ दिङगिल्का बेबाल रो इङकोको चानचामिन्दिगेलाइहेङ इदोइ चिथि लेखेदोङखा। नेलाइहेङ का जातिङको माया पाखा। का खिनिङ माको, कालाउ सतहेङ नाल्का झाराङ नेलाइहेङ माया पाखे। 2 हाइदोनु सत केलाइलिअ्ता हि इङको भाअ्सिङ नेलाइहेङ माया पान्हाखे। इङको सत दिनाङ केलाइदोफा ह्यावा। 3 केलाइ परमेस्वरको सत काथाता तेलाउ ए भेनेङहेङ माया पालाउ परमेस्वर आबा रो वाको चान इसु ख्रिस्टसो निगाहा, किरपा रो सान्ति केलाइ दोफा ह्याको। सत रो माया 4 नाङको चान चामिन्दिगेलाइता हेअ्मि परमेस्वरको पिका हुकुमआन्सार तेका तिङतेङ का हेन्जाङ लेङचाघा। 5 ओइ मोन्दाताका आनाउ, का नासेहेङ हिदिङ नावा हुकुम लेखेका माको। कालाउ लाम्फासो निङका हुकुमआन्सार का नासेहेङ पुकार पाखा। इङको काथाचाहिँ केलाइ एमि भेनेङहेङ माया पाइने दोअ्तेङ का नेलाइहेङ बिनइ पाखा। 6 माया पालि परमेस्वरको हुकुमआन्सार तेलि एइ। नेलाइ झाराङ हिङका लाम्फासोङको हुकुम इदोङ एइ: नेलाइ झाराङ मायाता हिलिगोयाङ। असत मास्टरगेलाइहेङ चेतानि 7 हाइपानु आवाइ पाकालाइ हेन्जाङ दोङ इदोइ दुनियाता लोका हि। एम्बालाइ इसु ख्रिस्ट जिउता लोका एइ दोअ्तेङ मन्जुर मापाखे। इसिका खामाल दोङ आवाइपाका रो ख्रिस्ट दुस्मन हि। 8 इदोइ भाअ्सिङ हुसपातेङ हिसु, जेदोङ काथाको भाअ्सिङ केलाइ काम पाका हिन्हाहि। नेलाइ इङको इनाम राम्पाका माको, कालाउ पुरा इनाम निङका जेङसु। 9 ख्रिस्टको बिद्याता माहिगिल्कालाइ रो इङकोहेङ केउपाकालाइदोफा परमेस्वर माहिखे। कालाउ वाको बिद्याता लागेकादोफा आबा परमेस्वर रो चान इसु ख्रिस्ट न्हेमिङ हिखे। 10 एन्साङ पातेङ एदि हिदिङ द्याङ इदोइ ख्रिस्टको धिरपाका बिद्याता मालोखे पानु, इङकोहेङ नाङको साअ्ता चुम्पुतेङ बान्सा माबुझाइ। कालाउ इङकोहेङ मान पातेङ मासेउपा बुङ। 11 हाइदोनु इङकोहेङ सेउपालि दोङ इङकोको कामता साघाइलि एइ। चिथिको न्हु आसि 12 नेलाइहेङ लेखेलि हेन्जाङ काथा हिलाउ बुङ का इदोइ चिथिता गोताङ काथा लेखेलि माभोखा। कालाउ का नेलाइहेङ दुसुतेङ काथा दोअ्लि मन पाखा। इङको पहर केलाइ झाराङ लेङचाङ। 13 परमेस्वरसो साल्तेङ दिङगिल्का नाङको ओनेको चान चामिन्दिगेलाइ नासेहेङ सेउपाका पिगिल्का हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.