1तिमोथि 6 - धिमाल1 कामत्या ताताइको गिर्हिहेङ मान पालि गोयाङ दोअ्तेङ फोम पाको। एन्सा जेङनु खिनिङ हासुङ बुङ परमेस्वरको मिङ रो केलाइको पिका बिद्याहेङ दुस लागाइलि मानिनावा। 2 खान्धुरि गिर्हिगेलाइहेङ इङकोको कामत्यागेलाइ खान्धुरता दादाओने दोङ दोअ्तेङ आनादर मापाको। भुरुङ एम्बालाइ ओबालाइको झन हेन्जा चाकर पाको। हाइदोनु एम्बालाइको चाकरसो लाभ निङकालाइ खान्धुरि रो मोन्दाताकालाइ दोङ। इदोङ काथागेलाइ साअ्लि धिरपा रो हाउसा पि। असत बिद्या रो सत ताका 3 हासुङ भेनेङ बिद्यागेलाइ धिरपाखे पानु केलाइको प्रभु इसु ख्रिस्टको सत बिद्या रो परमेस्वरहेङ मानपाका बिद्याहेङ मासाअ्तावा। 4 वा हाइदोङ मागेसिङ एन्साङ तुजुकहोइ फुलिखे। वा ते झागारा पाका बिमार लागेका द्याङ। वा काथाङ काथाता झागारा खिनिङ पालि भोखे। इसिका काथागेलाइहोइ ते दाहा, झागारा, बादनामि रो मारेम्का साङका देखाल पापाखे। 5 इसिका द्याङगेलाइ ते एकोर्ह्या जेङतेङ गनगन खिनिङ पातेङहिखे रो इन्सिकालाइको आकिल दोङ बिगिरका हिखे। एम्बालाइ सत दोङ राम्पाका हिखे रो परमेस्वरको बारेता बिद्या पिलिचाहि ताका कामाइका रेम्का दामा दोअ्तेङ एम्बालाइ फोमपाखे। 6 कालाउ परमेस्वरहेङ लेङचापालि रो केलाइदोफा हिका काथाता सन्तोक हिलि दोङ केलाइको भाअ्सिङ बाराका लाभ। 7 केलाइ इदोइ सुमिङता जोन्मिलाउ हाइदोङ चुम्तेङ मालोन्हाहि रो सितेङ हानेलाउ बुङ हाइदोङ चुम्तेङ मान्हाङ। 8 एन्साङ केलाइहेङ चालि रो लागाइलि थेम्हि पानु केलाइ इदोङताङ लेङचाइने। 9 कालाउ धनि जेङलि भोका द्याङ कुकरमता परेपाका काथाता वालाखे। वा निरबुदि रो हान्ति पाका लाल्सागेलाइको आस्तिता देखे। इदोइ आखेका लाल्सागेलाइ एम्बालाइहेङ बारबाद पाकाता रो मुअ्काता थुकापावा। 10 हाइदोनु गोताङ खालको आखेकाको मुल दोङ ताकाकाउरिको माया। हेथे द्याङ ते ताकाकाउरि कामाइका दिअ्काता लागेतेङ खान्धुर पालि लाअ्पिका हि। कालाउ हेन्जाङ तु:होइ एम्बालाइको कोन्धाङ दोङ तु:का हि। तिमोथिहेङ पावलको हुकुम 11 कालाउबुङ ना परमेस्वरको चाकर, इदोइ गोताङ मारेम्का काथागेलाइसो फारापाङ हि। ना परमेस्वरको आगा उचित ठर्हाइन्हाका काथाता, चाकरता, खान्धुरता, दायाता, धिरताता, नोइका जेङका काथाता ताइको मन लागाइ। 12 ना खान्धुर पाका काथाता रेम्फा चले रो असिम ज्यानहेङ रिम्तेङताअ्, याकोङ भाअ्सिङ परमेस्वर नासेहेङ काइका हिघाहि। कालाउ ना बुङ हेन्जाङ द्याङगेलाइको आगाता ताइको खान्धुरको दासि पिका हिघान्हा। 13 गोताङ थोकहेङ ज्यान पिका परमेस्वर रो पन्तियस पिलातसकोङ आगाता खान्धुरको जातिङको दासि पिका ख्रिस्ट इसुकोङ आगाता का नासेहेङ हुकुम पिदोङखा, 14 ना केलाइको प्रभु इसु ख्रिस्ट मालोपाधाउ ना परमेस्वरसो निङका हुकुम रेम्फा साअ् रो हासुङ कसुर लागाइलि मानिनाको। 15 परमेस्वर वासेहेङ उचित पहरता आरोङ दिङगिलावा। परमेस्वर बाखिन्का पाका लाएक हि रो वा खिनिङ गोताङ र्हुता राज पावा। वा राजागेलाइको बुङ राजा रो प्रभुगेलाइको बुङ प्रभु हि। 16 वा हेअ्लाउ मासिका रो हासुङ थुकालि मादोका फाइसालाम्काता ह्यावा। वासेहेङ हासुङ बुङ एलाथिकापा तिङका मान्थु रो तिङलि बुङ माद्वावा। दिनाङ दोङ हितेङ हिका सरबङ रो मान वाताङ ह्याको। आमेन। 17 एला इदोइ दुनियाता गिर्हि जेङकालाइहेङ तुजुक मापालि दोअ्। कालाउ एम्बालाइको ताकाकाउरि दिनाङको भाअ्सिङ हितेङ माह्यावा। कालाउ केलाइको सुखको भाअ्सिङ गोताङ थोक होपाङ पिका परमेस्वरताङ भर ताअ्सु दोअ्तेङ एम्बालाइहेङ हुकुम पि। 18 भालाइ जेङका काम पालि, भालाइ पातेङ धनि जेङलि, खुला मनको जेङलि रो जेलाउ बुङ बोमिहेङ पिलि त्यार जेङलि दोअ्तेङ एम्बालाइहेङ दोअ्। 19 एसापा एम्बालाइ न्हुअ्सो निङका ज्यानको भाअ्सिङ गोइका ताइकोङ भाअ्सिङ बोल्याका जग बान्हाइलि ताकाकाउरि जोम्पाको एसा पानु खिनिङ एम्बालाइ जातिङको ज्यान निङलि द्वावा। 20 मोन्दाताका तिमोथि, नाङको जिमाता पिका काथाहेङ रेम्फा खाङकाखुङका पा। हेथे द्याङगेलाइ दुनियाको निरबुदि काथा रो आकिल दोअ्तेङ साअ्का असत काथागेलाइसो फारापा हि। 21 हेथे द्याङगेलाइ इसिका काथाता लागेलाउ ताइको खान्धुरसो घुरिका हि। नेलाइ झाराङता परमेस्वरको निगाहा ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.