1तिमोथि 5 - धिमालखान्धुरिगेलाइहेङ मतो 1 वाराङगेलाइहेङ माहाप्काइसु, कालाउ इङकोहेङ ताइकोङ आबाहेङ भाइपाङ मान पातेङ मतो पि। कालाउ म्हुइकालाइहेङ चाहिँ ओनेगेलाइहेङ भाइपाङ बेभार पा। 2 एन्साङ पातेङ बेराङगेलाइहेङ आमाइ भाइपाङ रो धानिगेलाइहेङ ओनेगेलाइ भाइपाङ पुनित मनहोइ बेभार पा। 3 ताइको हासु मान्थुका रान्दिगेलाइहेङ खाङकाखुङका पा। 4 कालाउ चान चामिन्दि माकोनु वाजान चुअ् बेजना चुअ्गेलाइ हिका रान्दिगेलाइहेङ चाहिँ वाकोङ चान चामिन्दि रो वाजान चुअ् बेजान चुअ्गेलाइ दोङ पोसेतेङ ताइको पालि गोइका जिमा पुरा पालि धिराको। एसा पातेङ एम्बालाइ ताइको आबा आमाइको पाका गुन तिर्याको। हाइपानु परमेस्वर एसा पाका मोन्दाताखे। 5 ताइको हासु मान्थुका रान्दि चाहिँ ताइको आस परमेस्वरता खिनिङ ताअ्का हिखे। कालाउ इङको नितिमन्हिसिङ लागेतेङ परमेस्वरता ताइको साहेताको भाअ्सिङ पुकार पातेङ हिखे। 6 कालाउ ताइको ज्यान मोजमजाता दोपाका रान्दि चाहिँ सिन्हुलाउ बुङ लाम्फाङ सिका झोकोङ। 7 एम्बालाइ दुस मालागायाको दोअ्तेङ खान्धुरिगेलाइको भाअ्सिङ इदोइ बिद्यागेलाइ पि। 8 हासुङहासुङ ते ताइको सामान्दापरेकालाइ रो खास पातेङ ताइकोङ जाहानहेङ बुङ खाङकाखुङका मापाखे। इन्सिकालाइ ते खान्धुर पालिसुदाङ इन्कार पाखे। एम्बालाइ खान्धुर मापाकाखान्तेङ बुङ आखेका हिखे। 9 सुमकुरि बाअ्सार बोइसा माजेङका बेबालहेङ रान्दि बहिता इङकोको मिङ दारता मापासु। इङकोता बुङ इङको एलोङ खिनिङ वाबालदोफा बिहु पाका हिलिगोयाङ। 10 रेम्का काम पातेङ इङकोको मिङ चारचाराइका हिलि गोयाङ। इङको ताइको चान चामिन्दिगेलाइहेङ रेम्फा पातेङ हुर्किपाका रो बान्सालाइहेङ ताइको साअ्ता चुमातेङ बान्साबुझाइका हिलि गोयाङ। कालाउ इङको परमेस्वरको पुनित जनगेलाइको खोकोइ झातेङ चाकर पाका, तु:ता वाङकालाइहेङ साघाइका रो इसिकाङ रेम्का कामगेलाइ पाका हिलिगोयाङ। 11 कालाउ बोइसाहिका रान्दिगेलाइहेङ चाहिँ ताइको बहिता एम्बालाइको मिङ दारता मापासु, हाइपानु एम्बालाइ माउका निङतेङसाङ ख्रिस्टको कामहेङ लाअ्तेङ आरोङ बिहु पावा। 12 एसापा एम्बालाइ ख्रिस्टता लाम्फा पाका कबोल निलनाङसिङ दारता पर्यावा। 13 कालाउ बोइसाहिका रान्दिगेलाइको मिङ चार्हाइनु ते एम्बालाइ बोमिको साअ्साअ्ता घुराइका बानि जेङतेङ कुर्ह्याइनि जेङखे। इङको खिनिङ माको बोमिको काथा पाका, झागारा पापाका रो धुइलिङ माएल्का काथा बुङ धुइका हिखे। 14 इदोइभाअ्सिङ का बोइसाहिका रान्दिगेलाइ आरोङ बिहु पाको दोअ्तेङ साल्हा पिखा। एसापा भुरुङ एम्बालाइ चानचामिन्दि जोन्माइतेङ ताइको साअ्द्वार सामार्हाइयाको। एन्सा जेङनु खिनिङ केलाइको दुस्मनगेलाइ केलाइको बादनाम पालि माउका मानिनावा। 15 हाइपानु हेथे रान्दिगेलाइ लाम्फा दोङ दियाबलसभारि हानेलि दोका हि। 16 कालाउ हिदिङ खान्धुरि बेबालको जाहानता रान्दिगेलाइ हि पानु इङको खान्धुरि बेबाल इङको रान्दिगेलाइहेङ खाङकाखुङका पाको। एसा पाहि पानु मन्डलिहेङ ल्हिका माज्यावा। इदोइभाअ्सिङ हासुङ मान्थुका रान्दिगेलाइको खिनिङ मन्डलि खाङकाखुङका पाको। 17 रेम्फा खाङकाखुङका पाका मन्डलिको आगुवागेलाइ मान रो जेला निङलि गोयाङ। खास पातेङ परमेस्वरको बिद्या हिङपालि रो धिरपालि मिनेत पाकालाइ ते इदोइ निङलि दोङ गोयाङ। 18 हाइदोनु धरमकिताब दोअ्खे, “दाउनि झिपाका पियाको नुइता महला मालागाइलि कालाउ कामपाकालाइ ताइको जेला निङलिङ गोयाङ।” 19 न्हेमिसुमि दासि माजेङपाधाउ मन्डलिको आगुवाहेङ दुस लागाइका काथा हिङतेङ माहिङ। 20 कुकरम पातेङ हिकालाइहेङ झाराङको आगाता हाकाराइसु, कालाउ खिनिङ बो आगुवागेलाइ बुङ थ्यावा। 21 का नेलाइहेङ परमेस्वर, ख्रिस्ट इसु रो पुनित चरगेलाइको आगाता इदोइ बिद्या साअ्लि हुकुम पिखा। एसा पालाउ ना हासुङहेङ बुङ पछेपात मापा। 22 हातार पातेङ हासुहेङ मन्डलिको आगुवा माबान्हाइ। बो द्याङगेलाइको कुकरमता भाग मार्हु रो ताइको ज्यान सुदो ताअ्। 23 नाङको हेमुङ तुःलाउ चि खिनिङ माआम, कालाउ ओसेरे ज्याको दोअ्तेङ आङगुरको झोल आम। हाइपानु ना घुरिघुरि मासाधेसाङ हिखेना। 24 हिदिङहिदिङ द्याङको कुकरम ते सोझाङ तिङका जेङखे रो इन्सिकालाइ लाम्फा दोङ दोसि ठर्हाइन्हाखे। कालाउ हेथेको कुकरमचाहिँ न्हुअ्सो खिनिङ तिङतेङ हानेखे। 25 एन्साङ पातेङ हेथे रेम्का कामगेलाइ लाम्फा दोङ छ्याङपा तिङखे। जेदोङ रेम्का काम छ्याङपा मातिङहि पानु म्होतेङहिलि बुङ मादोखे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.