1तिमोथि 4 - धिमालअसत काथा धिरपाका मास्टरगेलाइ 1 पुनित हाङसा रेम्फा गिपातेङ दोअ्खे, न्हुअ्सो लोका पहरता हेथे द्याङगेलाइ खान्धुर दोङ पालि लाअ्तावा। एम्बालाइ असत हाङसागेलाइको रो मासानको दोअ्का काथा साअ्तावा। 2 इसिका बिद्यागेलाइ असत धुइकालाइ रो छलपाका द्याङगेलाइसो लोखे, जाइको फोमपाका सरबङ मुअ्का हिखे। 3 एबालाइ बिहुपालि माएलाङ रो हेथे थोकचाहिँ चालिमाएलाङ दोअ्तेङ द्याङगेलाइहेङ धिरपाखे। कालाउ खान्धुर पाका रो सतहेङ नाल्कालाइ च्याबास चार्हाइतेङ इदोइ चाका थोकगेलाइ चालिएल्खे। हाइदोनु इदोङ गोताङ थोकगेलाइ परमेस्वर दोङ सिरजाइका। 4 परमेस्वरसो सिरजाइन्हाका गोताङ थोकगेलाइ रेम्का हि। परमेस्वरहेङ च्याबास चार्हाइतेङ इङको थोकगेलाइ चालि एल्खे रो हिदिङ थोक बुङ इन्कार पालि मागोयाङ। 5 हाइदोनु परमेस्वरको कथन रो पुकारहोइ इङको थोकहेङ चोखाइयावा। 6 ना इदोइ काथा खान्धुरिगेलाइहेङ धिरपान्हा पानु ना ख्रिस्ट इसुको रेम्का चाकर जेनाना। नाङको पाका खान्धुर रो रेम्का बिद्याता ना बाराकाताङ हानेका हिन्हा दोअ्का काथा या तिङपाखे। 7 परमेस्वरको प्रताप माजेङका रो मानेमान्थुका काथागेलाइसो फारापा हिसु। इङको खान्तेङ ते परमेस्वरहेङ चाकर पाका काथाता तालिम पिसु। 8 हाइदोनु जिउको तालिम पानु ते आतुइसा काथाता खिनिङ लाभ जेनावा। कालाउ परमेस्वरता भक्ति पाखे पानु गोताङ काथाता रेम्का जेनावा। या ते एलाको रो न्हुअ्सोको ज्यानहेङ बुङ लाभको भाअ्सिङ कबोल पिखे। 9 इदोइ खान्धुर पातेङ मानेलिगोइका जातिङको काथा। 10 इदोइभाअ्सिङ केलाइ मिनेत पातेङ काम पान्हाखे हाइदोनु केलाइको आस सिन्हुका परमेस्वरता ताअ्का हिन्हाहि। वा दोङ गोताङ द्याङगेलाइहेङ खास पातेङ वाता खान्धुर ताअ्का झोकोहेङ छुटकारा पिका परमेस्वर हि। 11 इदोइ र्हुताको काथागेलाइता ना बोमिहेङ हुकुम पि रो धिरपा। 12 ना धाना हिन्हा दोअ्तेङ हासुङ बुङ नासेहेङ हेपेलि माद्वाको। कालाउ खान्धुरिगेलाइको माझाता नाङको धुइकाकथन, चालचलन, दाया, खान्धुर रो पुनित जेङका काथाता ना एअ् नामुना जेङलि दो। 13 का मालोपाधाउ ना द्याङगेलाइहेङ धरमकिताब पर्हेतेङ हिम्पा, हिमत पितेङ पारचार पा रो बोमिहेङ बिद्या पिका काथाता मन लागाइ। 14 नाङको निङका बरदानहेङ काम मालागेका दोअ्तेङ बादनाम मापा। जेदोङ दान मन्डलिको आगुवागेलाइ नार्हुता खुर ताअ्तेङ आगाधुइलाउ ना निङका हिघान्हा। 15 नाङको गोताङ मन रो हिकाझोको सरबङ इदोङ धिरपाका काथागेलाइता लागाइ। कोलाउ नाङको पातेङहिका गोताङ रेम्का काम झाराङ तिनाको। 16 कालाउ ना ताइको बेभारको बारेता रो ताइमिको पिका बिद्याको बारेता होसपातेङ हि। इदोइ काथाता लागितेङ हिन्हा पानु ना रो नाङको काथा हिङकालाइ झाराङ छुटकारा निनावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.