1तिमोथि 3 - धिमालमन्डलिको आगुवागेलाइ 1 इदोइ काथा जातिङको, एदि हासुङ मन्डलिता आगुवाको काम पालि लाल्सा ताअ्खे पानु इङकोको बिचार रेम्काङ। 2 इसिका आगुवाचाहिँ हिदिङ दुसमान्थुका रो इङकोको बेअ् एलोङ खिनिङ हिलिगोयाङ। इङको ताइमिङहेङ रो ताइको मनहेङ बसता ताअ्लि दोका कालाउ रेम्का चालचलनको हिलिगोयाङ। इङको बान्साबुझाइका रो बोमिहेङ रेम्फा बिद्या पिका हिलिगोयाङ। 3 इङको दान्हाइसुका रो म्हागिल्का हिलिमागोयाङ, कालाउ इङको सहेलि दोका, सिपापा हिका रो टाका काउरिको लाल्चा मापाका हिलिगोयाङ। 4 इङको ताइको साअ्द्वार रेम्फा चालाइलि दोका रो ताइको चानचामिन्दिगेलाइहेङ मान पाका रो हुकुम साअ्का बान्हायाको। 5 हाइदोनु इङको ताइको साअ्द्वारहेङ दोङ रेम्फा चालाइलि मादोहि पानु हेसापा परमेस्वरको मन्डलिहेङ खाङलि द्वावा कुनु? 6 कालाउ इङको भरखर खान्धुर पाका बुङ हिलि मागोयाङ। माकोनु इङको तुजुकहोइ फुलितेङ दियाबलस भाइपाङ दारता वालातेङ मुअ्तावा। 7 इन्सिका आगुवाचाहिँ ताइको मन्डलिता खिनिङ माको मन्डलि बाहार बुङ मान निङका हिलि गोयाङ। एन्सा जेङनु खिनिङ इङकोहेङ द्याङगेलाइ निन्दा मापावा रो इङको दियाबलसको आस्तिता मादेकावा। मन्डलिता चाकर पाकालाइ 8 एन्साङ पातेङ मन्डलिता चाकरपाकालाइ मान निङका रो जातिङको धुइका हिलि गोयाङ। इन्सिकालाइ हेन्जाङ माम्हाका रो मारेम्का काम पातेङ टाका काउरि काम्हाइलि भोका द्याङ हिलि माएल। 9 एम्बालाइ खान्धुरता हिका सत काथाहेङ एम्बालाइको रेम्का सोचिका सरबङहोइ जोगाइतेङ ताअ्लिगोयाङ। 10 लाम्फा डिकनको जाच पालि गोयाङ रो एम्बालाइता हाइबुङ दुस मानिङनु खिनिङ एम्बालाइहेङ चाकर पाका कामता लागाइलि गोयाङ। 11 एन्साङ पातेङ एम्बालाइको बेअ्गेलाइ बुङ बोमि द्याङगेलाइसो मान निङका हिलि गोयाङ रो एम्बालाइ बोमिको बारेता मारेम्का काथा मापाका हिलि गोयाङ, कालाउ ताइमिङहेङ आधिनता ताअ्तेङ गोताङ काथाता खान्धुरि लाएक हिलि गोयाङ। 12 मन्डलिको डिकनको बुङ एलोङ खिनिङ बेअ् हिलिगोयाङ। एम्बालाइ ताइको चानचामिन्दि रो साअ्द्वार रेम्फा मिलिपातेङ ताअ्लि दोका ह्याको। 13 डिकनगेलाइ रेम्का चाकर पानु एम्बालाइ रेम्का मान निनावा कालाउ एम्बालाइ इसु ख्रिस्टता हिका ताइको खान्धुरको बारेता बोमिहेङ बुङ माथिसिङ दोअ्लि द्वावा। बारा भेदको काथा 14 का नाङकोता मारफाङ लोलि आस ताअ्का हिघा, कालाउ बुङ का इदोइ चिथि लेखेदोङखा। 15 कालाउ का लोलि बेलोमघा पानु बुङ परमेस्वरको साअ्ता हेसापा काम पालि, इङको काथा इदोइ चिथिसो गेसु। परमेस्वरको साअ्चाहिँ सिन्हुका परमेस्वरको मन्डलि। इदोइ सतको खाम्भा रो जग बुङ। 16 केलाइ इदोइ काथा साङखा मापासिङ इदोइ भेद हेथे बाराका हि दोअ्तेङ खान्धुर पान्हाखे। ख्रिस्ट द्याङ जेङतेङ लोहि, पुनित हाङसाहोइ धरमाति द्याङ ठहर्हाइन्हाहि कालाउ वासेहेङ सादेलचरगेलाइ तिङहि। मुलुकमुलुकता वाको पारचार जेङहि, दुनियाको द्याङगेलाइ वासेहेङ खान्धुर पाहि कालाउ वा प्रतापता सादेल चुम्पुन्हाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.