1तिमोथि 2 - धिमालपुकारको बारेता 1 एला का नेलाइहेङ दोअ्ताङका, झाराङ खान्तेङ लाम्फा झाराङ द्याङगेलाइको भाअ्सिङ पुकार पासु। परमेस्वरता द्याङगेलाइहेङ साघाइलिको भाअ्सिङ पुकार पासु, एम्बालाइको भाअ्सिङ पुकार रो च्याबास चार्हाइसु। 2 कालाउ राजागेलाइ रो सारकारको द्याङगेलाइको भाअ्सिङ बुङ पुकार पासु। कोलाउ केलाइ दिनाङ सान्तिता हितेङ धरमाति रो मानको ज्यान सिन्हुलि द्वाइने। 3 एसा पालि रेम्का काथा रो केलाइहेङ छुटकारा पिका परमेस्वर बुङ इदोङ मोन्दाताखे। 4 कालाउ झाराङ द्याङगेलाइ सिन्हुताको रो सतहेङ रेम्फा नालाको दोअ्का दोङ वाको लाल्सा हि। 5 हाइपानु परमेस्वर एलोङ हि रो द्याङगेलाइहेङ परमेस्वरता चुमाका बुङ एलोङ हि। इङको माझाको द्याङचाहिँ ख्रिस्ट इसु हि। 6 झाराङ द्याङगेलाइहेङ सिन्हुपालि वा भोक जेङहि। परमेस्वर झाराङ द्याङ सिन्हुका लाल्सापाखे दोअ्का काथाको दासि इदोइ दोङ। 7 इदोइभाअ्सिङ का बोजात्याको द्याङगेलाइहेङ खान्धुर रो सत काथा धिरपालिको भाअ्सिङ परमेस्वर कासेहेङ पारचार पाका रो साल्तेङ दिङगिल्का जेङलि साल्का। का जातिङको दोअ्का, ढाटाइका माको। 8 इदोइभाअ्सिङ का भोखा, गोताङ थामेता वाबालाइ चेरमाताम्पासिङ, माचेरसुसिङ पुनित खुरगेलाइ तोल्हेतेङ पुकार पाको। 9 एन्साङ पातेङ बेबालाइ बुङ ताइमिहेङ सोबाइका रो लेदेर मापापाका खाल्को धाबा लागायाको। कालाउ बोमिको मन तान्हेलिको भाअ्सिङ नकल पालि पुसुङ चुअ्तेङ सोना, हिरा, मोति, भाइका जाङका सिःका गिअ्का रो धाबागेलाइ मालागायाको। 10 कालाउ परमेस्वरको चाकर पाका बेबालाइ ताइमिहेङ सोबाइका खाल्को रेम्का काम खिनिङ पाको। 11 बेबालाइ मन्डलिको आगुवागेलाइको आधिनता हितेङ सिकापा धिराको। 12 बेबालाइ वाबालाइर्हुता हक जामाइलि रो बिद्या पिलि काचाहिँ मन्जुरि माप्याङका। एम्बालाइ सिकापा दोङ ह्याको। 13 हाइदोनु परमेस्वर लाम्फा आदमहेङ कालाउ इङकोन्हुअ्सो खिनिङ हब्बाहेङ सिरजाइका हिघाहि। 14 दियाबलसको छलता परेका आदम माको, परमेस्वरको हुकुम मासाअ्तेङ छलता परेका ते हब्बा दोङ। 15 कालाउ बेबालाइ नोइतेङ खान्धुर, माया रो पुनितता हिलि दोहि पानु जामाल जोन्माइलाउ एम्बालाइ सिन्हुतावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.