1तिमोथि 1 - धिमाल1 केलाइहेङ छुटकारा पिका परमेस्वर रो आस पिका ख्रिस्ट इसुको हुकुमआन्सार ख्रिस्ट इसुको साल्तेङ दिङगिल्का का पावलसो, 2 खान्धुरता काङको जातिङको चान तिमोथिहेङ इदोइ चिथि लेखेदोङखा। परमेस्वर आबा रो केलाइको प्रभु येसु ख्रिस्ट नेलाइहेङ निगाहा, दाया रो सान्ति प्याको। ढाटाइका मास्टरगेलाइको खिलापता चेतानि 3 का माकेडोनिया हानेलि तोमलाउ नासेहेङ एफिससताङ हि दोअ्तेङ कर लागाइका हिघाखा। आरोङ बुङ इन्ता ढाटाइका बिद्या धिरपाकालाइहेङ रोकेलि ना इन्ताङ हि। 4 कालाउ एम्बालाइ इङको निङकाकाथा रो आबा खालगेलाइको बङसावलिता आवाइलि मापि। इसिका काथागेलाइ ते चेरसुका खिनिङ पापाखे रो खान्धुरसो पाका परमेस्वरको कामता साङका खिनिङ बार्हेपाखे। 5 केलाइको पिका बिद्याको मुल काथा दाया पालि इदोइचाहिँ चोखो मन, रेम्का बिचार रो जातिङको खान्धुरिसो लोखे। 6 हेथे द्याङगेलाइ इदोइ काथागेलाइहेङ लाअ्तेङ काम मालागिका काथाता आवाइका हि। 7 एम्बालाइ नियमको मास्टर जेङलि भोखे, कालाउ ताइमिङ धुइका काथा मागेखे रो हाइको बारेता धुइका दोअ्का काथा बुङ मागेखे। 8 एदि हासुङ नियमहेङ रेम्फा मानेहिपानु इदोइ रेम्का काथा दोअ्तेङ केलाइ गेन्हाखे। 9 केलाइ इदोइ काथा गेका हिनाहि, नियम रेम्का द्याङको भाअ्सिङ बनेका माको कालाउ इदोइ ते नियम मासाअ्का रो धुमिगेलाइ, परमेस्वरहेङ मामानेकालाइ रो कुकरमिगेलाइ, आखेका मन हिका रो परमेस्वरको खिलापिगेलाइ, रो ताइको आबा आमाइहेङ सेअ्कालाइ, द्याङगेलाइ सेअ्कालाइ, 10 दुराचारिगेलाइ, वाबाल वाबालता रो बेबाल बेबालता दुराचार पाकालाइ, द्याङ पिअ्कालाइ, असत धुइकालाइ, असत दासि पिकालाइ रो सत बिद्याको खिलापता काम पाकालाइको भाअ्सिङ बनेका। 11 इदोइ बिद्या सहसाम्पा पिका परमेस्वरको प्रतापि रेम्काबानाल माफिक हि। परमेस्वर खान्धुर पातेङ इदोइ रेम्का बानाल कासेहेङ पिका हि। परमेस्वरको दाया 12 काङको कामता कासेहेङ बल पिका केलाइको प्रभु इसु ख्रिस्टहेङ का च्याबास चार्हाइखा। वा कासेहेङ खान्धुर पातेङ दोङ ताइको कामता लागाइहि। 13 लाम्फा ते का वाको बादनामि पाघा, खान्धुरगेलाइहेङ तु: पिघा रो आपामान पाघा। इदोइ गोताङ का खान्धुर मापासिङ रो मागेसिङ पाका हिनाङसिङ ख्रिस्ट कासेहेङ दायाका हि 14 केलाइको प्रभुको निगाहा का हेन्जाङ निङका हिघा। ख्रिस्ट इसुता निङका खान्धुरि रो दाया प्रभु दोङ कासेहेङ पिहि। 15 ख्रिस्ट इसु कुकरमिगेलाइहेङ दोङ सिन्हुपालि इदोइ दुनियाता लोका, इदोइ झाराङ साअ्लिगोइका जातिङको काथा। कालाउ कुकरमिगेलाइता काचाहिँ झाराङखान्तेङ कुकरमि द्याङ। 16 इदोइभाअ्सिङ वा कासेहेङ दाया पाहि। का भाइका झाराङखान्तेङ कुकरमिहेङ ताइको धिर देखाल पिलि कासेहेङ नामुना बान्हाइहि। इदोइ नामुना वाता खान्धुर पाका रो हेअ्लाउ मानासाका ज्यान निङकालाइको भाअ्सिङ। 17 जुग जुग थिकापा राज पाका राजा, हेअ्लाउ मासिका रो तिङलि बुङ मादोका एखिनिङ परमेस्वरहेङ दिनाङ मान रो प्रताप हितेङह्याको। आमेन। 18 खान्धुरता काङको जातिङको चान तिमोथि, हेन्जाङलाम्फा नाङको बारेता धुइका आगाधुइ माफिक का नासेहेङ हुकुम पिखा। इङको काथागेलाइ फोम पातेङ रेम्का बानालको भाअ्सिङ रेम्का धुम पालि दोसु। 19 ना ताइको खान्धुरि रो रेम्का आकिलहेङ मालाअ्। आकिलको दोअ्का मासाअ्लाउ हेअ्मिको खान्धुर दोङ मुअ्तेङ हानेहि। 20 एम्बालाइता हुमेनियस रो अलेक्जेन्डर। परमेस्वरहेङ बादनामि पालि लाअ्ताको दोअ्तेङ का एम्बालाइहेङ दियाबलसको खुरता पिका हिघा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.