1 थेस्लोनिकि 5 - धिमालप्रभुको दामा खाङतेङहिसु 1 दादाओने बाइओनेगेलाइ, इदोइ काथागेलाइ हेअ्लाउ रो हिदोइ पहर ज्याङ दोअ्तेङ नेलाइहेङ लेखेतेङहिलि मागोयाङ। 2 हाइपानु नेलाइ ताइमिङ रेम्फा गेसुखेना, प्रभु लोका दिना ते फोम मापाका पहर न्हिसिङता खुकाभाइपाङ ल्वावा। 3 जेलाउ द्याङगेलाइ “सान्ति रो पहरा” दोअ्तेङ ह्यावा, कोलाउ चानहिका बेबालहेङ तु: निङचाकाभाइपाङ एकासि एम्बालाइर्हुता बरबाद ल्वावा रो एम्बालाइ हिदिङ चलनहोइ खाअ्न्हालि माद्वावा। 4 कालाउ दादाओने बाइओनेगेलाइ, नेलाइ कितिकितिकाता मान्थुसुन्हा, एन्साङ प्रभु लोका दिना नेलाइहेङ खुकाभाइपाङ उदेक मापावा। 5 हाइपानु नेलाइ झाराङ फाइसालाम्काको रो दिनाको चानचामिन्दि। केलाइ दिलिमाको रो कितिकितिकाको चानचामिन्दि माको। 6 इदोइभाअ्सिङ बोमिगेलाइभाइपाङ केलाइ माजिमाइने, कालाउ नाङघातेङ ह्याइने रो सजक ह्याइने। 7 हाइपानु जिम्कालाइ दिलिमा जिम्खे रो निघार आम्तेङ म्हाकालाइ दिलिमाङ म्हाखे। 8 कालाउ केलाइचाहिँ दिनाको चानचामिन्दि हिनाङ चेतता ह्याइने। केलाइ खान्धुर रो मायाको तुम्तापाता लागायाइने। कालाउ किटको तुपिरि भाइपाङ छुटकाराको आसहेङ होनाइने। 9 हाइपानु परमेस्वर केलाइर्हुता ताइको चेर हुपिलि साल्का माको, कालाउ प्रभु इसु ख्रिस्टसो छुटकारा निङलि लाम्फासोङ साल्का। 10 वा लोलाउ केलाइ सिलाउ बुङ, बान्चेलाउ बुङ वादोफाङ सिन्हुलि द्वाको दोअ्तेङ प्रभु इसु केलाइको बादालाता सिहि। 11 इदोइभाअ्सिङ एला पाकाभाइपाङ एमि भेनेङहेङ थुमथुमाइ पिसु रो एमि भेनेङहेङ बोल्याका बान्हाइका काम पासु। आखिरि बिद्या 12 दादाओने बाइओनेगेलाइ, केलाइ नेलाइहेङ बिम्ति पान्हाखे, नेलाइको माझाता मिनेत पाका रो नेलाइहेङ चेतानि पिका प्रभुको काम पाका आगुवागेलाइहेङ मान पासु। 13 एम्बालाइको पाका कामको भाअ्सिङ मायाहोइ एम्बालाइहेङ हेन्जाङ मान पासु रो नेलाइ बुङ ताताइमिता मिलितेङ हिसु। 14 दादाओने बाइओनेगेलाइ, केलाइ नेलाइहेङ आर्ति पिन्हाखे, कामपालि कुर्यागेलाइहेङ चेतानि पिसु। हारेस चाकालाइहेङ हाउसा पिसु, हाइदोङ पालि मादोकालाइहेङ मदत पासु रो झाराङदोफा सहेलिदोका तिङपासु। 15 फोम पासु, हासुङ आखेकाको बादालाता आखेका मापाको, कालाउ एमि भेनेङ रो झाराङदोफा दिनाङ भालाइ पालि बल पासु। 16 दिनाङ लेङचासु। 17 दिनाङ पुकार पातेङहिसु। 18 जिसिकालाउबुङ हालतता च्याबास पिसु, हाइपानु ख्रिस्ट इसुता नेलाइको भाअ्सिङ परमेस्वरको लाल्सा इदोङ। 19 पुनित हाङसाहेङ काम पालि पिसु। 20 आगाधुइहेङ दिगमिग मापासु। 21 कालाउ गोताङ काथाको जाच पासु। जेदोङ काथा रेम्का हि इङकोताङ अचल हिसु। 22 गोताङ खालको आखेकासो फारापा हिसु। 23 सान्तिको परमेस्वर ताइमिङ नेलाइहेङ पुनित ताअ्ताको। नेलाइको गोताङ ज्यान, सास रो जिउ केलाइको प्रभु इसु ख्रिस्ट लोलाउ खोटमान्थुका ह्याको। 24 नेलाइहेङ काइका परमेस्वर खान्धुरलायक हि। वा दोङ नेलाइहेङ इदोइ गोताङ काथा पोङघा पाप्यावा। 25 दादाओने बाइओनेगेलाइ, केलाइको भाअ्सिङ पुकार पापिसु। 26 इन्ता हिका झाराङहेङ दायाहोइ काङको सेउपाका हिम्पापिसु। 27 का नेलाइहेङ प्रभुता बिनइ पाखा, इदोइ चिथि झाराङ दादाओने बाइओनेगेलाइहेङ पर्हेतेङ हिम्पापिसु। 28 केलाइको प्रभु इसु ख्रिस्टको निगाहा नेलाइता ह्याको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.