1 थेस्लोनिकि 4 - धिमालपरमेस्वरहेङ लेङचा पालि 1 आखिरता दादाओने बाइओनेगेलाइ, नेलाइ केलाइसो परमेस्वरहेङ मोन्दाताका आनिबानि धिर्का हिसुन्हा। जातिङकोङ नेलाइको आनिबानि परमेस्वरहेङ मोन्दाताकावा। इङको आनिबानिता झनझन रेम्का जेङतेङ हानेसु दोअ्तेङ प्रभु इसुको मिङता बिम्ति पान्हाखे। 2 हाइपानु केलाइ नेलाइहेङ प्रभु इसुसो निङका हिदिहिदि हुकुमगेलाइ पिका हिघान्हाहि, इङको गेसुखेना। 3 नेलाइ पुनित जेङसु दोअ्तेङ परमेस्वरको लाल्सा इदोइ हि, एन्साङ नेलाइ दुराचारसो खेङन्हातेङ हिसु। 4 पुनितता रो मानभाउदोसा ताइको जिउहेङ हेसापा बसता ताअ्लि द्वाङ इङको नेलाइ झाराङ गेसु। 5 परमेस्वरहेङ मानाल्का द्याङगेलाइ पाका भाइपाङ नेलाइ बुङ दुराचार पाका कामता लाल्सा ताअ्तेङ माहिसु। 6 इदोइ काथाता हासुङ बुङ ताइको खान्धुरि दादाओनेहेङ मारेम्का मापाको। हाइपानु इसिका गोताङ काथाता बादला र्हुका प्रभु दोङ हि। केलाइ नेलाइहेङ लाम्फा दोङ इदोइबारेता चेतानि पिका हिन्हाहि। 7 हाइपानु परमेस्वर केलाइहेङ अपुनितको भाअ्सिङ माको, कालाउ पुनितको ज्यान सिन्हुलि काइका। 8 इदोइभाअ्सिङ जाइ इदोइ काथाको आनादर पाखे इङको द्याङको माको, कालाउ परमेस्वरको आनादर पाखे, जेदोङ परमेस्वर नेलाइहेङ ताइको पुनित हाङसा पिखे। 9 एला खान्धुरिगेलाइ ताताइमिता माया पाका बारेता हासुङ नेलाइहेङ हाइदोङ लेखेलि मागोयाङ। हाइपानु एमि भेनेङहेङ दाया पालि दोअ्का नेलाइ ताइमिङ बुङ परमेस्वरसो बिद्या निङका हिसुन्हा। 10 नेलाइ जातिङको दोङ माकेडोनियाको दादाओने बाइओनेगेलाइहेङ दाया पासुखेना। आरोङ बुङ एन्साङ पातेङहानेसु दोअ्तेङ केलाइ नेलाइहेङ हाउसा पिन्हाखे। 11 केलाइ लाम्फा नेलाइहेङ दोअ्काभाइपा सान्तिको जिन्दागि दोपालि मन लागाइसु। कालाउ नेलाइ ताइको जिबिका चालाइलिको भाअ्सिङ ताइमिङ काम पासु। 12 एसा पासुन्हा पानु नेलाइहेङ बोजात्यागेलाइ बुङ मान पावा रो नेलाइहेङ हार्जा जेङलाउ बोमिदोफा भर परेलि मागोयावा। प्रभु आरोङ ल्वावा 13 दादाओने बाइओनेगेलाइ, सिलिदोका खान्धुरिगेलाइको बारेता केलाइ नेलाइहेङ दोअ्लि भोन्हाखे। एन्साङ बोजात्यागेलाइभाइपाङ नेलाइ सोक पालि मागोयाको। 14 हाइपानु केलाइ खान्धुरि पान्हाखे, इसु सिहि रो आरोङ सिन्हुहि। एसा दोङ इसुता खान्धुरपातेङ सिकालाइहेङ परमेस्वर सिन्हुपातेङ इसुकोता चुमप्वावा। 15 प्रभु ताइमिङ दोअ्का वाको काथासो केलाइ नेलाइहेङ दोअ्न्हाखे, प्रभु लोका दिनाथिकापा केलाइ सिन्हुतेङ हिकालाइ इङको सिकालाइ खान्तेङ लाम्फा हिदिङ रितहोइ बुङ आगा हानेलि मादाङ। 16 हाइपानु प्रभु ताइमिङ हुकुमको गालाता, मुल सादेलचरको गाला रो परमेस्वरको धुतुरुको गालाता सादेलसो खुअ्तावा रो ख्रिस्टता सिकालाइचाहिँ लाम्फा सिन्हुतेङ ल्होकावा। 17 कालाउ केलाइ सिन्हुतेङहिका रो लाअ्धिन्हाकालाइ प्रभुहेङ आदेलता दुसुलि एम्बालाइ दोफादोफाङ बादेलता तोल्हेन्हातेङ चुम्पुन्हास्वाना रो एसापा केलाइ दिनाङ प्रभुदोफाङ ह्याङ। 18 इदोइभाअ्सिङ एमि भेनेङहेङ इदोइ कथनहोइ थुमथुमाइ पिसु। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.