1 थेस्लोनिकि 3 - धिमालतिमोथिहेङ थेसलोनिकाता दिङगिल्का 1 नेलाइसो खेङन्हातेङ हिलि मारेम्का लागेनाङ का पावल रो सिलास खिनिङ एथेन्सता तिमोथि बेगार हिलि केलाइ राजि जेङन्हाहि। 2 केलाइदोफा दोसाङ काम पाका केलाइको ओने तिमोथि ख्रिस्टको रेम्काबानाल हिङपाका परमेस्वरको चाकर। नेलाइहेङ हाउसा पितेङ खान्धुरता बोल्याका बान्हाइलि केलाइ तिमोथिहेङ नेलाइकोता दिङगिलन्हाहि। 3 कालाउ इदोइ तु:गेलाइसो हासुङ माहेङगालाइन्हाको। इसिका तु:गेलाइ सहेलि केलाइचाहिँ साल्तेङ दिङगिल्का दोअ्तेङ नेलाइ ताइमिङ रेम्फा गिका हिसुन्हा। 4 हाइपानु जेलाउ केलाइ नेलाइदोफा हिघान्हाहि, कोलाउ नेलाइ तु: भोगेलिङगोयाङ दोअ्तेङ केलाइ लाम्फासोङ दोअ्का हिघान्हाहि। इङको जातिङकोङ जेङलि बुङ लोहि, इङको नेलाइ गेसुखेना। 5 इदोइभाअ्सिङ का बो आरोङ हेन्जा सहेलि मादोनाङ नेलाइको खान्धुर गेलि तिमोथिहेङ दिङगिल्घा। हाइपानु फासेपाकालाइ नेलाइहेङ फासेपातेङ केलाइको काम बिगिरपाहि बे दोअ्तेङ का थिका हिघाखा। तिमोथिको चुमाका बानाल 6 कालाउ एला तिमोथि एलाङखिनिङ नेलाइहेङ दुसुतेङ थुकालि लोकाहि। नेलाइता आरोङ बुङ माया रो खान्धुर हि दोअ्तेङ वा रेम्काबानाल चुमाहि। केलाइ भाइपाङ नेलाइ बुङ केलाइहेङ दुसुका बाराका लाल्सा ताअ्तेङ फोमपातेङ हिघासुन्हा। 7 दादाओने बाइओनेगेलाइ, नेलाइको खान्धुरको बानाल हिङतेङ तु: रो सान्ताइता परेका पहरता बुङ केलाइ लेङचाका हिन्हाहि। 8 हाइपानु नेलाइ प्रभुता बोल्याका हिसुन्हा दोअ्का हिङतेङ केलाइहेङ जातिङको हाउसा लोका हि। 9 केलाइ नेलाइको भाअ्सिङ हेन्जाङ च्याबास दोअ्न्हाखे। हाइदोनु नेलाइको भाअ्सिङसो दोङ केलाइ परमेस्वरको आगाता हेन्जाङ लेङचाका हिन्हाहि। 10 नेलाइदोफा दुसुलि द्वाको दोअ्तेङ केलाइ नितिमन्हिसिङ परमेस्वरदोफा पुकार पातेङ हिन्हाहि। आरोङ बुङ नेलाइदोफा दुसुलि निङनु नेलाइको खान्धुरता जेदोङजेदोङ काथाको कमि हि, इङको पोङघालि दोधावा। 11 एला केलाइको परमेस्वर आबा ताइमिङ रो केलाइको प्रभु इसु नेलाइकोता लोका केलाइको दामा हेप्याको। 12 जेसापा केलाइ नेलाइहेङ दाया पान्हाखे एन्सा दोङ प्रभु नेलाइहेङ एमि भेनेङदोफा रो झाराङ द्याङदोफा हेन्जाङ दाया पाका बान्हायाको। 13 एसापा वाको झाराङ पुनित जनगेलाइदोफा केलाइको प्रभु इसु ख्रिस्ट आरोङ लोलाउ वा केलाइको परमेस्वर आबाको आगाता नेलाइको कोन्धाङहेङ पुनित रो दुसमान्थुका बान्हाइयाको। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.