1 थेस्लोनिकि 2 - धिमालथेसलोनिकिता पावलको काम 1 दादाओने बाइओनेगेलाइ, केलाइ नेलाइकोता लोतेङ हिका पहर बिथाको माज्याङ दोअ्का काथा नेलाइ ताइमिङ गेसुखेना। 2 केलाइ इन्ता लोकालाम्फा फिलिप्पिको द्याङगेलाइ केलाइहेङ तु: पिहि रो केलाइको बिजेत पाहि। इदोइ काथा बुङ नेलाइ गेसुखेना। कालाउ बुङ परमेस्वर केलाइहेङ हिमत पिहि रो हेन्जाङ बिभेदि हिलाउ बुङ केलाइ नेलाइहेङ परमेस्वरको रेम्काबानाल हिङपान्हाहि। 3 केलाइको धिरपाका बिद्याता असत काथा, मारेम्का बिचार माकोनु हिदिङ छलकपट मान्थुघाहि। 4 परमेस्वर केलाइहेङ खान्धुर पातेङ दोङ रेम्काबानाल हिम्पाका जिम्मा पिहि। इदोङखातिर केलाइ वाको लाल्साता धुइन्हाखे। केलाइ द्याङगेलाइहेङ माको कालाउ बुङ केलाइको मन जाचेका परमेस्वरहेङ लेङचा पालि भोन्हाखे। 5 नेलाइ गेसुखेना, केलाइ हेअ्लाउ चाकरिको काथा मापान्हाहि, ना हिदिङ काथा निङका दिअ्काहोइ दोङ इदोइ पान्हाहि। परमेस्वर दोङ इदोइ काथाको दासि हि। 6 केलाइ ख्रिस्टको साल्तेङ दिङगिल्का जेङलाउ नेलाइ केलाइहेङ मान पासु दोअ्लि दोधाङ। कोलाउबुङ नेलाइसो रो बो हिदिङ द्याङगेलाइसो बाखिन्का माभोन्हाहि। 7 ताइको जामालाइहेङ सामार्हाइका आमाइभाइपाङ नेलाइको माझाता केलाइ नोइका जेङन्हाहि। 8 जातिङको केलाइ नेलाइहेङ हेन्जा दाया पानाङसिङ परमेस्वरको रेम्काबानाल खिनिङ माको, कालाउ केलाइको ज्यान सुदाङ नेलाइहेङ पिलि त्यार जेङका हिघान्हाहि। हाइपानु नेलाइ केलाइको भाअ्सिङ हेन्जा मोन्दा ताका हिघासुन्हा। 9 दादाओने बाइओनेगेलाइ, केलाइको पाका मिनेत नेलाइ गेकाङ हिसुन्हा। केलाइ परमेस्वरको रेम्काबानाल पारचार पालाउ केलाइहेङ गोइका आनेमानेगेलाइ नेलाइदोफा र्हेलि मागोयाको दोअ्तेङ केलाइ नितिमन्हिसिङ मादोसिङ काम पान्हाहि। 10 खान्धुरिगेलाइको आगाता हेसापा केलाइको चालचलन पुनित, धरमाति रो दुसमान्थुका हिघाहि दोअ्तेङ परमेस्वर रो नेलाइ ताइमिङ दासि हिसुन्हा। 11 नेलाइ दोङ गेसुखेना, आबा ताइको चानचामिन्दिहेङ पाका भाइपाङ नेलाइदोफा केलाइ बेभार पान्हाहि। 12 केलाइ नेलाइहेङ आर्ति पिन्हाहि, बल पिन्हाहि रो बिम्ति पान्हाहि। एन्साङ नेलाइको ज्यान परमेस्वरहेङ मोन्दाताका ज्याको। हाइपानु वा नेलाइहेङ परमेस्वरको सारभि रो प्रतापता काइका हि। 13 केलाइ परमेस्वरहेङ दिनाङ च्याबास चार्हाइन्हाखे। हाइदोनु नेलाइ केलाइसो हिङका परमेस्वरको कथन द्याङगेलाइको काथा भाइपा माको, कालाउ परमेस्वरको कथन दोङ दोअ्तेङ र्हुसुन्हा। जातिङको दोङ इदोइ परमेस्वरको कथन रो इदोइ कथन दोङ खान्धुर पाकालाइता काम पातेङ हि। 14 दादाओने बाइओनेगेलाइ, नेलाइ बुङ ख्रिस्ट इसुता खान्धुर पाका यहुदियाता हिका परमेस्वरको मन्डलिगेलाइभाइपाङ जेङका हिसुन्हा। हाइपानु यहुदियाको मन्डलिगेलाइ जेसापा यहुदिसो तु: भोगेहि, एन्साङ पातेङ नेलाइ बुङ ताइकोङ जात्याको द्याङगेलाइसो तु: भोगेसुन्हा। 15 इदोङ यहुदिगेलाइ प्रभु इसु ख्रिस्टहेङ रो आगाधुइकालाइहेङ सेअ्हि रो केलाइहेङ बुङ गिलगिल्हि। एम्बालाइ परमेस्वरहेङ मोन्दामाताका काम पाहि रो झाराङ द्याङको बिरोदि जेङहि। 16 बोजात्यागेलाइको छुटकारा ज्याको दोअ्तेङ एम्बालाइदोफा धुइलि केलाइहेङ खिचोला पिहि। एसापा एम्बालाइ झन झन हेन्जाङ कुकरम पाकाताङ हानेहि। कालाउ आखिरता परमेस्वरको चेर एम्बालाइर्हुता परेका हि। थेसलोनिगेलाइहेङ दुसुलि पावलको लाल्सा 17 दादाओने बाइओनेगेलाइ, नेलाइसो जिउता खेङन्हालाउ बुङ केलाइ कोन्धाङसो खेङन्हाका मान्थुन्हाहि। केलाइ नेलाइहेङ दुसुलि हेन्जाङ बाराका लाल्सा पाका हिन्हाहि। 18 केलाइ नेलाइकोता लोलि भोका हिघान्हाहि। का पावलचाहिँ घुरिघुरि लोलि भोघा, कालाउ दियाबलस केलाइहेङ लोलि मापिहि। 19 केलाइको प्रभु इसु जेलाउ ल्वावा, इङको पहर वाको आगाता केलाइको आस, लेङ, मान निङका सिरपेच नेलाइ दोङ, माको कुनु? 20 जातिङकोङ केलाइको प्रताप रो लेङचाका नेलाइ दोङ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.