1 थेस्लोनिकि 1 - धिमाल1 परमेस्वर आबा रो प्रभु इसु ख्रिस्टता थेसलोनिकिता हिका मन्डलिगेलाइहेङ केलाइ पावल, सिलास रो तिमोथिसो इदोइ चिठि लेखेदोङन्हाखे। परमेस्वर नेलाइहेङ निगाहा रो सान्ति प्याको। थेसलोनिकिगेलाइको खान्धुरि 2 केलाइ नेलाइ झाराङको भाअ्सिङ परमेस्वरहेङ दिनाङ च्याबास चार्हाइन्हाखे रो पुकार पालाउ जेलाउ बुङ नेलाइहेङ फोमपान्हाखे। 3 केलाइको परमेस्वर आबाको आगाता नेलाइको खान्धुरसो पाका काम रो मायाहोइ पाका मिनेत कालाउ केलाइको प्रभु इसु ख्रिस्टता ताअ्का आसता तु: साहेका केलाइ दिनाङ फोमपातेङ हिन्हाखे। 4 परमेस्वरको दायाका दादाओने बाइओनेगेलाइ, नेलाइहेङ वादोङ ताइको द्याङ बान्हाइलि साल्का दोअ्तेङ केलाइ गिन्हाखे। 5 हाइदोनु केलाइ नेलाइहेङ हिङपाका रेम्काबानाल बिथाको काथा खिनिङ मान्थुघाहि। कालाउ पुनित हाङसा रो सरबङहोइ हिङपाका जातिङको कथन हिघाहि। नेलाइको माझाता हिलाउ नेलाइकोङ भाअ्सिङ केलाइ हिसिका खाल्को द्याङ हिघान्हाहि दोअ्तेङ इङको नेलाइ दोङ गेसुखेना। 6 नेलाइ केलाइभाइपाङ कालाउ प्रभु भाइपाङ चलितेङ तु:ता बुङ पुनित हाङसासो लेङचातेङ रेम्का बानालहेङ पिताइसुन्हा। 7 इदोइभाअ्सिङ नेलाइ माकेडोनिया रो अखैयाता झाराङ खान्धुरिगेलाइको माझाता नामुना जेङसुन्हा। 8 हाइदोनु नेलाइसो प्रभुको कथन माकेडोनिया रो अखैयाता खिनिङ पारचार जेङका माको, कालाउ परमेस्वरर्हुता नेलाइको पाका खान्धुर गोताङ थामेता फाइलेका हि। इदोइ बारेता केलाइहेङ बो हाइदोङ दोअ्लि दारकार मान्थु। 9 केलाइ नेलाइकोता लोलाउ नेलाइ हेसापा केलाइहेङ सेउपासुन्हा, कालाउ नेलाइको दिरदिराङहेङ पुजिलि लाअ्तेङ सिन्हुका रो जातिङको परमेस्वरको चाकर पालि घुरेसुन्हा, इदोइ ते इङको द्याङगेलाइ दोङ दोअ्खे। 10 कालाउ नेलाइ सादेलसो लोका परमेस्वरको चानको दामा खान्तेङ हिसुन्हा आङ दोअ्तेङ एम्बालाइ दोअ्हि। परमेस्वर ताइको चान इसुहेङ सिकासो सिन्हुपाहि रो वा दोङ केलाइहेङ परमेस्वरको लोलि तोम्का चेरसो सिन्हुपावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.