1पतरुस 4 - धिमालपरमेस्वरको भाअ्सिङ सिन्हुलि 1 जेसापा ख्रिस्ट जिउता तु: सहेहि, एन्सा पातेङ नेलाइ बुङ तु: सहेलि त्यार जेङसु। हाइदोनु जाइ जिउता तु: भोगेखे इङको कुकरम पालि लाअ्का हिखे। 2 एलासो इदोइ ज्यान हिपाधाउ द्याङको भाइपा मारेम्का लाल्साआन्सार माको, कालाउ परमेस्वरको लाल्साआन्सार ताइको ज्यान दोपासु। 3 लाम्फा नेलाइ बोजात्याको द्याङगेलाइ भाइपाङ मारेम्का चालामालाता चले घासुन्हा। कालाउ नेलाइ सारा हिघासुन्हा, जिउको लाल्साआन्सार चलेघासुन्हा, म्हातेङ हिगिल्घासुन्हा, मोजमाजा पाघासुन्हा, गोराको भतेर चालाइघासुन्हा रो आखेका दिरगेलाइहेङ पुजिसुघाना। 4 एसापा नेलाइ एम्बालाइदोफा मारेम्का कामता माहिगिल्का तिङतेङ एम्बालाइ भारभुसाइखे रो नेलाइको बादनामि पाखे। 5 कालाउ सिन्हुका रो सिकालाइको निया पाका परमेस्वरको आगाता इदोइ बारेता एम्बालाइ हिसाप पिलिगोयावा। 6 इदोङखातिर सिकालाइहेङ बुङ रेम्काबानाल पारचार पान्हाहि। कोलाउ एम्बालाइ द्याङगेलाइभाइपाङ जिउता निया निङलाउ बुङ हाङसाता परमेस्वरभाइपाङ सिन्हुलि द्वाको। 7 गोताङ काथागेलाइको आखिर जेङलिङ तोम्का हि। इदोइखातिर नेलाइ ताइको मनहेङ आधिता ताअ्सु रो हुसपातेङ पुकार पासु। 8 झाराङखान्तेङ बाराका काथाचाहिँ एमि भेनेङहेङ इन्ताना पासु, हाइदोनु इन्ताना दोङ हेन्जाङ कुकरमगेलाइहेङ थुम्खे। 9 ताइको साअ्ता लोकालाइहेङ लेङचातेङ बान्साबुझाइसु। 10 परमेस्वरको निगाहाता झाराङ खाल खाल्को बर निङका हि। ताइमिको निङका बरहेङ एमि भेनेङको भालाइको भाअ्सिङ चालाइसु। 11 एदि हासुङ धुइका बर निङकाहि पानु, इङको परमेस्वर धुइका भाइपाङ धुयाको। एदि हासुङ चाकर पालि भोखे पानु, इङको परमेस्वरको पुनित हाङसाको सरबङसो चाकर पाको। एसापा नेलाइको पाका गोताङ कामगेलाइता इसु ख्रिस्टसो परमेस्वरको दोङ मिङ झाउका जेङका ह्याको। वाता दोङ गोताङ प्रताप रो सरबङ दिनाङ हितेङ ह्याको। आमेन। तु:ता लेङचासु 12 काङको दादाओने बाइओनेगेलाइ, नेलाइता बाराका तु:को जाच जेङलाउ इदोइ जेङलि मागोइका काथा जेङहि दोअ्तेङ माभारभुसाइसु। 13 कालाउ ख्रिस्टको तु:ता नेलाइ बुङ भागर्हुलि निङलाउ लेङचासु। वाको प्रताप देखाल जेङलाउ नेलाइ बुङ हेन्जाङ लेङचालि दोस्वाना। 14 नेलाइ ख्रिस्टता खान्धुर पालाउ द्याङगेलाइ नेलाइहेङ बादनामि पालाउ लेङचासु। हाइदोनु परमेस्वरको प्रतापि हाङसा नेलाइदोफा हिखे। 15 कालाउ नेलाइता हासुङ बुङ द्याङ सेअ्का, खुका, मारेम्का काम पाका रो बोमिको कामता खुर ह्वाअ्कालाइ भाइपा तु: माभोगेसु। 16 कालाउ हासुङ ख्रिस्टियान जेङनाङसिङ तु: भोगेखे पानु वा मालेदेराको, भुरुङ इङकोङ मिङता वा परमेस्वरहेङ प्रताप प्याको। 17 हाइदोनु निया जेङका पहर जेङहोइ रो परमेस्वर लाम्फा ताइकोङ द्याङगेलाइको निया पावा। एदि निया केलाइसो दोङ थालनि जेङखे पानु परमेस्वरको रेम्काबानालहेङ खान्धुर मापाकालाइको झन हिसिका दासा ज्याङ वाला? 18 धरमकिताबता इसिका लेखेन्हाका हिः “धरमाति द्याङगेलाइहेङ बान्चिपालि ते हेथे मुसकिल जेङखे पानु, परमेस्वरहेङ दोङ मामानेका कुकरमि द्याङगेलाइको दासा ते झन हिसिका ज्याङ वाला?” 19 इदोइखातिर परमेस्वरको लाल्साआन्सार तु: भोगेकालाइ रेम्का काम पाको रो एम्बालाइ सिरजाइ पाका परमेस्वरता भर ताअ्ताको। हाइपानु वा ताइको पाका कबोल जेलाउ बुङ पोङघा पावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.