1पतरुस 2 - धिमालसिन्हुका उन्ठुइ रो पुनित जात्या 1 इदोइखातिर गोताङ मारेम्का काथागेलाइ, जालझेल, दाहा रो बादनामिसो दुरेङ हिसु। 2 एलाङ खिनिङ जोन्मिका जामाल म्हितुतेङ आमाइको दुदु आम्लि भोकाभाइपाङ नेलाइ बुङ परमेस्वरको सत कथनहेङ आम्लि भोसु रो इन्तासो ताइको छुटकाराता आगा लाङतेङ हानेलि दोस्वाना। 3 हाइपानु नेलाइ ताइमिङ प्रभु हेथे दायाका हि दोअ्का काथा गिकाङ हिसुन्हा। 4 प्रभुकोता लोसु, जाइ सिन्हुका उन्थुइ हि। द्याङगेलाइ वासेहेङ काम मालागिका दोअ्तेङ थाल्हि, कालाउ बुङ परमेस्वर वासेहेङ सालन्हाका मोलहिका उन्थुइ तुल्याइहि। 5 नेलाइ बुङ इसु ख्रिस्ट भाइपाङ सिन्हुका उन्थुइ जेङतेङ लोसु रो हाङसाको थान धाम्लिको भाअ्सिङ ताइमिङहेङ सोमपिसु। इन्ता नेलाइ इसु ख्रिस्टको सामान्दाहोइ पातेङ परमेस्वरहेङ मोन्दाताका हाङसाको भोक चार्हाइका पुनित धामिको काम पास्वाना। 6 हाइदोनु धरमकिताबता इसिका लेखेन्हाका हि: “खाङसु, का साल्का हेन्जाङ दामि उन्थुइ सियोनता ताअ्का हिघा। कालाउ वाता खान्धुर पाकालाइ हेअ्लाउ लेदेरता मापर्यावा।” 7 इदोइखातिर नेलाइ खान्धुर पाकालाइको भाअ्सिङ इदोइ उन्थुइ मोलहिका हि। कालाउ खान्धुर मापाकालाइको भाअ्सिङ चाहिँ, “जेदोङ उन्थुइहेङ साअ् धामकालाइ खारेज पाहि, इङको उन्थुइचाहिँ कोन्हाको मुल उन्ठुइ जेङहि।” 8 कालाउ, “एलोङ उन्थुइ जाइ द्याङगेलाइहेङ बोखेपाखे, एलोङ उथुइ जाइ नेलाइहेङ लोङपाखे।” हाइपानु एम्बालाइ कथन मासाअ्खे रो लोङखे। एम्बालाइको भाअ्सिङ परमेस्वर इसिकाङ जेङलि तोकेपिका हि। 9 कालाउ बुङ नेलाइ ते परमेस्वर साल्का खालगेलाइ, राजाको धामिगेलाइ, पुनित जात्यागेलाइ, परमेस्वरको ताइकोङ राइतिगेलाइ एइ। वा नेलाइहेङ कितिकितिकासो वाको भारभुसाइका फासालाम्काता चुमाहि। कालाउ नेलाइ वाको भारभुसाइका कामगेलाइ पारचार पालि दोसु। 10 लाम्फा ते नेलाइ परमेस्वरको राइति मान्थुसुघान्हा, कालाउ एला नेलाइ वाको राइति जेङका हिसुन्हा। ए पहर ते नेलाइ परमेस्वरको दाया निङका मान्थुसुघाना, कालाउ एला नेलाइ दाया निङका हिसुन्हा। 11 काङको दादाओने बाइओनेगेलाइ इदोइ दुनियाता नेलाइ परदेसि रो बोमुलुकिभाइकाङ हिसुन्हा। का नेलाइहेङ बिनइ पाखा, जिउको लाल्साहेङ पोङघा पालिको भाअ्सिङ मालागेसु। इसिका लाल्सागेलाइ हाङसाको खिलापता दिनाङ फेअ्सुतेङ हिखे। 12 बोजात्यागेलाइको माझाता नेलाइको आनिबानि रेम्का ह्याको। एम्बालाइ नेलाइहेङ मारेम्का दोअ्तेङ दुसिलाउ नेलाइको रेम्का कामगेलाइ तिनाको। कालाउ परमेस्वर निया पालि लोलाउ वासेहेङ बाखिनाको। आधिनता हिलि 13 प्रभुको मानको भाअ्सिङ झाराङ राज पाकालाइको रो झाराङखान्तेङ बाराका खाबरा पाका राजाको आधिनता हिसु। 14 हाकिमगेलाइको बुङ आधिनता हिसु, हाइपानु एम्बालाइ मारेम्का काम पाकालाइहेङ दार पिलि रो रेम्का काम पाकालाइहेङ मान पालि परमेस्वरसो दिङगिलन्हाका एइ। 15 हाइपानु नेलाइ निरबुदिगेलाइ माबुझिसिङ धुइका काथागेलाइ एम्बालाइको रेम्का कामहोइ नुइगिअ्पिका परमेस्वर भोखे। 16 फुका द्याङगेलाइभाइपाङ जेङतेङ हिसु। कालाउ बुङ फुका हिघा दोअ्तेङ मारेम्का कामचाहिँ मापासु। भुरुङ परमेस्वरको कामत्या जेङसु। 17 झाराङहेङ मान पासु। खान्धुरि दादाओने बाइओनेगेलाइहेङ इन्ताना पासु। परमेस्वरदोफा थिसु रो राजाहेङ मान पासु। ख्रिस्ट तु: भोगेहि 18 कामत्यागेलाइ, ताइको माजनगेलाइको आधिनता हिसु रो ओबालाइहेङ मान पासु। नेलाइ रेम्फा पाका गिर्हिगेलाइहेङ खिनिङ माको, मारेम्फा पाका गिर्हिगेलाइहेङ बुङ मान पासु। 19 कालाउ नेलाइ भोगिलिङ मागोइका तु: बुङ परमेस्वरको लाल्सा दोङ हि दोअ्तेङ फोमपातेङ सहेसुन्हा पानु वा नेलाइहेङ सहसाम्पा प्यावा। 20 नेलाइ आखेका काम पालाउ दार भोगेलि हिदिङ बाराका काथा माको, कालाउ रेम्का काम पातेङ बुङ तु: भोगेसुन्हा पानु परमेस्वर नेलाइहेङ सहसाम्पा प्यावा। 21 हाइपानु याकोङ भाअ्सिङ परमेस्वर नेलाइहेङ काइका एइ। ख्रिस्ट बुङ नेलाइको भाअ्सिङ तु: भोगेहि रो नेलाइको भाअ्सिङ एलोङ नामुना जेङपिहि। कालाउ नेलाइ बुङ ख्रिस्टको तिङपाका दामाता तेलिगोयाङ। 22 “वा हिदिङ कुकरम मापाहि रो वाको नुइसो हासुङ बुङ धाताइका काथा माहिङहि।” 23 हासुङ वासेहेङ बादनाम पालाउ बुङ वा हासुङदोफाङ नुइ मालागेहि। हेथे तु: भोगेलि गोइलाउ बुङ वा हासुहेङ बुङ धामास मापिहि। कालाउ वा उचित निया पाका परमेस्वरता दोङ भर ताअ्हि। 24 केलाइ कुकरमको भाअ्सिङ सितेङ धरमातिको भाअ्सिङ बानच्याइने दोअ्तेङ ख्रिस्ट ताइमिङ केलाइको कुकरम फातेङ कुरुसता सिहि। एन्साङ पातेङ वाकोङ पेचारासो नेलाइ एल्का हिसुन्हा। 25 हाइदोनु नेलाइ भेरागेलाइभाइपाङ बान्दालाइगिल्का हिघासुन्हा। कालाउ एला नेलाइको हाङसाको घोका रो सामर्हाइकाकोता नेलाइ घुरितेङ लोका हिसुन्हा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.