1पतरुस 1 - धिमाल1 का इसु ख्रिस्टको साल्तेङ दिङगिल्का पत्रुससोः पोन्टस, गलातिया, कापाडोकिया, एसिया रो बिथिनिया माउजाता बोमुलुकि हानेतेङ राइन्हातेङ हिका परमेस्वरको साल्का वाको जनगेलाइहेङ इदोइ चिथि लेखेदोङखा। 2 लाम्फासोङ परमेस्वर आबा ताइको उपाइआन्सार नेलाइहेङ ताइकोङ पुनित जन जेङलि साल्हि। इसु ख्रिस्टको हितिहोइ पुनित जेङतेङ वाकोङ हुकुम नेलाइ साअलि दोसु दोअ्तेङ वा नेलाइहेङ पुनित हाङसासो ताइको बान्हाइहि। कालाउ परमेस्वर आबा नेलाइहेङ इस्तुङ निगाहा रो सान्ति प्याको। सिन्हुका आस 3 केलाइको प्रभु इसु ख्रिस्टको आबा परमेस्वरको बाखिन्का ज्याको। वा इसु ख्रिस्टहेङ सिकासो सिन्हुपातेङ परमेस्वरको हेन्जाङ दायाहोइ केलाइहेङ नावा जोलोम पिहि। इदोइखातिर केलाइको सिन्हुका आस इदोङ हि, 4 परमेस्वर आबा नेलाइको भाअ्सिङ हेअ्लाउ मामुअ्का, दगामान्थुका रो माचुअ्का सहसाम्पा सादेलता ताअ्पिका हि। 5 नेलाइ आखिरि पहरता देखाल जेङलि तोम्का छुटकाराको भाअ्सिङ खान्धुरसो परमेस्वरको सरबङसो सामर्हाइतेङ ताअ्न्हाका हिसुन्हा। 6 नेलाइ इदोइ गोताङ काथाता लेङचासु, कालाउ बुङ नेलाइ एला आतुइसा पहरको भाअ्सिङ भेभेनेङ खाल्को तु: भोगेलि गोइस्वाना। 7 याको उपाइचाहिँ नेलाइको खान्धुर जातिङको हि दोअ्तेङ तिङपालि एइ। सोना मेहोइ निखुरपान्हाखे कालाउ इङको मुअ्खे। इङको मुअ्का सोना खान्तेङ नेलाइको खान्धुर हेन्जाङ मोलको हि। हाइपानु इङको खान्धुर पाका पालि तु: पिरसो जाच पान्हाखे। इङकोन्हुअ्सो इसु ख्रिस्ट लोका दिनाता नेलाइ मान, प्रताप रो बाखिन्का निङस्वाना। 8 नेलाइ इसु ख्रिस्ट मातिङलाउ बुङ इन्ताना पासुखेना रो नेलाइ वासेहेङ तिङका मान्थु लाउबुङ खान्धुर पासुखेना। कालाउ बाखान दोङ पालि मादोका लेङहोइ नेलाइको कोन्धाङ पोङघाका हि। 9 नेलाइ वासेहेङ खान्धुर पानाङसिङ नेलाइ हाङसाको छुटकारा निङदोङसुकेना। 10 इदोइ छुटकाराको बारेता आगाधुइकालाइ भोहि कालाउ परमेस्वर नेलाइहेङ पिका छुटकाराको बारेता लाम्फासोङ दोअ्का हिघाहि। 11 आगाधुइकालाइ इङको हेसापा रो हेअ्लाउ ज्याङ दोअ्तेङ गेलि भोहि। कालाउ ख्रिस्टको पुनित हाङसा एम्बालाइहेङ वा तु: भोगेलि गोयाङ रो इङकोन्हुअ्सो बाराका मान निनावा दोअ्तेङ लाम्फा दोङ दोअ्पिका हिघाहि। 12 आगाधुइगेलाइको पाका चाकर ताइको भाअ्सिङ माको, कालाउ नेलाइको भाअ्सिङ दोअ्तेङ परमेस्वर तिङपाका हिघाहि। कालाउ आगाधुइगेलाइको धुइका कथनहेङ सादेलसो दिङगिलन्हाका पुनित हाङसाको सरबङता रेम्काबानाल पारचार पाकालाइ नेलाइहेङ रेम्फा हिङपाहि। इदोइ काथा गेलिको भाअ्सिङ सादेलचरगेलाइ बुङ हेन्जाङ चाहा पाका हि। पुनित जेङका काथा 13 इदोइखातिर काम पालिको भाअ्सिङ नेलाइको ताइको मन त्यार पासु। ताइमिङहेङ आधिनता ताअ्सु रो इसु ख्रिस्ट लोलाउ नेलाइको निङलि तोम्का सहसाम्पाता दोङ आस पासु। 14 कालाउ नेलाइ परमेस्वरको हुकुमसाअ्का चानचामिन्दि हिनाङसिङ मागेसिङ पाका मारेम्का कामगेलाइ एला मापासु। 15 कालाउ नेलाइहेङ काइका परमेस्वर पुनित हिका भाइपाङ नेलाइ बुङ गोताङ काथाता पुनित जेङसु। 16 हाइदोनु धरमकिताबता इसिका लेखेन्हाका हि, “नेलाइ पुनित जेङसु, हाइदोनु का पुनित हिघा।” 17 पुकार पालाउ नेलाइ परमेस्वरहेङ आबा दोअ्तेङ पुकार पासुखेना। वा झाराङ द्याङगेलाइको ताताइमिको पाका काम आन्सार हासुहेङ पछेपात मापासिङ झाराङको निसाफ पाखे। इदोइ दुनियाता बोमुलुकि जेङतेङ हिलाउ बुङ नेलाइ वासेहेङ मान पातेङहिसु। 18 नेलाइ दोङ गेसुखेना, नेलाइको आबाखालगेलाइको बिथाको चालचलनसो परमेस्वर नेलाइहेङ मुअ्तेङ हानेका सोना रो रुपाको भाइपा मोल तिरितेङ लाअ्पाका माको, 19 कालाउ निखोट रो खोटमान्थुका परमेस्वरको थुमा ख्रिस्टको जाङका हितिहोइ नेलाइ छुटकारा निङका हिसुन्हा। 20 परमेस्वर दुनियाहेङ सिरजाइका खान्तेङ लाम्फा दोङ ख्रिस्टहेङ साल्का हिघाहि रो नेलाइको भाअ्सिङ न्हुअ् दिनाता वा देखाल जेङहि। 21 ख्रिस्टसो नेलाइ परमेस्वरता खान्धुर पासुन्हा, जाइ वासेहेङ सिकासो सिन्हुपाहि रो वासेहेङ प्रताप पिहि, इदोइभाअ्सिङ नेलाइ खान्धुर रो आस परमेस्वरता ताअ्सुखेना। 22 एला नेलाइ सतहेङ साअ्तेङ ताइको मन चोखाइका हिसुन्हा, कालाउ ताइको दादाओने बाइओनेगेलाइहेङ ताइमिहेङ भाइपाङ इन्ताना पासु रो एमि भेनेङहेङ कोन्धाङसोङ मान पासु। 23 परमेस्वरको सिन्हुका रो दिनाङ हितेङहिका कथनसो नेलाइ नावा जेङतेङ जोल्मिका हिसुन्हा। नेलाइ मुअ्का आबाको चानचामिन्दिगेलाइ माको, कालाउ मामुअ्का आबाको चानचामिन्दिगेलाइ जेङका हिसुन्हा। 24 हाइदोनु धरमकिताबता इसिका लेखेन्हाका हि, “झाराङ द्याङगेलाइ घासिभाइकाङ हि रो एम्बालाइको इजत बुङ घासि ल्हेअ्भाइकाङ हि। घासि चुअ्खे रो ल्हेअ् हुल्खे। 25 कालाउ प्रभुको कथन जेलाउ बुङ हिखे।” कालाउ नेलाइहेङ पारचार पान्हाका रेम्काबानालको कथन इदोङ एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.