१ युहन्ना 5 - धिमालखान्धुरसो दुनिया र्हुता जितिका 1 इसु दोङ छुटकारा पिका ख्रिस्ट हि दोअ्तेङ खान्धुर पाका झाराङ परमेस्वरको जाहान एइ। कालाउ जाइ परमेस्वर आबाहेङ माया पाखे इङको चानहेङ बुङ माया पाखे। 2 केलाइ परमेस्वरहेङ माया पान्हाखे रो वाको हुकुमगेलाइ मानेन्हाखे पानु वाको जाहानहेङ माया पान्हाखे दोअ्तेङ केलाइ गेन्हाखे। 3 हाइदोनु परमेस्वरको हुकुम साअ्लि दोङ वासेहेङ माया पालि एइ। कालाउ परमेस्वरको हुकुमगेलाइ साअ्लि केलाइको भाअ्सिङ हेन्जा मुसकिल मान्थु। 4 हाइपानु परमेस्वरसो झाराङ जाहान दुनियाहेङ दोङ जितिलि द्वावा रो केलाइको खान्धुरहोइ दोङ दुनियाहेङ जितिलि द्वाङ। 5 हासु दुनियाहेङ जितिलि द्वावा कुनु? जाइ इसु ख्रिस्ट परमेस्वरको चान हि दोअ्तेङ खान्धुर पाखे वा दोङ जितिलि द्वावा। इसु ख्रिस्टको दासिगेलाइ 6 इसु ख्रिस्ट दोङ चिको भुअ्का र्हुतेङ रो कुरुसता हिति ह्याअ्पातेङ लोहि। वा चिसो खिनिङ माको, चि रो हितिसो लोहि। दासि पिका ते पुनित हाङसा दोङ हि। हाइपानु पुनित हाङसा सत हि। 7 हाइदोनु दासि पिकालाइ सुम हि: 8 एम्बालाइ पुनित हाङसा, चिको चिभुअ्का रो वाको कुरुसता होपाका हिति एइ। इदोइ सुम काथाहोइ इसु परमेस्वरको चान हि दोअ्का काथाता एमत जेङखे। 9 द्याङको पिका दासिता केलाइ खान्धुर पान्हाखे पानु परमेस्वरको दासि झन पाकाङ हि। हाइदोनु परमेस्वर दोङ ताइको चानको बारेता दासि पिका हि। 10 जाइ परमेस्वरको चानता खान्धुर पाखे, इङकोको कोन्धाङता परमेस्वर वाको चानको बारेता पिका दासिहेङ जातिङको थानिखे। कालाउ जाइ परमेस्वरहेङ खान्धुर मापाखे वा परमेस्वरहेङ असत बान्हाइखे। हाइदोनु परमेस्वर ताइको चानको बिसइता पिका दासिता इङको खान्धुर पाका मान्थुखे। 11 परमेस्वरको पिका दासि इदोइ एइ, वा केलाइहेङ असिम ज्यान पिहि। कालाउ इदोइ असिम ज्यान वाको चानता हि। 12 जाइदोफा चान हि, इङकोदोफा असिम ज्यान हि। कालाउ जाइदोफा परमेस्वरको चान मान्थु, इङकोदोफा असिम ज्यान हिलिङमादोखे। असिम ज्यानको बारेता 13 नेलाइ असिम ज्यान निङका हिसुन्हा दोअ्का काथा गेलि दोसु दोतेङ परमेस्वरको चानको मिङता खान्धुर पाका नेलाइहेङ इदोइ चिथि लेखेदोङखा। 14 केलाइ परमेस्वरको आगाता हानेलाउ हाउसेन्हाखे, हाइपानु वाको लाल्साआन्सार जेदोङ र्हेलाउ बुङ वा केलाइको काथा हिङखे। 15 कालाउ केलाइ पुकारसो जेदोङ र्हेलाउ बुङ परमेस्वर हिङखे दोअ्तेङ केलाइ खान्धुर पान्हाखे। कालाउ वादोफा केलाइ जे र्हेका हिन्हाहि इङको बुङ केलाइ निङका हिन्हाहि दोअ्तेङ खान्धुर पान्हाखे। 16 एदि हासुङ ताइको दादाओने बाइओने कुकरम पाका तिङखे, कालाउ इङको कुकरमचाहिँ सिकाता थुकापाका माको पानु, वा इङको दादाओने बाइओनेको भाअ्सिङ परमेस्वरदोफा पुकार पाप्याको। कालाउ इङकोहेङ परमेस्वर ज्यान प्यावा। कालाउ इसिका कुकरम बुङ हिखे, जाइ सिकाता थुकापाका हिखे, जाइको भाअ्सिङ हासुङ पुकार पापिलिगोयाङ दोअ्तेङ का मादोअ्ताङका। 17 गोताङ आखेका कामगेलाइ कुकरमगेलाइ एइ। कालाउ हेथे कुकरमगेलाइचाहिँ सिकाथिकापा माथुकापाखे। 18 केलाइ गेन्हाखे, परमेस्वरको जाहान जेङकालाइ हासुङ बुङ कुकरम पातेङमाहिखे दोअ्तेङ केलाइ खान्धुर पान्हाखे। हाइदोनु परमेस्वरको चान एम्बालाइहेङ जोगाइतेङ ताअ्तावा रो दुरजन इङकोहेङ हाइदोङ पालि माद्वावा। 19 केलाइ गेन्हाखे, परमेस्वरहेङ मानाल्का द्याङगेलाइ दियाबलसको खाबराता हिलाउ बुङ केलाइचाहिँ परमेस्वरको जाहान हिन्हाहि। 20 केलाइ गेन्हाखे, परमेस्वरको चान इसु ख्रिस्ट लोका हि, जाइ सत हि। वासेहेङ नाल्लि द्वाको दोअ्तेङ परमेस्वर केलाइहेङ आकिल पिका हि। केलाइ सत परमेस्वरता हिन्हाहि, हाइदोनु केलाइ वाको चान इसु ख्रिस्टता बुङ हिन्हाहि। इसु ख्रिस्ट दोङ जातिङको परमेस्वर रो असिम ज्यान हि। 21 काङको दायाका जामालाइ, ताताइमिहेङ असत दिरगेलाइसो रो एम्बालाइको बिद्यासो जोगाइतेङ ताअ्सु। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.