१ युहन्ना 4 - धिमालसत रो असत हाङसा 1 मोन्दाताकालाइ, ताइमिदोफा पुनित हाङसा हि दोअ्तेङ धुइकालाइहेङ खान्धुर मापासु, कालाउ नेलाइदोफा परमेस्वरको हाङसा एइ ना माको जाचेतेङ खाङसु। हाइदोनु हेन्जाङ असत आगाधुइकालाइ बुङ जेसोकोसोङ हानेका हि। 2 जाइ इसु ख्रिस्ट द्याङ जेङतेङ लोका एइ दोअ्तेङ मानेखे, इङकोदोफा परमेस्वरको हाङसा हिखे। इदोङसो नेलाइ परमेस्वरको हाङसाहेङ नालस्वाना। 3 इसुहेङ मन्जुर मापाका गोताङ हाङसा परमेस्वरसो माको, कालाउ इङको ख्रिस्ट दुस्मनको हाङसा एइ। जाइको बिसइता “इङको ल्वाङ” दोअ्का नेलाइ हिङकाङ हिसुन्हा। एला इङको इदोइ दुनियाता लोका हि। 4 काङको दायाका जामालाइ, नेलाइ परमेस्वरको एइ रो नेलाइ असत आगाधुइकालाइहेङ जितिका हिसुन्हा। हाइदोनु नेलाइता हितेङहिका पुनित हाङसाचाहिँ दुनियाता हिका हाङसाखान्तेङ सरबङहिका हि। 5 एम्बालाइ दुनियाको एइ, इदोइभाअ्सिङ एम्बालाइ दुनियाकोङ काथा पाखे रो दुनिया एम्बालाइको काथा हिङखे। 6 कालाउ केलाइ ते परमेस्वरको एइ। जाइ परमेस्वरहेङ नाल्खे वा केलाइको काथा हिङखे। जाइ परमेस्वरको माको, इङको केलाइको काथा माहिङखे। इदोङसो केलाइ सतको हाङसा रो आवाइपाका हाङसाहेङ नालन्हाखे। परमेस्वर माया हि 7 मोन्दाताकालाइ, केलाइ एमि भेनेङहेङ माया पाइने, हाइदोनु माया परमेस्वरसो लोखे। जाइ माया पाखे इङको परमेस्वरसो जोन्मिका एइ रो इङको परमेस्वरहेङ नाल्खे। 8 जाइ बोमिहेङ माया मापाखे इङको परमेस्वरहेङ मानाल्खे। हाइदोनु परमेस्वर माया हि। 9 परमेस्वर केलाइको माझाता ताइको माया देखाल पितेङ वा ताइको एलोङखिनिङ चान दुनियाता दिङगिल्हि। कोलाउ वासो केलाइ झाराङ सिन्हुलि द्वाको। 10 माया इदोङता हि, केलाइ परमेस्वरहेङ माया पाका माको, कालाउ वा केलाइहेङ माया पाहि रो केलाइको कुकरमको भोक जेङलिको भाअ्सिङ ताइको चान दिङगिल्हि। 11 मोन्दाताकालाइ, परमेस्वर एसापा केलाइहेङ माया पाका एइ पानु, केलाइ बुङ एमि भेनेङहेङ माया पाइने। 12 परमेस्वरहेङ हासुङ हेअ्लाउ तिङका मान्थु। एदि केलाइ एमि भेनेङहेङ माया पान्हाहि पानु परमेस्वर केलाइता ह्यावा रो वाको माया केलाइता पोङघाका हि। 13 केलाइ गेन्हाखे, केलाइ परमेस्वरता हिन्हाखे रो परमेस्वर बुङ केलाइता हिखे। हाइदोनु वा केलाइहेङ ताइको पुनित हाङसा पिका हि। 14 केलाइ तिङका हिन्हाहि रो दासि पिन्हाखे, परमेस्वर आबा ताइको चानहेङ दुनियाको छुटकारापिकाको आकारता दिङगिल्का एइ। 15 जाइ इसुहेङ परमेस्वरको चान हि दोअ्तेङ मन्जुर पाखे, वाता परमेस्वर हिखे रो वाचाहिँ परमेस्वरता हिखे। 16 एसापा केलाइ ताइमिङ बुङ परमेस्वर केलाइहेङ माया पाखे दोअ्का काथा गेन्हाखे रो इङको मायाता केलाइ खान्धुर पान्हाखे। परमेस्वर माया हि रो जाइ मायाता हिखे इङको परमेस्वरता हिखे रो परमेस्वर वाता हिखे। 17 एसापा केलाइ पोङघापाङ बोमिहेङ माया पान्हाखे रो ख्रिस्ट दुनियाता पाका भाइपाङ सहेन्हाखे पानु नियाको दिना केलाइ थिलि मागोयाङ। 18 मायाता थिका मान्थुखे, कालाउ जातिङको माया थिकाहेङ लाअ्पाखे। हाइपानु थिकाको सामान्दा ते दारदोफा हिखे, कालाउ जाइ थिखे इङको परमेस्वरहेङ पोङघापा माया मापाखे। 19 केलाइ एमि भेनेङहेङ माया पान्हाखे, हाइदोनु परमेस्वर केलाइहेङ लाम्फा माया पाहि। 20 एदि हासुङ “का परमेस्वरहेङ माया पाखा” दोअ्खे, कालाउ ताइको दादाओने बाइओनेहेङ दिगमिग पाखे पानु इङको असत एइ। हाइदोनु ताइमिको तिङका दादाओने बाइओनेहेङ माया पालि मादोखे पानु मातिङका परमेस्वरहेङ हेसापा माया पालि द्वावा? 21 ख्रिस्ट केलाइहेङ पिका हुकुम इदोङ एइ: परमेस्वरहेङ जाइ माया पाखे, इङको ताइको दादाओने बाइओनेहेङ बुङ माया पालि गोयाङ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.