१ युहन्ना 3 - धिमालपरमेस्वरको जाहान 1 हिङसु, केलाइहेङ परमेस्वर आबा हेथे हेन्जा माया पाका हि, वाको मायाहोइ केलाइ परमेस्वरको जाहान दोअ्न्हाका एइ कालाउ जतिङकोङ एइ बुङ। दुनियाको द्याङगेलाइ परमेस्वरहेङ मानालनाङसिङ एम्बालाइ केलाइहेङ बुङ मानाल्खे। 2 दायाकालाइ, एलाचाहिँ केलाइ परमेस्वरको जाहान एइ रो न्हुअ्सो केलाइ हाइ जेनाङ, इङको केलाइहेङ गेपाका मान्थु। कालाउ ख्रिस्ट लोकान्हुअ्सो केलाइ बुङ वाभाइपाङ जेनाङ। हाइदोनु ख्रिस्ट जिसिका हि केलाइ वासेहेङ इन्सिकाङ तिनाङ दोअ्तेङ केलाइ गेन्हाखे। 3 ख्रिस्ट पुनित हि रो वार्हुता आस ताअ्का झाराङ ताइमिहेङ पुनित ताअ्ताको। 4 कुकरम पाका झाराङ परमेस्वरको नियम मामानेखे। हाइदोनु नियम मामानेलि दोङ कुकरम एइ। 5 नेलाइ गेसुखेना, ख्रिस्ट द्याङगेलाइको कुकरमगेलाइ लाअ्पालि भाअ्सिङ लोका एइ। वाता हिदिङ कुकरम मान्थु। 6 इदोइभाअ्सिङ ख्रिस्टता हिका हासुङ कुकरम पातेङमाहिखे। कुकरम पातेङहिका हासुङ वासेहेङ ना तिङका हि ना ते नाल्का दोङ हि। 7 काङको दायाका जामालाइ, हिदिङ बुङ द्याङ नेलाइहेङ छलेलि मानिनाको। धरमाति काम पाका द्याङ दोङ ख्रिस्टभाइपाङ धरमाति ज्यावा। 8 जाइ कुकरम पातेङहिखे इङको दियाबलसको एइ। हाइपानु दियाबलस ते लाम्फासो दोङ कुकरम पातेङलोका हि। इदोइभाअ्सिङ दियाबलसको कामहेङ मुअ् पालि दोङ परमेस्वरको चान देखाल जेङका एइ। 9 परमेस्वरको जामाल कुकरम पातेङमाहिखे हाइदोनु वाता परमेस्वरकोङ ज्यान हिखे। वा कुकरम पातेङ हिलिङ मादोखे हाइदोनु परमेस्वर दोङ वाको आबा हि। 10 परमेस्वरको जाहान रो दियाबलसको जाहानहेङ एसापा दोङ नाल्लि दोखे। हाइपानु परमेस्वरको आगा उचित कुकरम मापाका रो ताइको दादाओने बाइओनेहेङ माया मापाकालाइचाहिँ परमेस्वरको जाहान जेङलि मादोखे। ताताइमिता माया पासु 11 नेलाइ लाम्फासो दोङ हिङका बानाल इदोइ एइ, “केलाइ ताताइमिता माया पालिगोयाङ।” 12 केलाइ कइनभाइपा माजेनाइने। वा दियाबलसको जाहान हिनाङ ताइको ओने हाबिलहेङ सेअ्हि। कइन हाइपालि ताइको ओनेहेङ सेअ्हि? हाइदोनु वाको ताइको कामगेलाइ दुरजन हिघाखे, कालाउ वाको ओनेको कामगेलाइचाहिँ धरमाति हिघाखे। 13 दादाओने बाइओनेगेलाइ, दुनिया नेलाइहेङ दिगमिग पालाउ माभारभुसाइसु। 14 केलाइ गेन्हाखे, केलाइ ते सिकासो छुटकारा जेङतेङ ज्यानता सारेन्हाका हिन्हाहि। हाइदोनु केलाइ ताइको दादाओने बाइओनेगेलाइहेङ माया पान्हाखे। जाइ माया मापाखे, इङको सिकाता हितेङहिखे। 15 ताइको दादाओने बाइओनेगेलाइहेङ दिगमिग पाका झाराङ द्याङ सेअ्का एइ। कालाउ इन्सिका द्याङ सेअ्कादोफा असिम ज्यान माहिखे दोअ्का नेलाइ दोङ गेसुखेना। 16 माया हाइ एइ दोअ्तेङ केलाइ इताङसो गेन्हाखे, ख्रिस्ट केलाइको भाअ्सिङ ताइको ज्यान पिहि। केलाइ बुङ ताइको दादाओने बाइओनेगेलाइको भाअ्सिङ ताइको ज्यान पिलिगोयाङ। 17 हासुङदोसा दुनियाको ताकाकाउरि हितेङ बुङ ताइको दादाओने बाइओनेगेलाइहेङ हारजाता हिका तिङलाउ बुङ ताइको मन थाङ पाखे पानु, हेसापा इङकोदोफा परमेस्वरको माया हिखे कुनु? 18 काङको दायाका जामालाइ, केलाइ कथन रो नुइहोइ खिनिङ माया मापाइने। कालाउ काम रो सतहोइ माया पाइने। परमेस्वरको आगा हिमत 19 इदोइसोङ केलाइ सतको द्याङगेलाइ एइ दोअ्का गेन्हाखे रो केलाइ परमेस्वरको आगाता जाअ्लि द्वाङ। 20 केलाइको कोन्धाङ केलाइहेङ कसुर पिलाउ बुङ केलाइ गेन्हाखे परमेस्वर केलाइको कोन्धाङहोइ बुझिका खान्तेङ बुङ हेन्जाङ गेखे रो वा गोताङ काथा गेखे। 21 दायाकालाइ, केलाइको कोन्धाङ केलाइहेङ कसुर मापिखे पानु केलाइ ताइमिहेङ परमेस्वरको आगा हानेलि हिमत लोखे। 22 कालाउ केलाइ जेदोङ र्हेन्हाखे इङको वासो निङन्हाखे। हाइदोनु केलाइ वाको हुकुम साअ्न्हाखे रो वासेहेङ मोन्दा ताका कामगेलाइ पान्हाखे। 23 कालाउ परमेस्वरको हुकुम इदोइ दोङ एइ। वा केलाइहेङ हुकुम पाका आन्सार केलाइ वाको चान इसु ख्रिस्टको मिङता खान्धुर पालिगोयाङ रो केलाइ एमि भेनेङहेङ माया पालिगोयाङ। 24 परमेस्वरको हुकुम मानेकालाइ झाराङ परमेस्वरताङ ह्यावा रो वाता परमेस्वर ह्यावा। वा केलाइहेङ पिका पुनित हाङसासो केलाइ गेन्हाखे, वा केलाइता बासा ह्यावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.