१ युहन्ना 2 - धिमालख्रिस्ट केलाइहेङ साघाइका 1 काङको दायाका जामालाइ, नेलाइ कुकरम मापासु दोअ्तेङ का इदोइ काथा नेलाइहेङ लेखेदोङखा। कालाउ हासुङ कुकरम पाहि पानु बुङ केलाइको भाअ्सिङ परमेस्वर आबादोफा धुइपिका एमि धरमाति इसु ख्रिस्ट हि। 2 वा केलाइको कुकरम माअ्पालिको भाअ्सिङ खिनिङ माको, कालाउ दुनियाको गोताङ द्याङगेलाइको कुकरम माअ्पालि भाअ्सिङ ताइमिङ भोक हि। 3 एदि केलाइ वाको हुकुमगेलाइ साअ्न्हाखे पानु पाकाङ केलाइ वासेहेङ नालन्हाखे दोअ्तेङ गेन्हाखे। 4 एदि हासुङ वासेहेङ नाल्खा दोअ्खे कालाउ वाको हुकुम मासाअ्खे पानु इङको असत एइ कालाउ इङकोता सत मान्थुखे। 5 कालाउ जाइ वाको कथन साअ्खे, इङको परमेस्वरहेङ जातिङकोङ माया पाखे। इदोङसो केलाइ परमेस्वरदोफा हिन्हाहि दोअ्तेङ गेन्हाङ। 6 जाइ परमेस्वर दोफा हिघा दोअ्खे वा ख्रिस्टकोङ डेगआन्सार चलेलिगोइखे। नावा हुकुम 7 काङको मोन्दाताकालाइ, का नेलाइहेङ हिदिङ नावा हुकुम माको, कालाउ इङकोङ पुरना हुकुम लेखेदोङखा, जाइ लाम्फासो नेलाइदोफाङ हिघाहि। इदोइ पुरना हुकुम नेलाइ हिङकाङ कथन एइ। 8 कोलाउबुङ एलोङ नावा हुकुम का नेलाइहेङ लेखेदोङखा, याको सत इसु ख्रिस्टता देखाल पिका हि रो नेलाइता बुङ तिङन्हाका हि, हाइदोनु कितिकितिका राम्तेङ हानेदोङखे रो जातिङको जोल्का लाम्फासो दोङ चिल्कादोङखे। 9 जाइ ताइमि जोल्काता हिघा दोअ्तेङ दोअ्खे कालाउ ताइको खान्धुरि दादाओने बाइओनेगेलाइहेङ दिगमिग पाखे पानु, इङको आरोङ बुङ कितिकितिकाता दोङ हि। 10 जाइ ताइको दादाओने बाइओनेगेलाइहेङ माया पाखे, इङकोचाहिँ जोल्काता हिखे रो इङकोता बोमिहेङ कुकरम पापाका हिदिङ काथा बुङ माहिखे। 11 कालाउ जाइ ताइको दादाओने बाइओनेगेलाइ हेङ दिगमिग पाखे, इङको कितिकितिकाता हिखे। कालाउ इङको कितिकितिकाता तेखे रो इङको हिसो हानेदोङखे, इङको मागेखे। हाइदोनु कितिकितिका इङकोहेङ मि मातिङका बान्हाइखे। 12 काङको दायाका जामालाइ, का नेलाइहेङ लेखेदोङखा, हाइदोनु वाको मिङको भाअ्सिङ नेलाइको कुकरम माफ जेङका हि। 13 आबागेलाइ, का नेलाइहेङ लेखेदोङखा, हाइदोनु लाम्फासो दोङ हितेङहिका ख्रिस्टहेङ नेलाइ नाल्सुखेना। धानागेलाइ, का नेलाइहेङ लेखेदोङखा, हाइदोनु नेलाइ इङको दुरजन दियाबलसहेङ जितिका हिसुन्हा। 14 काङको दायाका जामालाइ, का नेलाइहेङ लेखेदोङखा, हाइदोनु नेलाइ आबाहेङ नाल्का हिसुन्हा। आबागेलाइ, का नेलाइहेङ लेखेदोङखा, हाइदोनु लाम्फासो दोङ हितेङहिका ख्रिस्टहेङ नेलाइ नाल्सुखेना। धानागेलाइ, का नेलाइहेङ लेखेदोङखा, हाइदोनु नेलाइ बोल्याका हिसुन्हा, परमेस्वरको वचन नेलाइता हि रो नेलाइ इङको दुरजन दियाबलसहेङ जितिका हिसुन्हा। दुनियाहेङ माया मापालि 15 दुनिया रो दुनियाता हिका हिदि बुङ काथागेलाइहेङ माया मापासु। एदि हिदिङ द्याङ दुनियाहेङ माया पाखे पानु इङको परमेस्वरहेङ माया मापाखे। 16 हाइदोनु दुनियाता हिका गोताङ काथागेलाइ दोअ्का जिउको भोका मारेम्का काथा, मिको तिङका काथा निङलि लाल्सा पालि रो ताइको ताकाकाउरिता तुजुक पालि एइ। इदोइ गोताङ परमेस्वर आबासो मालोखे कालाउ दुनियासो लोखे। 17 दुनिया रो दुनियाको द्याङगेलाइको पाका मारेम्का लाल्सागेलाइ मुअ्तेङ हानावा। कालाउ परमेस्वरको लाल्सा पोङघा पाकालाइ दिनाङको भाअ्सिङ हितेङह्यावा। ख्रिस्ट दुस्मनको बारेता चेतानि 18 काङको दायाका जामालाइ, न्हुअ् पहर इदोङ एइ। ख्रिस्ट दुस्मन लोदोङखे दोअ्का नेलाइ हिङका हिसुन्हा। एला हेन्जाङ ख्रिस्ट बाइरि लोका हि। इदोइभाअ्सिङ केलाइ गेन्हाखे, इदोइ न्हुअ् पहर एइ। 19 एम्बालाइ केलाइको मान्थुघाहि, इङकोभाअ्सिङ एम्बालाइ केलाइहेङ लाअ्तेङ हानेहि। एदि एम्बालाइ केलाइको हिनु पाकाङ एम्बालाइ केलाइदोफाङ हितेङहिधावा। कालाउ एम्बालाइ केलाइहेङ लाअ्तेङ हानेनाङसिङ एम्बालाइ केलाइको माको दोअ्का काथा रेम्फा गेलि दोन्हाहि। 20 कालाउ नेलाइहेङचाहिँ ख्रिस्ट पुनित हाङसा पिका हिनाङ नेलाइ झाराङ सत गेसुखेना। 21 नेलाइ सतहेङ मानाल्सुखेना दोअ्तेङ का लेखेका माको, कालाउ नेलाइ सतहेङ नाल्का हिनाङसिङ हिदिबुङ असत सतसो मालोखे दोअ्तेङ नेलाइ गेका हिनाङसिङ का नेलाइहेङ लेखेका हिघा। 22 असत हासु कुनु? असत इङको एइ, जाइ इसु दोङ छुटकारा पिका ख्रिस्ट हि दोअ्का काथा इन्कार पाखे। जाइ आबा रो चानहेङ इन्कार पाखे, ख्रिस्ट दुस्मन इङकोङ एइ। 23 जाइ चानहेङ इन्कार पाखे इङको परमेस्वर आबाहेङ बुङ इन्कार पाखे। जाइ चानहेङ साअ्खे, इङको परमेस्वर आबाहेङ बुङ साअ्खे। 24 जेदोङ काथा नेलाइ लाम्फासो दोङ हिङका हिसुन्हा, इङको नेलाइता हितेङह्याको। एदि लाम्फासो दोङ हिङका इङको काथा नेलाइता हिका हिनु नेलाइ चान रो आबाता हिस्वाना। 25 वा केलाइहेङ कबोल पाका असिम ज्यान इदोङ दोङ एइ। 26 नेलाइहेङ छल पाकालाइको बारेता का इदोइ काथागेलाइ लेखेदोङखा। 27 कालाउ नेलाइचाहिँ पुनित हाङसा ख्रिस्टता निङका हिसुन्हा रो नेलाइता पुनित हाङसा हितेङहिपाधाउ हासु बुङ नेलाइहेङ धिरपालिमागोयावा। हाइदोनु पुनित हाङसा दोङ नेलाइहेङ गोताङ काथा धिरपावा। कालाउ वाको धिरपाका काथा सत हिखे रो असत माहिखे। इङकोभाअ्सिङ पुनित हाङसाको पिका बिद्या मानितेङ ख्रिस्टता हितेङ हिसु। परमेस्वरको जाहानगेलाइ 28 काङको दायाका जामालाइ, वाता हितेङहिसु, कोलाउ वा देखाल पिलाउ केलाइ हिमत निनाङ रो वा लोका इङको दिना वाको आगाता केलाइ लेदेरलि मागोयाको। 29 ख्रिस्ट धरमाति हि दोअ्का काथा नेलाइदोङ गेसुखेना। एन्सा जेङलाउ नेलाइ गेसु परमेस्वरको आगा उचित जेङका काम पाकालाइचाहिँ परमेस्वरको जाहान एइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.