१ युहन्ना 1 - धिमालज्यान पिका वचन 1 का युहन्ना इङको ज्यान पिका वचनको बारेता लेखेदोङखा। जाइ सिरजाइकाको लाम्फासोङ हिघाहि। केलाइ साल्तेङ दिङगिल्कालाइ वाको काथा हिङका हिन्हाहि, वासेहेङ मिहोइ तिङका हिन्हाहि, रेसेतेङ तिङका हिन्हाहि रो खुरहोइ साइका हिन्हाहि। 2 जेलाउ इङको ज्यान देखाल जेङहि, केलाइ तिङन्हाहि। वा असिम ज्यान हि दोअ्तेङ केलाइ नेलाइहेङ दासि पितेङ दोअ्न्हाखे। वा परमेस्वर आबादोफा हिघाहि रो केलाइकोता देखाल जेङहि। 3 केलाइ जाइ तिङका रो हिङका हिन्हाहि, इङको केलाइ नेलाइहेङ पारचार पान्हाखे, कोलाउ केलाइदोफा नेलाइको मिलाप ज्याको। केलाइको मिलापचाहिँ परमेस्वर आबा रो वाको चान इसु ख्रिस्टदोफा हि। 4 केलाइको लेङ पुरा ज्याको दोअ्तेङ दोङ केलाइ इदोइ काथागेलाइ लेखेदोङन्हाखे। परमेस्वर फाइसालामका हि 5 एला केलाइ जेदोङ बानाल इसु ख्रिस्टसो हिङका हिन्हाहि इङको बानाल नेलाइहेङ पारचार पादोङन्हाखे: परमेस्वर जोल्का हि रो वाता हेथे बुङ कितिकितिका मान्थु। 6 एदि केलाइ परमेस्वरको मिलापता हिन्हाहि दोअ्तेङ दोअ्न्हाखे कालाउ केलाइ जेलाउ बुङ आखेका काम पान्हाखे पानु, केलाइ असत धुइन्हाखे रो सतता माचलेन्हाखे। 7 कालाउ वा जोल्काता हिनाभाइपाङ केलाइ बुङ जोल्काता हिन्हाखे पानु, एमि भेनेङदोसा केलाइको मिलाप जेनावा रो परमेस्वरको चान इसुको हितिहोइ केलाइहेङ गोताङ कुकरमसो चोखाइ पावा। 8 एदि केलाइता कुकरम मान्थु दोअ्तेङ केलाइ दोअ्न्हाखे पानु केलाइ ताइमिङहेङ छल पान्हाखे रो केलाइता सत मान्थुखे। 9 कालाउ केलाइ ताइको कुकरमगेलाइ साअ्न्हाहि पानु वा केलाइको कुकरम माफ पावा रो केलाइ पाका गोताङ अधरमाति कामगेलाइसो केलाइहेङ चोखाइ पावा। हाइपानु वा खान्धुरलाएक रो धरमाति हि। 10 एदि केलाइ कुकरम पाका मान्थुन्हाहि दोअ्तेङ केलाइ दोअ्न्हाखे पानु केलाइ परमेस्वरहेङ असत ठर्हाइन्हाखे रो वाको वचन केलाइदोफा माह्यावा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.