1 कोरिन्थि 9 - धिमालसाल्तेङ दिङगिल्काको खाबरा 1 हाइ का फुक्का मान्थुघा? हाइ का साल्तेङ दिङगिल्का माको? हाइ का केलाइको प्रभु इसु ख्रिस्टहेङ तिङका मान्थुघा? हाइ नेलाइ दोङ काङको पाका कामसो प्रभुहेङ खान्धुर पाका माको कुनु? 2 का बो द्याङगेलाइको भाअ्सिङ साल्तेङ दिङगिल्का माकोलाउ बुङ नेलाइको भाअ्सिङ ते साल्तेङ दिङगिल्का दोङ एइ। हाइदोनु नेलाइ ख्रिस्टता हिका काथासो दोङ का साल्तेङ दिङगिल्का एइ दोअ्तेङ दासि पिखे। 3 काङको खिलापता धुइकालाइहेङ का इदोङ काथा दोअ्ताङका, 4 हाइ केलाइको पाका कामसो केलाइहेङ चाकाआम्का खाबारा मान्थु कुनु? 5 हाइ पत्रुस, प्रभुकोङ ओनेगेलाइ रो बो साल्तेङ दिङगिल्कालाइ भाइपाङ केलाइहेङ बुङ बेअ् चुम्गिल्तेङ हिगिल्का खाबारा मान्थु कुनु? 6 हाइ ताइको हेमुङ भेलपालिको भाअ्सिङ बारनाबास रो का खिनिङ काम पालि गोइका कुनु? 7 हाइ पल्टनता हिलाउ सिपाल्हाइ ताइको खारचा ताइमिङ बेहोरेखे कुनु? हाइ आङगुरबारिता काम पाकालाइ आङगुर चालि मानिनावा कुनु? हाइ गाइ पोसेकेलाइ ताइको गाइको दुधे आम्लि मानिनावा कुनु? 8 इदोइ का द्याङको बिचारसो खिनिङ दोअ्का माको, मोसाको नियम बुङ एसाङ दोअ्खे। 9 हाइदोनु मोसाहेङ पिका नियमता इसिका लेखेन्हाका हि, “दाउनि झिपालाउ पियाको नुइता मोहोला मालागाइसु।” हाइ इदोइ काथा परमेस्वर पियागेलाइको भाअ्सिङ खिनिङ दोअ्का कुनु? 10 हाइ वा केलाइको भाअ्सिङ दोङ दोअ्का माको कुनु? इदोइ काथा केलाइको भाअ्सिङ दोङ दोअ्का एइ। हाइपानु मिलिङ चोइकालाइ बालिको आसता रो झिपाकालाइ जेला निङका आस ताअ्तेङ दोङ दाउनि झिपाखे। 11 केलाइ ते नेलाइको माझाता हाङसाको चालाइ बिअ्का हिन्हाहि। हाइ केलाइ नेलाइसो गोइका चिज निङलि हिदिङ भारभुसाइका काथा एइ कुनु? 12 एदि बोगेलाइ नेलाइसो हाइदोङ गोइका चिज निङलि दोनु किधिमि झन हेन्जा निङलि गोइका माको कुनु? कालाउ केलाइ इदोइ खाबारा माचालाइन्हाहि। ख्रिस्टको रेम्काबानाल हिम्पालि हिदिङ बाधा माज्याको दोअ्तेङ दोङ केलाइ गोताङ काथा सहितेङ हितेङ हिन्हाहि। 13 थानता काम पाकालाइ थानसोङ चालि निङखे। भोग पिका थामेता काम पाकालाइ भोग पिका थामेसोङ ताइको आसि निङखे दोअ्का काथा हाइ नेलाइ मागेसुखेना? 14 एसापा दोङ रेम्काबानाल पारचार पाकालाइ रेम्का बानालसोङ चालि लागाइलि निनाको दोअ्का प्रभु हुकुम पिका हि। 15 कालाउ का एलाथिकापा हिदिङ खाबारा चालाइका मान्थुघा रो एला बुङ इदोइ चिथि लेखेतेङ ताइको खाबरा चालाइलि भोका माको। एसा पाका खाङतेङ ते भुरुङ का सिलि दोङ रेम्का ज्याङ। हासुङ काङको इदोइ काथाहेङ तुजुक माथान्याको। 16 रेम्काबानाल हिम्पालाउ का तुजुक पालि गोइका हाइदोङ खाबरा मान्थु, हाइपानु इसिका काथा का पालिङ गोयाङ। एदि का द्याङगेलाइहेङ रेम्काबानाल माहिम्पाघा पानु का दार भोगेलिङ गोयाङका। 17 का इदोइ काम ताइमिङ साल्का हिनु इदोइसो हाइदोङ निङलि आस ताअ्धाङका। कालाउ इदोइ कामहेङ का ताइकोङ काम फोमपातेङ पादोङखा। हाइपानु परमेस्वर दोङ कासेहेङ इदोइ काम पालि जिमा पिका हि। 18 एन्सा पानु काङको इनामचाहिँ हाइ एइ कुनु? खाबारा आन्सार निङका हिदिङ इनाम मार्हुसिङ एन्साङ रेम्काबानाल पारचार पालि निङलि दोङ काङको इनाम एइ। 19 हाइदोनु का फुका माको कौलाउबुङ हेन्जाङहेङ ख्रिस्टता खान्धुर पापालि का झाराङको बान्धाइभाइपाङ जेङका हिघा। 20 का यहुदिगेलाइदोफा एम्बालाइहेङ ख्रिस्ता चुमालि दोअ्तेङ यहुदिगेलाइ भाइकाङ जेङघा। एन्सापा का मोसाको नियमको बसता मान्थुलाउ बुङ मोसाको नियमता हिकालाइदोफा हिलाउ एम्बालाइहेङ ख्रिस्टता चुमालि दोअ्तेङ एम्बालाइ भाइकाङ जेङघा। 21 का नियम मामानेका बोजात्यागेलाइको माझाता काम पालाउ एम्बालाइ बुङ ख्रिस्टहेङ खान्धुर पाको दोअ्तेङ का बुङ एम्बालाइभाइपाङ जेङखा। याको माने का परमेस्वरको नियम मामानेखा दोअ्का माको, कालाउ का ते ख्रिस्टको नियम मानेखा। 22 का निरधो द्याङगेलाइको माझाता काम पालाउ एम्बालाइ ख्रिस्टता खान्धुर पाको दोअ्तेङ का बुङ एम्बालाइ भाइपाङ निरधो जेङखा। एसापा झाराङ द्याङगेलाइ ख्रिस्ता नावा ज्यान निनाको दोअ्तेङ का द्याङगेलाइको आगाता गोताङ थोक जेङघा। 23 रेम्काबानालसो सहसाम्पा निङलि द्वाको दोअ्तेङ दोङ रेम्काबानालको भाअ्सिङ का इदोइ गोताङ थोक पादोङखा। 24 नेलाइ दोङ गेसुखेना, धाअ्नु ते झाराङ धाअ्खे, कालाउ इनाम निङका एमि खिनिङ हिखे। एन्साङ पातेङ नेलाइ बुङ इनाम निङलिको भाअ्सिङ धाअ्सु। 25 घाकाता आसि र्हुकालाइ जिउहेङ सादाइलि दिनाङ रफत पाखे। एम्बालाइ ते मुअ्तेङ हानेका ताज निङलि एसा पाखे। कालाउ केलाइचाहिँ मामुअ्का मुकुट निङलि एसा पान्हाखे। 26 का निसाना ताकेतेङ धाअ्खा रो का एन्साङ भेरमाता माभुकुन्दिखा। 27 इदोइखातिर काङको जिउहेङ दोका झोको सादाइखा। एसा मापाघा पानु ते का बो द्याङगेलाइहेङ रेम्काबानाल हिङपालाउ ताइमिचाहिँ बिथाको द्याङ ज्याङका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.