1 कोरिन्थि 8 - धिमालदिरहेङ चार्हाइका चाकाचिज 1 एला का दिरहेङ चार्हाइका चाकाचिजको बारेता दोअ्खाः याको बारेता केलाइ झाराङ आकिल निङका हिन्हाहि। कालाउ आकिलहोइ द्याङहेङ तुजुकि बान्हाइखे रो मायाचाहिँ मिलाप चुमाखे। 2 एदि हासुङ ताइमिहेङ का जातिङको गेका हिघा दोअ्खे पानु, वा गिलिगोइका काथा हाइदोङ गेकाङ मान्थुखे। 3 कालाउ जाइ परमेस्वरहेङ माया पाखे, इङकोहेङ परमेस्वर ताइको बान्हाइखे। 4 इदोइखातिर दिरहेङ चार्हाइका चाकाचिज चालि एल ना माएल दोअ्तेङ का नेलाइहेङ दोअ्खा, केलाइ गेन्हाखे, इता ए खिनिङ परमेस्वर हि रो दुनियाता हिका दिरचाहिँ जातिङको परमेस्वर माको। 5 द्याङगेलाइ दोअ्खे, सादेल रो सुमिङता हेन्जाङ दिरराङगेलाइ हिखे। इङकोङहेङ द्याङगेलाइ दिर रो प्रभु दोअ्तेङ पुजिखे। 6 कालाउ केलाइको भाअ्सिङचाहिँ एलोङ खिनिङ परमेस्वर आबा हि। वा दोङ गोताङ थोक सिरजाइहि रो वाकोङ चाकर पालिको भाअ्सिङ केलाइ सिन्हुन्हाखे। कालाउ केलाइको भाअ्सिङ ए खिनिङ प्रभु, इसु ख्रिस्ट हि। वासो दोङ गोताङ थोक सिरजाइन्हाहि रो वासो दोङ केलाइ परमेस्वरको चाकर पान्हाखे। 7 कालाउ झाराङ खान्धुरिगेलाइ इदोइ काथा मागेखे। आधेमि द्याङगेलाइ खान्धुर पाका खान्तेङ लाम्फा इन्सिका दिरहेङ पुजिनाङ एलाबुङ एम्बालाइ चाकाचिज चालाउ दिरहेङ चार्हाइका चाकाचिज दोङ चादोङन्हाखे दोअ्तेङ फोमपाखे। एम्बालाइ रेम्का मारेम्का खेङलि मादोनाङ इन्सिका चाकाचिज चालाउ का पुनित माजेङघा दोअ्तेङ फोमपाखे। 8 चाकाचिजहोइ केलाइहेङ परमेस्वरको भेरपा थुकापालि मादोखे। कालाउ इन्सिका चाकाचिज चालाउ बुङ हाइदोङ हान्ति मान्थु रो माचालाउ बुङ हाइदोङ लाभ मान्थु। 9 कालाउ हुसपातेङ हिसु, नेलाइको चाका आम्का फुक्काहोइ खान्धुरता निरधो हिकालाइहेङ कुकरमता माचुमप्वाको। 10 निरधो खान्धुरिगेलाइ थानता दिरहेङ चार्हाइका चाका चिज चालि माएल दोअ्तेङ फोमपावा रो नेलाइ खान्धुरता बोल्याकालाइहेङ थानता चार्हाइका चाका चिज चातेङहिका तिङहि पानु, एम्बालाइ बुङ चालि मन पावा। नेलाइ गेकाङ हिसुन्हा, इङको चालि हाइदोङ हान्ति मान्थु। कालाउ इङको चाका चिजहेङ एम्बालाइ चालि माएल दोअ्तेङ फोम पातेङ ह्यावा। 11 कालाउ नाङको आकिलहोइ इङको निरधो खान्धुरि मुअ्तावा, जाइको भाअ्सिङ ख्रिस्ट सिहि। 12 एसापा नेलाइ दिरहेङ चार्हाइका चाका चिज चालाउ निरधो खान्धुरिगेलाइको मन आवाइका हि। कालाउ नेलाइ एम्बालाइको रो ख्रिस्टको खिलापता कुकरम पास्वाना। 13 इदोइखातिर दिरहेङ भोकपिका बिहा चालाउ काङको हिदिङ बुङ खान्धुरि दादा ओनेगेलाइहेङ बाधा पिखे पानु का हेअ्लाउ बुङ बिहा दोङ माचाङका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.