1 कोरिन्थि 7 - धिमालबिहुको बारेता बिद्या 1 एला का नेलाइको लेखेतेङ पिगिल्का काथाको बारेता दोअ्खा, द्याङ बिहु मापासिङ हिखे पानु रेम्का एइ। 2 कालाउ दुराचारता फासेपाका हेन्जाङ काथागेलाइ हिनाङसिङ झाराङ वाबाल द्याङको ताइको बेअ् ह्याको रो झाराङ बेबाल द्याङको बुङ ताइकोङ केअ् ह्याको। 3 कालाउ केअ् ताइ बेअ्हेङ ताइको खाबारा प्याको। बेबाल बुङ ताइ केअ्हेङ खाबारा प्याको। कालाउ न्हेमिङ एमि भेनेङको हारजा पोङघा पाको। 4 बेअ् ताइको जिउर्हुता खाबारा मापाखे, कालाउ वाको केअ्चाहिँ पाखे। एन्साङ पातेङ केअ् बुङ ताइको जिउर्हुता खाबारा मापाखे, कालाउ वाको बेअ्चाहिँ खाबारा पाखे। 5 एमि भेनेङहेङ मन्जुर मासु। आतुइसा पहरको भाअ्सिङ मतो पातेङ पुकार पालि खेङन्हातेङ हिलाउ बुङ बो पहरचाहिँ दोसाङ हिसु। माकोनुते नेलाइ ताइको मन थाम्हेलि मादोनु दियाबलस नेलाइहेङ फासेपालि माउका निनावा। 6 इदोइ काथा का नेलाइहेङ हुकुम पितेङ दोअ्का माको, कालाउ मतो पितेङ दोअ्दोङखा। 7 झाराङ द्याङ का भाइपाङ बिहु मापासिङ हिनु रेम्का जेङधावा। झाराङ परमेस्वरसो भेभेनेङ बर निङका हि। कालाउ एमि ए खाल्को रो भेनेङ भेनेङ खाल्को बर निङका हि। 8 एला का बिहुमाजेङकालाइ रो रान्दिगेलाइहेङ दोअ्दोङखा। एम्बालाइ का भाइपाङ बिहुमापासिङ हिलि दोनु रेम्का जेनावा। 9 कालाउ एम्बालाइ ताइमिहेङ बसता ताअ्लि मादोहि पानु बिहु पाको। हाइदोनु एम्बालाइ ताइको मन थामेलि मादोका खान्तेङ ते भुरुङ बिहु पालि दोङ रेम्का जेनावा। 10 एला का बिहु पालि दोकालाइहेङ इसिका हुकुम पिखा, बेअ् ताइ केअ्हेङ मालाअ्ताको। इदोइ काङको हुकुम माको, प्रभुको हुकुम एइ। 11 कालाउ केअ् बुङ ताइ बेअ्हेङ मालाअ्ताको, बेअ् ताइ केअ्हेङ लाअ्हि पानु बुङ इङको बिहु मापासिङ ह्याको माकोनु ताइ केअ्दोफाङ मिलितेङ ह्याको। 12 एला का बोगेलाइहेङ बुङ दोअ्ताङका, इदोइ काङको दोअ्का एइ, प्रभुको माको। एदि हिदिङ दादा ओनेको इसुता खान्धुर मापाका बेअ् हि रो इङको वादोफाङ हिलि भोखे पानु, वा इङकोहेङ मालाअ्ताको। 13 एन्साङ पातेङ हिदिङ बेबालको इसुता खान्धुर मापाका केअ् हि रो वा इङकोदोफाङ हिलि भोखे पानु, इङको वासेहेङ मालाअ्ताको। 14 हाइदोनु खान्धुर मापाका केअ् खान्धुर पाका बेअ्सो पुनित जेङखे रो खान्धुर मापाका बेअ्चाहिँ खान्धुरि मापाका केअ्सो पुनित जेङखे। एदि एन्सा माजेङनु एम्बालाइको चानचामिन्दिगेलाइ पुनित माजेङधावा। कालाउ एम्बालाइ ते पुनित जेङका हि। 15 कालाउ खान्धुर मापाका ताइको खान्धुरि केअ् माकोनु बेअ्हेङ लाअ्लि भोखे पानु लाअ्लि पिसु। इङको पहरचाहिँ खान्धुर पाका केअ् माकोनु बेअ् फुका जेङखे। हाइदोनु परमेस्वर केलाइहेङ सुबिस्ताता हिलि साल्का। 16 खान्धुरि बेअ् अखान्धुरि केअ्हेङ माकोनु खान्धुरि केअ् अखान्धुरि बेअ्हेङ बान्चेपालि द्वाङ बे दोअ्तेङ हासु गेलि द्वावा कुनु? 17 परमेस्वर दोङ नेलाइहेङ साल्का रो बर बुङ वा दोङ पिका एइ। नेलाइ झाराङ इङकोङआन्सार बान्चिलिगोइस्वाना। का मन्डलिगेलाइहेङ धिरपाका बिद्या बुङ इदोङ। 18 जेदोङ द्याङ खान्धुरि जेङका खान्तेङ लाम्फा दोङ खाताना पाका मान्थुहि पानु, इङको खातानाको चिन्हो मेटेपालि माभोकाको। कालाउ जेदोङ द्याङ खान्धुरि जेङका खान्तेङ लाम्फा खाताना पाका मान्थु हि पानु, इङको खाताना पालि माभोकाको। 19 हाइदोनु खतना पालि रो खाताना मापालि हाइदोङ फारा मान्थु। कालाउ परमेस्वरको हुकुम साअ्लिचाहिँ मुल काथा एइ। 20 जेदोङ हालतता परमेस्वर द्याङहेङ काइहि, इङकोङ आबास्ताता ह्याको। 21 परमेस्वर नेलाइहेङ काइका पहरता बान्धाइ हिलाउ बुङ पिर मापासु। कालाउ फुक्का जेङलि दोसुन्हा पानु फुका जेङलि चेस्ता पासु। 22 हाइदोनु जेदोङ द्याङ प्रभु काइका खान्तेङ लाम्फा बान्धाइ हिघाहि, प्रभु इङकोहेङ फुक्का द्याङ बान्हाइका हि। एन्साङ पातेङ जेदोङ द्याङ प्रभु काइका खान्तेङ लाम्फा फुक्का हिघाहि, इङको द्याङ एला ख्रिस्टको बान्धाइ जेङका हि। 23 हाइपानु परमेस्वर नेलाइहेङ दाम तिरितेङ चोल्नाङ नेलाइ द्याङगेलाइको बान्धाइ माजेङसु। 24 इदोइखातिर दादाओने बाइओनेगेलाइ, परमेस्वर जाइहेङ जेदोङ हालतता काइहि, इङको इङकोङ हालतता वाकोदोफा ह्याको। 25 एला बिहु मापाका बेजालाइको बारेता प्रभुको हुकुम कादोफा हाइदोङ मान्थु। कालाउ बुङ प्रभुको दायासो का खान्धुरलाएक हिनाङसिङ नेलाइहेङ साल्हा प्याङका। 26 एलाको तु:हेङ फोमपालाउ, जेदोङ द्याङ जिसिका हालतता हि एन्साङ हिलाउ रेम्फा जेङधाङ दोअ्तेङ का नेलाइहेङ दोअ्चाखा। 27 एदि नेलाइता हासुङ लाम्फा दोङ बिहु पाका हिसुन्हा पानु, ताइको बेअ्दोफा खेङन्हालि माभोसु। एदि नेलाइ बिहु पाका मान्थुसुन्हा पानु, बिहु पालि माभोसु। 28 कालाउ नेलाइता हासुङ बिहु पासुन्हा पानु बुङ इङकोहेङ कुकरम मालाग्याङ। एन्साङ पातेङ बिहु मापाका बेजान बिहु पालाउ बुङ इङकोहेङ कुकरम मालाग्यावा। कालाउ बिहु पाकालाइहेङ इदोइ दुनियाता झिन्झिट जेङखे। कालाउ का नेलाइहेङ जोगाइलि भोखा। 29 दादाओने बाइओनेगेलाइ, का नेलाइहेङ दोअ्लिगोइका काथा इदोइ दोङ एइ। हाइपानु प्रभु लोका पहर जेङहोइ। एलासो बेअ् हिकालाइ बुङ बेअ् मान्थुकालाइ भाइपाङ पाको। 30 सुरता पाकालाइ सुरता मापाकालाइ भाइपाङ रो लेङचाकालाइ मालेङचाकालाइ भाइपाङ पाको। कालाउ चोल्कापिअ्कालाइ ताइमिदोफा हाइदोङ मान्थुकाभाइपाङ पाको। 31 कालाउ केलाइ इदोइ दुनियाता जेदोङ पान्हाखे, इदोइ थोकगेलाइ केलाइको भाअ्सिङ हेन्जा मोलको माको दोअ्तेङ गेसु। हाइदोनु इदोइ दुनिया एला मारफाङ मुअ्तेङ हानावा। 32 नेलाइ झामेलासो छुटकारा जेङका का लाल्सा पाखा। बिहु मापाका द्याङ हेसापा प्रभुहेङ लेङचा पाङका दोअ्तेङ वाको कामता मन लागाइखे। 33 कालाउ बिहु जेङका द्याङ हेसापा ताइको बेअ्हेङ लेङचा पाङका दोअ्तेङ दुनियाको काथागेलाइता मन लागाइखे। 34 इन्सिका द्याङगेलाइको मन न्हेपाङ बाखाराइन्हाका हिखे। एन्साङ पातेङ बिहु मापाका बेजान ताइको जिउ रो हाङसा प्रभुकोङ ज्याको दोअ्तेङ वाको कामता मन लागाइखे। कालाउ बिहु पाका बेबाल हेसापा ताइ केअ्हेङ लेङचा पाङका दोअ्तेङ दुनियाको काथागेलाइता मन लागाइखे। 35 का इदोइ काथा नेलाइको भालाइको भाअ्सिङ दोङ दोअ्दोङखा। का नेलाइहेङ इसिका नियमहोइ धेउलि भोका ते माको, कालाउ नेलाइ जेदोङ रेम्का हि इङकोङ पासु रो हाइबुङ पिर मापासिङ प्रभुको चाकर पातेङ हिसु। 36 बिहुको बोइसा ढालकेलि तोम्का ताइको चामिन्दिहेङ का उचित पाका मान्थुघा दोअ्तेङ हासुङ बिचार पालि द्वावा रो बिहु पापिलिङ गोयाङ दोअ्तेङ फोमपालि द्वावा। इङको पहरता वा ताइमिङ हाइ लाल्सा पाखे इङकोङ पा:को। एम्बालाइहेङ बिहु पालि प्याको। एन्सा पालाउ कुकरम मालाग्यावा। 37 कालाउ आधेमि इसिका बोल्याका मनको बुङ हिलि द्वावा रो बिहुको हाइदोङ खाचो मान्थु दोअ्तेङ फोमपावा, वा बुङ ताइको लाल्साता फुक्कादोङ हि। एदि इङको द्याङ ताइकोचामिन्दिहेङ बिहुमापासिङ ताअ्लि भोखे पानु वा उचित दोङ पावा। 38 एन्साङ पातेङ जाइ ताइको चामिन्दिको बिहु पाखे वा रेम्काङ पावा। कालाउ जाइ ताइको चामिन्दिको बिहु मापापिखे वा झन रेम्काङ पावा। 39 ताइको केअ् सिन्हुपाङ बेअ्चाहिँ केअ्को आधिनता हिखे। कालाउ इङकोको केअ् सिहि पानु इङको हासुङदोफा आरोङ बिहु पालि द्वावा। कालाउ इङको खान्धुरि वाबालदोफा बिहु पालि गोयाङ। 40 कालाउ इङको बिहु मापासिङ हिखे पानु इङकोहेङ सुकाका ज्यावा। इदोइचाहिँ काङको ताइकोङ बिचार एइ। कालाउ का फोमपाखा काता बुङ परमेस्वरको हाङसा हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.