1 कोरिन्थि 6 - धिमालखान्धुरिगेलाइको माझाता झागारा 1 नेलाइको खान्धुरिगेलाइको माझाता झागारा जेङहि पानु, हाइ नेलाइ निसाप भोलि परमेस्वरको पुनित जनगेलाइकोता माहानेसिङ वासेहेङ खान्धुर मापाका द्याङगेलाइकोता हेसापा हानेस्वाना? 2 परमेस्वरको पुनित जनगेलाइ दोङ दुनियाको निया पावा दोअ्का हाइ नेलाइ मागेसुखेना? एदि दुनियाको निया नेलाइ दोङ पालि गोइखे पानु, म्हुइका खान्तेङ म्हुइका झागारागेलाइ मिलिपालि हाइ नेलाइ मादोस्वाना कुनु? 3 केलाइ सादेलचरको बुङ निया पाङ दोअ्का हाइ नेलाइ मागेसुखेना? एन्सानु इदोइ ज्यानको मामुलि काथागेलाइ मिलिपालि हाइदोङ माको। 4 नेलाइता इसिका झागारा जेङलाउ नियार्हेलि हाइपालि बोमिकोता हानेसुखेना? जेदोङ द्याङगेलाइहेङ ते मन्डलि हाइदोङ मोलको माथानेखे। 5 का नेलाइहेङ लेदेरता परेपालिको भाअ्सिङ इदोइ काथा दोअ्का एइ। हाइ नेलाइको ताइको दादाओने माझाता झागारा मिलिपालि दोका एअ्मि बुङ आकिल हिका द्याङ मान्थु? 6 एमि खान्धुरि दादाओने भेनेङ खान्धुरि दादाओने दोफा झागारा पाखे, कालाउ न्हुअ्सो परमेस्वरहेङ खान्धुर दोङ मापाका द्याङगेलाइता झागारा मिलिपापिसु दोअ्तेङ हानेलि? 7 नेलाइ एमि भेनेङको खिलापता मुदा पालि दोङ हारेका काथा एइ। नियालएता हानेका खान्तेङ ते भुरुङ आनिया सहेलि दोङ रेम्का रो बोमि नेलाइहेङ ठगेलि दोङ रेम्का एइ। 8 कालाउ नेलाइ ताइकोङ खान्धुरि दादाओने बाइओनेगेलाइहेङ आनिया पासुखेना रो एमि भेनेङहेङ ठगेसुखेना। 9 आसाति द्याङगेलाइ परमेस्वरको सारभिता दुल्का खाबरा मानिङखे दोअ्का हाइ नेलाइ मागेसुखेना? इदोइखातिर ताइमिङहेङ छल मापासु। इसिका छारा काम पाकालाइ, दिर पुजिकालाइ, दुराचार पाकालाइ, हिजारागेलाइ, वाबाल मागान्धाइकालाइ, 10 खुकालाइ, दिअ्कालाइ, म्हाकालाइ, काथा पोकालाइ रो लुटिकालाइ परमेस्वरको सारभिता दुल्का खाबरा मानिनावा। 11 नेलाइता हेअ्मि ए पहर इसिकाङ हिघासुन्हा। कालाउ परमेस्वर नेलाइको कुकरम झापिका हि रो पुनित पाका हि। एला प्रभु इसु ख्रिस्टको मिङता वाको हाङसासो नेलाइ परमेस्वरको आगाता धरमाति जेङका हिसुन्हा। 12 कालाउ नेलाइता आधेमि एसा दोअ्तावा, “का जेदोङ पालाउ बुङ ज्याङ।” कालाउ गोताङ काथाहोइ नेलाइहेङ भालाइ मापाङ। दोअ्नु ते का बुङ दोअ्लि द्वाङका, “का जेदोङ पालाउ बुङ ज्याङ।” कालाउ का हिदिङ काथाको बान्धाइ जेङलि माभोकाङका। 13 नेलाइ दोअ्स्वाना, “चाकाचिज हेमुङको भाअ्सिङ रो हेमुङ चाकाचिजको भाअ्सिङ एइ।” इदोइ काथा सत एइ, कालाउ परमेस्वर इदोइ न्हेमिहेङ मुअ्पावा। परमेस्वर द्याङको जिउ दुराचारको भाअ्सिङ बान्हाइका माको, कालाउ प्रभुको चाकर पालिको भाअ्सिङ बान्हाइका। कालाउ केलाइको जिउहेङ प्रभु वास्ता पावा। 14 परमेस्वर ताइको सरबङहोइ प्रभु इसुहेङ सिकासो सिन्हुपाहि, कालाउ वाकोङ सरबङहोइ केलाइहेङ बुङ सिन्हुपावा। 15 नेलाइको जिउ ख्रिस्टको आङ दोअ्तेङ हाइ नेलाइ मागेसुखेना? एन्सा नु हाइ का ख्रिस्टको आङहेङ चुम्पुतेङ कासबिरि बेबालको आङदोफा गास्याङका कुनु? इदोइ ते जेङलिङ मादोका काथा एइ। 16 कासबिरिकोता हानेका द्याङ कासबिरिदोफा एलोङ दोङ जिउ जेङखे दोअ्का हाइ नेलाइ मागेसुखेना? धरमकिताबता इसिका लेखेन्हाका हि, “इङको न्हेमिङ एलोङदोङ जिउ ज्यावा।” 17 कालाउ जाइ प्रभुदोफा ए जेङखे, इङको वाकोदोफा हाङसाता एलोङदोङ जेनावा। 18 नेलाइ दुराचारसो दुरे हिसु। बो हिदिङ कुकरम जेदोङ द्याङ पाखे, इङको ताइको जिउको खिलापता कुकरम मापाखे। कालाउ दुराचार पाका द्याङ ताइकोङ जिउको खिलापता कुकरम पाखे। 19 हाइ नेलाइको जिउ पुनित हाङसाको थान दोअ्तेङ नेलाइ मागेसुखेना? परमेस्वरको पिका पुनित हाङसा दोङ नेलाइको जिउलिअ्ता ह्यावा। एन्साजेङलाउ नेलाइ वाकोङ रो नेलाइ ताइमिङचाहिँ ताइकोङ माको। 20 हाइदोनु परमेस्वर नेलाइहेङ दाम पितेङ चोल्का। इदोइखातिर नेलाइको जिउहोइ परमेस्वरहेङ मान पासु। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.