1 कोरिन्थि 5 - धिमालदुराचारको बारेता 1 नेलाइको माझाता हेन्जाङ दुराचार हि दोअ्का काथा का हिङका हिघा। इसिका दुराचार ते खान्धुर मापाका द्याङगेलाइता बुङ मान्थुखे। नेलाइता हासुङ ताइकोङ माउसि आमाइहेङ दोङ ताअ्का हि आङ! 2 एला हेसापा नेलाइ तुजुक पास्वाना? भुरुङ उल्ताङ सुरता पासु रो इसिका काम पाका द्याङहेङ नेलाइको माझासो ओल्हेपागिल्सु। 3 का नेलाइदोफा दुरे हिलाउ बुङ काङको मन चाहिँ नेलाइदोफाङ हि। का इन्ता हिकाभाइपाङ इसिका काम पाकालाइको निया प्रभु इसुको मिङता का पालि दोका हिघा। 4 जेलाउ नेलाइ केलाइको प्रभु इसुको मिङता जोमस्वाना कोलाउ का हाङसाता नेलाइदोफाङ ह्याङका रो प्रभु इसुको सरबङ बुङ इन्ता नेलाइदोफाङ ह्यावा। 5 इङको द्याङहेङ दियाबलसकोता पिसु, कोलाउ इङकोको कुकरमि आनिबानि मुअ्ताको। कालाउ प्रभुको निया पाका दिनाता इङकोको हाङसाचाहिँ बानच्याको। 6 नेलाइको पाका तुजुक मुनासिप मान्थु। मोअ्का तोलेता आतुइसा खिनिङ साउरि मिसालाइलाउ गोताङ तोले दोङ साउरि जेङखे दोअ्का काथा नेलाइ दोङ गेसुखेना। 7 नेलाइ इदोइ पुरना कुकरमको साउरि थालगिल्लिङ गोइस्वाना कालाउ खिनिङ नेलाइ पुनित जेङस्वाना। इङकोन्हुअ्सो नेलाइ साउरि माह्वाअ्सिङ मोअ्का नावा तोलेभाइपाङ जेङस्वाना। हाइपानु केलाइहेङ छुटकारा पिका पान्था, ख्रिस्ट केलाइको भाअ्सिङ भोक जेङलिदोका हि। 8 इदोइखातिर आखेका रो कुकरमहोइ पोङघाका बास्या तोलेहोइ केलाइ लाअ्पिका पारबा मामान्याइने। कालाउ साउरि मामिसालाइका सुदो रो सतको तोलेहोइ पारबा मान्याइने। 9 का नेलाइहेङ लेखेका चिथिता दुराचारिगेलाइदोफा हिमखिम मापासु ओउ दोअ्तेङ लेखेका हिघाखा। 10 काङको दोअ्लि भोकाचाहिँ इदोइ दुनियाको दुराचार पाकालाइ, दिअ्कालाइ, खुकालाइ माकोनु बो दिरहेङ पुजिकालाइदोफा खेङन्हातेङ हिसु दोअ्का माको। एम्बालाइसो खेङन्हातेङ हिलिचाहिँ ते नेलाइ दुनियासो दोङ बाहार ओल्हेतेङ हानेलि गोइधाङ। 11 कालाउ काचाहिँ खान्धुरि ओने दोअ्तेङ दुराचार पाका, दिअ्का, दिर पुजिका, निन्दा पाका, म्हाका रो खुकालाइको बारेता दोअ्का एइ। इसिका द्याङगेलाइदोफा ते दोसाङ योम्तेङ बुङ माचासु। 12 हाइपानु परमेस्वरहेङ खान्धुर मापाका बाहारको द्याङगेलाइहेङ निया पाका काङको काम माको। कालाउ हाइ नेलाइ ताइ मन्डलिलिअ्ता हिका खान्धुरिगेलाइको निया पालि मागोयाङ कुनु? 13 परमेस्वर दोङ मन्डलि बाहारको द्याङगेलाइहेङ निया पावा। धरमकिताबता इसिका लेखेन्हाका हि, “नेलाइ ताइको माझासो आसाति द्याङहेङ ओल्हेपासु।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.