1 कोरिन्थि 4 - धिमालख्रिस्टको साल्तेङ दिङगिल्कालाइ 1 नेलाइ केलाइहेङ ख्रिस्टको चाकर रो परमेस्वरको हासुङ बुङ था मागेका काथा दोअ्का जिमा निङका दोअ्तेङ फोमपालि गोइस्वाना। 2 कालाउ इदोइ कामको खाङकाखुङका पाका जिमा निङका द्याङ खान्धुरलाएक हिलिगोयाङ। 3 एदि नेलाइता हासुङ द्याङको पाका नियासो काङको निया पाखे पानु, इङको काङको भाअ्सिङ बाराका काथा माको। कालाउ का ताइमिङ बुङ ताइको निसाप मापाखा। 4 काङको ताइकोङ दुस हाइ हि दोअ्तेङ का माग्याङका, कालाउ का जातिङको दुसमान्थुका हिघा दोअ्तेङ इदोइ काथाहोइ दासि मापिखे। कालाउ काङको पाका कामको निया पाका ते प्रभु दोङ हि। 5 इदोइभाअ्सिङ तोकेका पहरखान्तेङ लाम्फा हासुकोङ निया मापासु रो प्रभु लोपाधाउ र्हुम्सु। प्रभु दोङ कितिकितिकाता म्होअ्न्हाका गोताङ काथा फाइसालाम्काता चुमावा रो द्याङगेलाइको मनको काथागेलाइ तिङपाप्यावा। इङको पहरता झाराङ द्याङगेलाइको पाका कामको इनाम परमेस्वरसो निनावा। 6 दादाओने बाइओनेनेगेलाइ, नेलाइको भाअ्सिङ रेम्फा ज्याको दोअ्तेङ दोङ ताइको रो अपोल्लोसको उपमा पितेङ इदोइ काथा लेखेका एइ। कोलाउ केलाइसो पुनित धरमकिताबमाफिक नेलाइ सिन्हुलि धिरसु रो नेलाइता हासु बुङ ए भेनेङको खिलापता तुजुक मापासु। 7 हासु नेलाइहेङ बोखान्तेङ बाराका बान्हाइहि? हाइ नेलाइदोफा हिका गोताङ काथा परमेस्वर दोङ पिका माको कुनु? कालाउ नेलाइदोफा हिका गोताङ थोक परमेस्वरसो निङहि पानु इङकोचाहिँ बर दोङ माको भाइपा पातेङ हाइपालि तुजुक पासुखेना? 8 नेलाइ गोइका गोताङ थोक निङका हिसुन्हा आङ! नेलाइ गोताङ थोक निङतेङ गिर्हि जेङका हिसुन्हा आङ! नेलाइ केलाइबेगार दोङ राजा जेङका हिसुन्हा आङ! जातिङकोङ नेलाइ राजा जेङका हिनु ते रेम्काङ जेङधावा। कालाउ केलाइ बुङ नेलाइदोफाङ राज पाधाङ। 9 हाइदोनु कासेहेङ इसिका लागेखे: परमेस्वर केलाइ साल्तेङ दिङगिल्कालाइहेङ जितिका जुलुसता हिगिल्का रो धुमता हारेतेङ सिकादार निङकालाइ भाइपाङ झाराङ खान्तेङ न्हुअ्पाहा ताअ्का हि। कालाउ केलाइ दुनियाता सादेलचर रो द्याङगेलाइको आगाता तामासा जेङका हिन्हाहि। 10 केलाइ ख्रिस्टको भाअ्सिङ निरबुदि जेङका हिन्हाहि, कालाउ नेलाइचाहिँ ख्रिस्टता आकिलहिका जेङका हिसुन्हा। केलाइ मादोका जेङका हिन्हाहि रो नेलाइ बोल्याका जेङका हिसुन्हा। द्याङगेलाइ नेलाइहेङ मान पाखे, कालाउ केलाइहेङचाहिँ दिगमिग पाखे। 11 एला बुङ केलाइ चालि आम्लि मानिङतेङ म्हितुम्हितुपाङ हिगिलन्हाखे। केलाइदोफा होङका धाबा खेन्तारा बुङ मान्थु। केलाइ द्याङगेलाइसो दान्हाइ निङचाका हिन्हाहि रो केलाइदोफा हिका साअ् बुङ मान्थु। 12 कालाउ केलाइ चालि आम्लिको भाअ्सिङ ताइकोङ खुरहोइ काम पान्हाखे। बोमि सारापपिलाउ केलाइ एम्बालाइहेङ सहसाम्पा पिन्हाखे। द्याङगेलाइ सान्ताइलाउ केलाइ सहेपिन्हाखे। 13 द्याङगेलाइ केलाइहेङ बादनाम पालाउ केलाइ एम्बालाइहेङ बादनाम मापान्हाखे। केलाइ दुनियाको धुलामुला भाइपाङ काम मालागिका जेङका हिन्हाहि। 14 का इदोइ काथा नेलाइहेङ लेदेरपालिको भाअ्सिङ लेखेका माको, कालाउ का माया पाका ताइकोङ जामालाइहेङ भाइपाङ आरति पिलिको भाअ्सिङ लेखेका एइ। 15 हाइपानु ख्रिस्टता नेलाइहेङ खाङकाखुङका पाका ते हाजार हिलाउ बुङ आबागेलाइ ते हेन्जा मान्थुखे। कालाउ का नेलाइहेङ रेम्काबानाल पारचार पातेङ ख्रिस्ट इसुता नेलाइको आबा भाइपाङ जेङका हिघा। 16 इदोइभाअ्सिङ नेलाइ ख्रिस्ट इसुको मिङता काङको पाका भाइपाङ पासु दोअ्तेङ का नेलाइहेङ पुकार पाखा। 17 एन्साङ पातेङ काङको माया पाका प्रभुता खान्धुरिलाएक चान तिमोथिहेङ नेलाइकोता दिङगिल्दोङखा। का गोताङ थामेता रो गोताङ मन्डलिता धिरपाकाआन्सार दोङ ख्रिस्टता काङको ज्यान हिसिका हि इङकोको बारेता इङको नेलाइहेङ धिरपावा। 18 एला का नेलाइकोता माल्वाङका दोअ्का फोमपातेङ आधेमिचाहिँ तुजुकि जेङका हि। 19 कालाउ प्रभुको लाल्सा जेङहि पानु का नेलाइकोता मारफाङ ल्वाङका। कालाउ इङको तुजुकिगेलाइ जातिङकोङ परमेस्वरको रेम्का काम पादोङखे बे एम्बालाइ काथा खिनिङ पाखे इङकोको बारेता बुझ्याङका। 20 हाइपानु परमेस्वरको सारभि धुइकाता माको, कालाउ सरबङता हिखे। 21 नेलाइ हाइ भोसुखेना? का नेलाइकोता लाथि चुम्तेङ ल्वाङका बे नोइका हाङसा रो माया पाका मन चुम्तेङ ल्वाङका? |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.