1 कोरिन्थि 3 - धिमालपरमेस्वरको चाकरपाकालाइ 1 दादाओने बाइओनेगेलाइ, नेलाइदोफा धुइलाउ पुनित हाङसा निङका द्याङगेलाइदोफा धुइकाभाइपाङ का धुइलि मादोघा। कालाउ दुनियाको द्याङगेलाइ भाइपा, ख्रिस्टता दुदुआम्का जामालदोफा धुइकाभाइपाङ का धुइघा। 2 का नेलाइहेङ खान्धाइन्हाका चाकाआनेमाने माको, जामालाइभाइपाङ दुधे आम्पाघा। हाइपानु नेलाइ इङकोको भाअ्सिङ त्यार मान्थुसुघाना रो एला बुङ त्यार मान्थुसुन्हा। 3 एला बुङ नेलाइ ताइकोङ मनको लाल्सागेलाइ पोङघा पालि भाअ्सिङ खिनिङ लागितेङ हिसुन्हा। कालाउ नेलाइको माझाता एला बुङ दाहा रो चेरसुका हिदोङ हि। हाइ एन्सा जेङनु नेलाइ ताइको मनको लाल्सा आन्सार चलेका दुनियाको बो द्याङगेलाइ भाइपाङ माजेङसुन्हा कुनु? 4 हाइदोनु नेलाइता हासुङ “का पावलको द्याङ” रो भेनेङ “का अपोल्लोसको द्याङ” दोअ्खे पानु, हाइ नेलाइ दुनियाको द्याङगेलाइ भाइपाङ माजेङसुन्हा कुनु? 5 अपोल्लोस हासु एइ कुनु? पावल हासु एइ कुनु? केलाइ न्हेमिङ परमेस्वरको चाकर खिनिङ हिन्हाहि रो केलाइसो नेलाइ रेम्काबानालता खान्धुर पासुन्हा। हाइपानु प्रभु दोङ पिका कामगेलाइ केलाइ झाराङ पान्हाखे। 6 का चालाइ थिङघा कालाउ अपोल्लोस चालाइता चि हुपिहि। कालाउ चालाइ बारापाका काम ते परमेस्वर दोङ पाहि। 7 इदोइखातिर चालाइ थिङका रो चि हुपिका बाराका माको, कालाउ परमेस्वर खिनिङ बाराका हि। हाइदोनु वा दोङ चालाइहेङ सामर्हाइखे। 8 चालाइ थिङका चालाइता चि हुपिका न्हेमिङता हाइदोङ आन्तर मान्थु। परमेस्वर झाराङहेङ ताताइको पाका काम आन्सारको जेला प्यावा। 9 हाइपानु केलाइ झाराङ परमेस्वरको काम पाका खेताला हिन्हाहि रो नेलाइचाहिँ परमेस्वरको मिलिङ हिसुन्हा। कालाउ नेलाइचाहिँ परमेस्वरको साअ् हिसुन्हा। 10 परमेस्वर कासेहेङ पिका निगाहा आन्सार साअ् धामलि गेका कारिगर भाइपाङ का साअ्को जक योमपाघा रो बोचाहिँ इदोइर्हुता साअ् धामतेङ हानावा। कालाउ जाइ साअ् धामदोङखे इङको रेम्फा बिचार पातेङ साअ् धामाको। 11 हाइदोनु परमेस्वरको योमपाका एलोङदोङ जक चाहिँ इसु ख्रिस्ट हि। इदोइबेगार बो हासु बुङ भेनेङ जक योमपालि माद्वावा। 12 इदोइ जकर्हुता साअ् धाम्लाउ आधेमि सोना, रुपा रो जाङका उन्ठुइ ताअ्तेङ बान्हाइखे। आधेमि सिङसोङ, नाइम्हे रो नारा पितेङ साअ् धाम्खे। 13 झाराङ द्याङगेलाइको पाका रेम्का मारेम्का कामगेलाइ परमेस्वरको निया पाका दिनाता जाचेन्हावा। हाइदोनु इङको दिना एम्बालाइको पाका कामगेलाइ हिसिका हि दोअ्तेङ मेहोइ जाचेन्हावा। 14 एदि हिदिङ द्याङ इङको जकर्हुता पाका काम मेता ओअ्पालाउ बुङ माओअ्हि पानु वा इनाम निनावा। 15 एदि हिदिङ द्याङको काम मेहोइ ओअ्तेङ बुअ्सिरि जेङहि पानु, इङको हाइदोङ इनाम मानिनावा। कालाउ इङको ताइमिङचाहिँ मेसो खाअ्काभाइपाङ बानच्यावा। 16 नेलाइ परमेस्वरको थान रो वाको पुनित हाङसा दोङ नेलाइलिअ्ता बासा हिखे दोअ्तेङ हाइ नेलाइ मागेसुखेना? 17 एदि हासुङ परमेस्वरको थानहेङ र्हाअ्खे पानु, परमेस्वर दोङ इङकोहेङ मुअ्पावा। हाइपानु परमेस्वरको थान पुनित हि रो इङको थानचाहिँ नेलाइ दोङ एइ। 18 हासुङ ताइमिङहेङ छल मापाको। नेलाइता हासुङ इदोइ दुनियाको आकिलहिका द्याङ हिघा दोअ्तेङ फोमपाखे पानु, इङको जातिङको आकिलहिका जेङलिको भाअ्सिङ निरबुदि जेङलि गोयाङ। 19 हाइदोनु दुनियाको आकिल परमेस्वरको आगाता निरबुदि काथा एइ। धरमकिताबता इसिका लेखेन्हाका हि: “परमेस्वर इङको आकिलहिका द्याङगेलाइहेङ एम्बालाइको चालाकिता दोङ रिमावा।” 20 कालाउ आरोङ धरमकिताबता इसिका बुङ लेखेन्हाका हि: “आकिलहिकालाइको बिचार काम मालाग्याङ दोअ्तेङ प्रभु गेखे।” 21 इदोङखातिर हासुङ द्याङको पालि दोका कामता तुजुक मापाको। हाइदोनु गोताङ थोक नेलाइकोङ एइ। 22 एदि पावल, अपोल्लोस रो पत्रुस हिलाउ बुङ, माकोनु दुनिया, ज्यान रो सिका हिलाउ बुङ, माकोनु एलाको पहर रो न्हुअ्सोको पहर हिलाउ बुङ इङको गोताङ काथागेलाइ नेलाइकोङ लाभको भाअ्सिङ दोङ एइ। 23 कालाउ नेलाइचाहिँ ख्रिस्टको एइ रो ख्रिस्टचाहिँ परमेस्वरकोङ हि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.