1 कोरिन्थि 2 - धिमालख्रिस्ट क्रुसता भोक जेङका 1 दादाओने बाइओनेगेलाइ, का परमेस्वरको रेम्काबानाल पारचार पालि नेलाइकोता लोलाउ, बाबारका काथागेलाइ पातेङ आकिलहिका भाइपा नेलाइकोता मालोघा। 2 हाइपानु नेलाइदोफा हिलाउ इसु ख्रिस्ट रो वासेहेङ कुरुसता टाङगाइका काथाबेगार हाइदोङ दोअ्लि बिचार मापाघा। 3 का नेलाइकोता लोलाउ दोपामादोपा बोलधाकाङ थिकाताङ रो फिरकाताङ लोघा। 4 का नेलाइदोफा धुइलाउ रो परमेस्वरको रेम्काबानाल पारचार पालाउ हेन्जा गेका जेङतेङ बाबारका काथागेलाइ मापाघा। कालाउ परमेस्वरको हाङसा रो सरबङको पाक्का दासि पितेङ का पारचार पाघा। 5 इङकोखातिर नेलाइको खान्धुर द्याङगेलाइको आकिलता माको, कालाउ परमेस्वरको सरबङता ह्याको। 6 कौलाउबुङ खान्धुरता पुर्हिकालाइदोफा केलाइ आकिलको काथा पान्हाखे, कालाउ इङको आकिल इदोइ जुकको माको। इदोइ जुकता राज पाकालाइको आकिल बुङ माको। इदोइ राज पाकालाइ ते जोकसोङ सितेङ हानावा। 7 कालाउ केलाइ हासु बुङ मागेका परमेस्वरको आकिलको पारचार पान्हाखे, हाइपानु इदोइ काथा लाम्फा हासुहेङ बुङ तिङपाका मान्थुघाहि। इदोइ उपाइ केलाइको भालाइको भाअ्सिङ परमेस्वर दुनिया सिरजाइका पहरसो दोङ ठर्हाइका हिघाहि। 8 इदोइ जुकता राज पाकालाइ हासुङ बुङ इदोइ काथा माबुझिहि। एम्बालाइ इदोइ काथा गेका हिनु, मान निङलि गोइका प्रभुहेङ कुरुसता माटाङगाइधावा। 9 कालाउ धरम किताबता इसिका लेखेन्हाका हि, “द्याङ हेअ्लाउ मातिङका, माहिङका रो मनताङ फोम मापाका काथा दोङ परमेस्वर वासेहेङ माया पाकालाइको भाअ्सिङ त्यार पाका हि।” 10 परमेस्वर केलाइको भाअ्सिङ पुनित हाङसासो म्होअ्न्हाका काथा तिङपाका हि। हाइपानु पुनित हाङसा गोताङ काथागेलाइ भोखे रो परमेस्वरको लिअ्ताको काथागेलाइ बुङ भोखे। 11 द्याङको मनलिअ्ताको काथा वाको हाङसाबेगार बोमि हासु बुङ गेलि द्वावा कुनु? एन्सा दोङ परमेस्वरको विचार वाकोङ हाङसाबेगार बोमि हासु बुङ गेलि माद्वावा। 12 केलाइ दुनियाको हाङसा मानिङन्हाहि, कालाउ परमेस्वरको पुनित हाङसा निङका हिन्हाहि। परमेस्वर केलाइहेङ पिका गोताङ काथा गेलि द्वाको दोअ्तेङ दोङ केलाइ इदोइ निङन्हाहि। 13 इदोइखातिर केलाइ द्याङको आकिलहोइ धिरपाका काथा माधुइन्हाखे, कालाउ पुनित हाङसा धिरपाका काथागेलाइ धुइन्हाखे। कालाउ परमेस्वरको हाङसा हिका द्याङगेलाइहेङ दोङ केलाइ पुनित हाङसाको सत काथागेलाइ बुझिपान्हाखे। 14 जेदोङ द्याङदोफा पुनित हाङसा मान्थुखे, इङको परमेस्वरको हाङसाको धिरपाका काथा मार्हुखे रो इदोइ काथा इङकोको भाअ्सिङ बेकामको जेङखे। इङको इदोइ काथागेलाइ गेलि मादोखे, हाइदोनु एमि खामाल इदोइ काथागेलाइ पुनित हाङसाको साहेताहोइ खिनिङ गेलि दोखे। 15 जेदोङ द्याङदोफा पुनित हाङसा हिखे, इङको खिनिङ रेम्का रो मारेम्का काथा खेङलि द्वावा। कालाउ पुनित हाङसा मान्थुका द्याङ वासेहेङ जाचिलि माद्वावा। 16 धरमकिताबता इसिका लेखेन्हाका हि, “हासु बुङ प्रभुको मनको काथा गेलि माद्वावा, वासेहेङ हासु बुङ धिरपालि माद्वावा।” कालाउ केलाइ ते ख्रिस्टको मन निङका हिन्हाहि। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.