1 कोरिन्थि 16 - धिमालपरमेस्वरको जनगेलाइको भाअ्सिङ साघाउनि 1 एला का नेलाइहेङ यहुदियाता हिका परमेस्वरको पुनित जनगेलाइको भाअ्सिङ जोम्पालि गोइका भेटिको बारेता दोअ्ताङका। गलातियाको मन्डलिगेलाइहेङ दोअ्का भाइपाङ नेलाइ बुङ पासु। 2 गोताङ आथारको लाङ दिना नेलाइ झाराङ ताताइको कामाइसो जेथे पिलि दोसुखेना इङको खेङतेङ ताअ्सु। कालाउ का लोलाउ भेटि जोम्पालि मागोयाको। 3 का इन्ता लोलाउ जोम्पातेङ ताअ्का भेटि नेलाइको साल्का द्याङगेलाइहेङ सिफारिसचिथि दोसा इङको भेटि एम्बालाइको खुरता यरुसलेम पिगिलाङका। 4 कालाउ का बुङ हानेलि गोइलाउ एम्बालाइहेङ सुदाङ चुम्तेङ हानाङका। 5 एलाचाहिँ का सोझाङ माकेडोनिया जेङतेङ हानेलि बिचार पाका हिघा। इङकोन्हुअ्सो खिनिङ का नेलाइहेङ दुसुलि ल्वाङका। 6 इङको पहर का नेलाइकोता आधे दिना ह्याङका माकोनु चुङदिङ थिकापाङ ह्याङका वाला। एन्सालाउ का जेसोङ हानेलाउ बुङ नेलाइ कासेहेङ साघाइलि दोस्वाना। 7 हाइपानु इदोइ पहर नेलाइदोफा एघुरिङको खिनिङ दुसुका माको। कालाउ प्रभुको लाल्सा जेङहि पानु हेन्जाङ दिनाथिकापा का नेलाइदोफाङ ह्याङका दोअ्का आस पाका हिघा। 8 कालाउ पेन्तिकोसको पारबाथिकापा का एफिसस पुरता दोङ ह्याङका। 9 हाइपानु इन्ता का प्रभुको काम पाका एलोङ बाराका माउका निङका हिघा। कालाउ इन्ता बिरोध पाका खामालाइ बुङ हेन्जाङ हि। 10 तिमोथि नेलाइकोता लोलाउ वासेहेङ नेलाइकोताङ हिलि पिसु। हाइपानु इङको बुङ का भाइपाङ प्रभुको काम पादोङखे। 11 हासु बुङ इङकोहेङ मारेम्का बेभार मापाको। काता लोलाउ वासेहेङ रेम्फा साहेता पासु। हाइदोनु खान्धुरि दादा ओनेगेलाइ, बाइ ओनेगेलाइ रो का सुदाङ वाको दामा खाङतेङ हिन्हाहि। 12 केलाइको खान्धुरि अपोल्लोसहेङ, ख्रिस्टियान दादाओनेगेलाइहेङ दोफाङ चुम्तेङ नेलाइकोता ओल्हेपिलि दोअ्का हिघाखा। कालाउ वा एलाचाहिँ इन्ता लोलि मादोहि रो माउका निङतेङसाङ वा नेलाइहेङ दुसुलि पाकाङ ल्वावा। 13 हुसपातेङ हिसु, खान्धुरता लागेतेङ हिसु। मन बोल्याका बान्हाइसु रो खान्धुरता बोल्याका जेङसु। 14 नेलाइ जेदोङ पालाउ बुङ इङको गोताङ मायाता पासु। 15 दादाओने बाइओनेगेलाइ, नेलाइ स्तिफनास रो वाको साअ्जाहानहेङ नाल्सुखेना। एबालाइ अखैया माउजाता झाराङखान्तेङ लाम्फा प्रभुहेङ खान्धुरि पाकालाइ हिघाखे। ओबालाइ परमेस्वरको पुनित जनगेलाइहेङ साघाइलिको भाअ्सिङ ताइको ज्यान सुमपिका हि। 16 इसिका द्याङगेलाइको दोअ्का काथा हिङसु रो इसिकाङ काम पाका बो द्याङगेलाइको दोअ्का बुङ मानेसु दोअ्तेङ का नेलाइहेङ बिनइ पाखा। 17 कालाउ स्तिफनास, फोर्टुनाटस रो आखाइकस लोलाउ का हेन्जाङ लेङचाघा। हाइदोनु नेलाइ मान्थुलाउ बुङ ओबालाइ कासेहेङ गोइका गोताङ थोकता साहेता पाका हि। 18 ओबालाइ नेलाइहेङ भाइपाङ कासेहेङ बुङ हेन्जाङ साहेता पाका हि। नेलाइ इसिका द्याङगेलाइहेङ मान पासु। आखिरि सेउपाका 19 एसिया माउजाको खान्धुरिगेलाइ नेलाइहेङ सेउपाका पिगिल्का हि। अकिलास, प्रिस्का रो एम्बालाइको साअ्ता जोम्का झाराङ खान्धुरिगेलाइ प्रभुको मिङता नेलाइहेङ कोन्धाङसोङ सेउपाका पिगिल्का हि। 20 एन्साङ पातेङ झाराङ खान्धुरि दादाओने रो बाइओनेगेलाइ बुङ नेलाइहेङ सेउपाका पिगिल्का हि। नेलाइ बुङ एमि भेनेङहेङ माया पातेङ सेउपासु। 21 का पावल, काङको ताइकोङ खुरहोइ सेउपाका लेखेतेङ पिगिल्दोङखा। 22 जाइ प्रभुहेङ माया मापाखे इङकोहेङ परमेस्वर साराप प्यावा। केलाइको प्रभु, लोउ! 23 प्रभु इसु नेलाइहेङ दायाको दोअ्तेङ का पारथाना पाखा। 24 ख्रिस्ट इसुता काङको माया नेलाइ झाराङदोफा ह्याको। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.