1 कोरिन्थि 15 - धिमालइसु सिकासो सिन्हुका 1 दादाओने बाइओनेगेलाइ, का नेलाइहेङ पारचार पाका रेम्काबानालको बारेता आरोङ दोअ्पिलि भोखा। जेदोङ रेम्काबानाल नेलाइ र्हुसुन्हा कालाउ इङकोताङ नेलाइ आरितेङ हिसुन्हा। 2 एदि नेलाइ का पारचार पाका इदोइ रेम्काबानालता आरेतेङ हिसुन्हा पानु इङको नेलाइहेङ बान्चेपावा। माकोनुते नेलाइको पाका खान्धुर बिथाको ज्यावा। 3 हाइदोनु काङको निङका रेम्काबानालको मुल काथा दोङ नेलाइहेङ सोङपिघा। जेदोङ मुल काथा, पुनित धरमकिताबआन्सार ख्रिस्ट केलाइको कुकरमको भाअ्सिङ सिहि। 4 वा तोमता लिअ्न्हाहि रो पुनित धरमकिताबको दोअ्का आन्सार सुम्निता आरोङ सिन्हु पान्हाहि। 5 इङकोन्हुअ्सो वा पत्रुसकोता, कालाउ तेन्हे चात्याकोता देखाल पिहि। 6 वा आरोङ एलोङदोङ पहरता ना साइखान्तेङ हेन्जा खान्धुरि दादाओने बाइओनेगेलाइकोता एदोसाङ देखालपिहि। एम्बालाइता हेअ्मि सितेङ हानेहि कालाउ एला बुङ हेन्जाङ सिन्हुका दोङ हि। 7 इङकोन्हुअ्सो वा याकुबकोता रो झाराङ साल्तेङ दिङगिल्कालाइकोता देखालपिहि। 8 कालाउ झाराङखान्तेङ न्हुअ्सो काङकोता बुङ वा देखाल जेङहि। का चाहिँ पहर जेङसिङ जोन्मेका जामाल भाइकाङ हिघा। 9 साल्तेङ दिङगिल्कालाइता झाराङखान्तेङ म्हुइका का दोङ एइ। का साल्तेङ दिङगिल्का दोअ्न्हालि लाएकको मान्थुघा। हाइदोनु का परमेस्वरको मन्डलिहेङ हेन्जाङ खेदो पाघा। 10 का जाइ हिघा, ख्रिस्टको निगाहासोङ हिका हिघा रो वा कासिहेङ पाका निगाहा बिथाको माजेङहि। का बो साल्तेङ दिङगिल्कालाइ खान्तेङ हेन्जा भेम्ति ह्याअ्पाघा। कौलाउबुङ का ताइमिङ माको, कादोफाङ हितेङहिका परमेस्वरको निगाहा निङतेङ दोङ इदोइ पाघा। 11 इदोइभाअ्सिङ का पारचार पालाउ बुङ, एम्बालाइ पारचार पालाउ बुङ, केलाइ जाइ पारचार पान्हाखे, इङको काथाता नेलाइ बुङ खान्धुर पाका हिसुन्हा। सिकालाइ सिन्हुका काथा 12 केलाइ सिकालाइसो ख्रिस्ट सिन्हुहि दोअ्तेङ पारचार पान्हाखे पानु, हेसापा नेलाइता आधेमि सिकालाइ मासिन्हुखे दोअ्तेङ दोअ्लि दोस्वाना? 13 कालाउ सिकालाइ मासिन्हुखे पानु ख्रिस्ट बुङ सिकासो मासिन्हु पान्हाहि। 14 एदि ख्रिस्ट सिकासो मासिन्हुपान्हाहि पानु केलाइको पारचार पाका रेम्काबानाल बिथाको जेङधावा। कालाउ ख्रिस्टता नेलाइको पाका खान्धुर बुङ बिथाको जेङधावा। 15 एदि हासुङ मासिन्हुहि पानु केलाइ परमेस्वरको बारेता असत काथा धुइका खामाल ठर्हाइन्हाङ। हाइदोनु परमेस्वर ख्रिस्टहेङ सिकासो सिन्हुपाहि दोअ्तेङ केलाइ दोङ नेलाइहेङ दासि पिका हिन्हाहि। 16 हाइपानु एदि सिकालाइ मासिन्हुखे पानु परमेस्वर ख्रिस्टहेङ बुङ सिन्हु मापाधावा। 17 एदि ख्रिस्ट सिकासो मासिन्हुपान्हाहि पानु नेलाइको खान्धुर बिथाको हि रो नेलाइ आरोङ बुङ ताइकोङ कुकरमताङ हिसुन्हा। 18 एन्सा पानु ख्रिस्टता खान्धुर पातेङ सिकालाइ बुङ झाराङ मुअ्का जेङका हि। 19 एदि केलाइ इदोइ ज्यानको भाअ्सिङ खिनिङ ख्रिस्टता आस ताअ्न्हाखे पानु केलाइ झाराङ द्याङगेलाइ खान्तेङ हेन्जाङ नान्चि जेनाङ। 20 कालाउ ख्रिस्ट ते सितेङ आरोङ सिन्हुतेङ झाराङ खान्तेङ लाम्फा ल्होका काथा जातिङको। वा सिकालाइता सिन्हुका लाङ खामाल हिनाङ बो सिकालाइको बुङ सिन्हुपान्हाङ दोअ्का वा दोङ केलाइको दासि हि। 21 जेसापा एमि द्याङसो सिका लोहि, एन्साङ पातेङ एमि द्याङसो दोङ सिकालाइ बुङ सिन्हुतावा। 22 हाइपानु जेसापा आदमको खालता झाराङ द्याङगेलाइ स्यावा, एन्साङ पातेङ ख्रिस्टता खान्धुर पाका झाराङ द्याङगेलाइ सिकासो सिन्हु पान्हावा। 23 कालाउ झाराङ ताताइको पालाआन्सार झाराङखान्तेङ लाम्फा ख्रिस्ट सिन्हुहि। कालाउ ख्रिस्ट आरोङ घुरितेङ लोलाउ वासेहेङ खान्धुर पातेङ सितेङ हानेकालाइ झाराङ एदोसाङ सिन्हुतेङ ल्होकावा। 24 इङकोन्हुअ्सो दुनियाको न्हुअ् ज्यावा, कोलाउ ख्रिस्ट गोताङ राज पाकालाइ, खाबारा रो सरबङ हिकालाइहेङ मुअ्पातेङ वा ताइको सारभि परमेस्वर आबाहेङ सुमप्यावा। 25 ख्रिस्ट गोताङ दुस्मनहेङ ताइको खोकोइलेता माताअ्पाधाउ वा राज पालि दोङ गोयाङ। 26 कालाउ झाराङखान्तेङ न्हुअ्सोको दुस्मनचाहिँ सिका एइ, इङकोहेङ ख्रिस्ट मुअ्पावा। 27 हाइदोनु धरमकिताबता इसिका लेखेन्हाका हि, “परमेस्वर गोताङ थोकहेङ वाको आधिनता पाप्यावा।” इदोइ दोअ्काचाहिँ परमेस्वर बुङ आधिनता ह्यावा दोअ्का ते माको। कालाउ वा दोङ गोताङ काथा ख्रिस्टको आधिनता पाप्यावा दोअ्का एइ। 28 जेलाउ परमेस्वर गोताङ थोक ताइको चान ख्रिस्टको आधिनता चुमावा, कोलाउ ख्रिस्ट बुङ परमेस्वरको आधिनता ह्यावा। कालाउ परमेस्वर दोङ झाराङ र्हुता राज पावा। 29 एदि सिकालाइ आरोङ मासिन्हुहि पानु सिकालाइको भाअ्सिङ चिभुअ्काको हाइ माने जेङहि कुनु? एन्सा पातेङ एदि सिकालाइ मासिन्हुखे पानु एम्बालाइको भाअ्सिङ हाइपालि चिभुअ्लि र्हुलि कुनु? 30 एदि सिकालाइ सिन्हुताङ दोअ्तेङ खान्धुर मापान्हाङ पानु हाइपालि केलाइ इसिका खातारा मोलेलि कुनु? 31 दादाओने बाइओनेगेलाइ, नेलाइ प्रभु इसु ख्रिस्टता खान्धुर पाका हिसुन्हा दोअ्तेङ का तुजुक पाखा। इदोइखातिर का नेलाइको भाअ्सिङ दिनाङ सिकाको खातारा मोलितेङ हिघा। 32 एदि सिकालाइ आरोङ मासिन्हुहि पानु, एफिसस पुरता हिलाउ झार गुपुस भाइका द्याङगेलाइदोफा धुम पालाउ कासेहेङ हाइ लाभ जेङहि कुनु? एदि सिकालाइ आरोङ मासिन्हुहि पानु “केलाइ चाइने रो आमाइने, हाइदोनु जुम्नि ते केलाइ सिलिद्वाङ।” 33 नेलाइ इसिका काथा माआवासु, हाइदोनु आखेका सानाइतिगेलाइको सङगतहोइ एल्का द्याङ बुङ बिगिरावा। 34 हुस पासु, एला ओसो कुकरम मापासु। नेलाइको भाअ्सिङ इदोइ लेदेरलि गोइका काथा। हाइपानु नेलाइता हेअ्मि परमेस्वरहेङ नाल्काङ मान्थुसुन्हा। सितेङ आरोङ सिन्हुका जिउ 35 नेलाइता आधेमि दोअ्तावा, “हेसापा सिकालाइ आरोङ सिन्हुतावा, कालाउ सिन्हुलाउ एम्बालाइको हिसिका खाल्को जिउ ज्यावा?” 36 इसिका काथा हिअ्कालाइ निरबुदि, हाइदोनु बिअ्का चालाइ माआइपाधाउ इङको योलि मादोखे। 37 नेलाइ गोहोम माकोनु हिदिङ खाल्को चालाइ बिअ्लाउ चालाइ खिनिङ बिअ्सुखेना। कालाउ योका चालाइचाहिँ माबिअ्सुखेना। 38 कालाउ परमेस्वर ताइको लाल्साआन्सार गोताङ खाल्को चालाइगेलाइहेङ ताताइकोङ खाल्को सिङ पिखे। 39 कालाउ गोताङ जिउ एलोङदोङ खाल्को मान्थुखे। हाइपानु द्याङको जिउ ए खाल्को, गुपुसको जिउ ए खाल्को, जिह्या जुइल्हेङको जिउ ए खाल्को रो हायागेलाइको जिउ ए खाल्को हिखे। 40 आदेलता हिका तालि रो फुरुगेलाइको ताइकोङ सोबाइका आकार हिखे। कालाउ सुमिङता हिका जिबगेलाइको बुङ ताइकोङ सोबालाइ आकार हिखे। 41 बेलाको सोबाइका ए खाल्को, तालिको सोबाइका भेनेङ खाल्को रो फुरुगेलाइको सोबाइका भेनेङ खाल्को हिखे। हाइदोनु एलोङ फुरु भेनेङ फुरुखान्तेङ सोबाइकाता भेनेङ जेङखे। 42 सिकालाइ सिन्हुलाउ बुङ इसिका दोङ जेङखे। जिउ सिकान्हुअ्सो तोमता लिअ्न्हातेङ इङको आइखे रो जिउ सिन्हुतेङ आरोङ ल्होलाउ इङको हेअ्लाउ बुङ मामुअ्खे। 43 सिका जिउ लिअ्न्हालाउ मारेम्का रो सरबङ मान्थुका हिखे। कालाउ आरोङ सिका जिउ सिन्हुतेङ ल्होलाउ सोबाइका रो सरबङ हिका हिखे। 44 सिका जिउहेङ लिअ्लाउ हारा बिह्याको जिउ जेङतेङ लिअ्न्हाखे। आरोङ सिन्हुतेङ ल्होलाउ हाङसाको जिउ जेङतेङ सिन्हुतावा। हारा बिह्याको जिउ हिका भाइपाङ हाङसाको जिउ बुङ हिखे। 45 एन्साङ धरमकिताबता इसिका लेखेन्हाका हि, “लाङ द्याङ आदमचाहिँ ज्यान निङका द्याङ जेङखे।” कालाउ न्हुअ् आदम ख्रिस्टचाहिँ ज्यान पिका हाङसा दोङ हि। 46 लाङफाचाहिँ हाङसाको जिउ मालोहि। कालाउ हारा रो बिह्याको को जिउ लोहि। इङकोन्हुअ्सो खिनिङ हाङसाको जिउ लोहि। 47 परमेस्वर लाङ आदमहेङ सुमिङको भोनोसो बान्हाइहि, कालाउ न्हे आदम ख्रिस्टचाहिँ सादेलसो लोहि। 48 सुमिङको झाराङ द्याङगेलाइको जिउ सुमिङको भोनोसो बान्हाइका द्याङको जिउ भाइकाङ जेङखे। एन्साङ पातेङ सादेलता झाराङ द्याङगेलाइको जिउ सादेलसो लोका द्याङको जिउ भाइका दोङ जेङखे। 49 एला केलाइ भोनोहोइ बान्हाइका द्याङ भाइकाङ हिन्हाहि। कालाउ न्हुअ्सो केलाइ सादेलसो लोका द्याङ भाइकाङ जेनाङ। 50 दादाओने बाइओनेगेलाइ, का नेलाइहेङ दोअ्लि भोकाचाहिँ हिति रो बिहाहोइ बनेका जिउ सिखे। कालाउ इदोइ जिउ नावा माजेङपाधाउ परमेस्वरको सारभिता हेअ्लाउ हिलि मानिङखे। 51 हिङसु, का नेलाइहेङ एलोङ भेदको काथा दोअ्ताङका, केलाइ झाराङ मास्याङ, कालाउ केलाइ झाराङ फेरेन्हाङ। 52 न्हुअ् धुतुरुको गालाता, सितेङ हानेकालाइ हेअ्लाउ मासिलि गोइपा सिन्हुतावा। कालाउ मिको टिप्निता केलाइ झाराङ फेरेन्हावा। 53 हाइपानु इदोइ सिका जिउ रो आइतेङ हानेका जिउचाहिँ हेअ्लाउ बुङ मासिका रो माआइका जिउता फेरेन्हावा। 54 इदोइ सिका जिउ हेअ्लाउ बुङ मासिका जिउता फेरेन्हाका जेङलाउ, धरमकिताबता लेखेन्हाका इदोइ काथा पोङघातावा: “परमेस्वरहेङ सिका जितिलि मादोहि रो वा इङकोहेङ जितिहि।” 55 “ओइ सिका, नाङको जितिका हिसो हि? ओइ सिका, नाङको सरबङ हिता हि?” 56 सिकाको सरबङ कुकरम एइ रो कुकरमको सरबङ दोङ नियम एइ। 57 कालाउ परमेस्वरहेङ च्याबास ज्याको, जाइ केलाइहेङ केलाइको प्रभु इसु ख्रिस्टसो जिति पावा। 58 इदोइखातिर काङको मोन्दाताका दादाओने बाइओनेगेलाइ, थिर जेङतेङ प्रभुको कामता दिनाङ बार्हेतेङहानेसु। हाइपानु नेलाइ गेसुखेना, प्रभुता नेलाइको मिनेत एन्साङ माहानाङ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.