1 कोरिन्थि 14 - धिमालआगाधुइ रो राउको बरगेलाइ 1 एन्साङ पातेङ नेलाइको लाल्सा चाहिँ मायाको भाअ्सिङ रो पुनित हाङसासो निङका बरको भाअ्सिङ ज्याको। खासपातेङ आगाधुइ धुइका बरको भाअ्सिङ दिनाङ चाहा पासु। 2 हाइदोनु बो राउता धुइका द्याङदोफा माको, कालाउ परमेस्वरदोफा धुइखे। वाको दोअ्का काथा हासुङ माबुझिखे। हाइदोनु वा पुनित हाङसाको सरबङ निङतेङ म्होअ्न्हाका काथागेलाइ खिनिङ धुइखे। 3 आगाधुइ धुइका द्याङ बुझिका राउता दोङ धुइखे। कालाउ जाइ इदोइ राउ धुइखे इङको बोमिहेङ साघाइलि, हाउसाला रो सान्ति पिखे। 4 भेनेङ राउ धुइका हाङसाता ताइमिहेङ खिनिङ बोल्याका बान्हाइखे। कालाउ आगाधुइ धुइका मन्डलिको झाराङ खान्धुरिहेङ हाङसाता बोल्याका बान्हाइखे। 5 नेलाइ झाराङ भेनेङ राउ धुइसु दोअ्का का भोखा, कालाउ आरोङ नेलाइ आगाधुइ धुइसु दोअ्का का भोखा। बुझिलि मादोका भेनेङ राउता धुइकाखान्तेङ आगाधुइ धुइलि बाराका। एदि भेनेङ राउ धुइलाउ बुझिलि दोका राउता माने हेपिका द्याङ बुङ हि पानु मन्डलिहेङ भालाइ दोङ ज्यावा। 6 दादाओने बाइओनेगेलाइ, एदि का नेलाइकोता भेनेङ राउता धुइतेङलोघा, कालाउ परमेस्वरसो हिदिङ फाइसालामका, आकिल, आगाधुइ माकोनु बिद्या माचुमाघा पानु कासो नेलाइहेङ हाइ लाभ ज्यावा? 7 बासुलि माकोनु गोमाना भाइका सासमान्थुका धुइकालाइसो बुझिलि मादोका गाला ओल्हेखे पानु हाइ धुइदोङखे दोअ्तेङ हेसापा नाल्लि द्वाङ कुनु? 8 एदि धुतुरुको गाला रेम्फा माओल्हेहि पानु, धुमको भाअ्सिङ हासु त्यार ज्यावा? 9 एन्साङ पातेङ नेलाइको धुइका राउ माबुझिहि पानु हाइ दोअ्का हेसापा गेलि? कालाउ नेलाइको धुइका ते भेरमाता धुइका भाइकाङ ज्यावा। 10 इदोइ दुनियाता हेन्जाङ खालको राउगेलाइ हि। कालाउ हिदिङ राउगेलाइ बुङ माने माहिका मान्थु। 11 एन्साङ पातेङ हासुङ धुइका राउ का बुझिलि मादोघा पानु, का ते वाको भाअ्सिङ बोमुलुकि भाइपाङ ज्याङका। कालाउ वा बुङ काङको भाअ्सिङ बोमुलुकि भाइपाङ ज्वावा। 12 नेलाइ पुनित हाङसाको पिका बरगेलाइ निङलि बाराका लाल्सा पासुखेना पानु इङको बरगेलाइ हेन्जा चालाइसु। कालाउ इङकोसो मन्डलिहेङ लाभ ज्यावा। 13 इदोइखातिर भेनेङ राउ धुइका इङकोको माने हेलि दोका बरको भाअ्सिङ पुकार पाको। 14 हाइदोनु एदि का भेनेङ राउता पुकार पाखा पानु काङको हाङसा पुकार पाखे, कालाउ का हाइ दोअ्दोङखा इङको का दोङ बुझिलि मादोखा। 15 एन्साङ पातेङ एलासो का हाङसाता पुकार पाङका रो मनसो बुझिका राउता बुङ पुकार पाङका। का हाङसाता लेकाङका रो मनता बुङ लेकाङका। कालाउ का मनसो बुझिका राउता बुङ लेकाङका। 16 हाइदोनु नेलाइ हाङसाहोइ च्याबास चर्हाइलाउ बो द्याङगेलाइ माबुझिनु एम्बालाइ हेसापा “आमेन” दोअ्तावा? 17 नाङको च्याबासको पुकार हेन्जाङ रेम्का हिलाउबुङ इङकोसो बोमिहेङ हाइ दोङ लाभ माप्यावा। 18 का परमेस्वरहेङ च्याबास चर्हायाङका, हाइपानु नेलाइखान्तेङ हेन्जा का बो राउता धुइखा। 19 कालाउ मन्डलिता बो राउता ते हाजार लवज धुइकाखान्तेङ ते का बुझिका राउता ना लवज जेङलाउ बुङ बिद्या पिलाउ बुझिका राउता धुइलि भोखा। 20 दादाओने बाइओनेगेलाइ, नेलाइ फोमपालाउ जामालभाइपा माजेङसु। मारेम्का काथागेलाइता जामालभाइपाङ मागेका जेङसु। कालाउ फोमपालाउ पुर्हिका जेङसु। 21 धरमकिताबता इसिका लेखेन्हाका हि परमप्रभु एसा दोअ्खे: “भेभेनेङ राउता परदेसि द्याङगेलाइको नुइसो इदोइ द्याङगेलाइ दोफा का धुयाङका। कौलाउबु एम्बालाइ काङको काथा माहिन्हावा।” 22 भेनेङ राउता धुइकाचाहि खान्धुर पाकालाइको भाअ्सिङ माको, खान्धुर मापाकालाइको भाअ्सिङ चिनो एइ। कालाउ आगाधुइ धुइलिचाहिँ खान्धुर मापाकालाइको भाअ्सिङ माको, खान्धुर पाकालाइको भाअ्सिङ एइ। 23 एदि मन्डलिता आराधाना पालाउ नेलाइ झाराङ बो राउता धुइसुन्हा पानु इङको पहर खान्धुर मापाका रो बो द्याङगेलाइ इन्ता हिनु हाइ एम्बालाइ नेलाइहेङ उधाइका मादोअ्तावा कुनु? 24 कालाउ झाराङ आगाधुइ धुइतेङ हिका पहरता इन्ता खान्धुर मापाकालाइ रो बो द्याङगेलाइ लोहि पानु, नेलाइको दोअ्का काथा हिङतेङ एम्बालाइ ताइमिङ केलाइ कुकरमि हिन्हाहि दोअ्तेङ ग्यावा। कालाउ एम्बालाइ ताइको कुकरम माअ्पालि परमेस्वर भारि घुरेलि मन पावा। 25 इङकोन्हुअ्सो एम्बालाइको मनलिअ्ता म्होअ्न्हाका काथागेलाइ बुङ देखाल ज्यावा। कालाउ एम्बालाइ ताइको तिर्हो थोतेङ दोअ्तावा, “जातिङकोङ परमेस्वर इदोइ द्याङगेलाइको माझाता हि।” आराधाना पाका बिधि 26 दादाओने बाइओनेगेलाइ, का दोअ्लि भोका इदोङ एइ, नेलाइ मन्डलिता एदोसा जोम्लाउ आधेमिदोफा ले लेका बर हिलिदोखे, आधेमिदोफा बिद्या पिका काथा हिलिदोखे, आधेमिदोफा परमेस्वरको तिङपिका काथा हिलिदोखे, आधेमिदोफा बो राउता धुइलिदोका बर हिखे। आधेमिदोफा इङकोको माने हेपिका बर हिलि दोखे। इदोइ गोताङ काथाहोइ मन्डलिको खान्धुरिगेलाइको खान्धुर बोल्याका बान्हाइखे। 27 एदि हासुङ बो राउ धुइलि भोखे पानु न्हेमि माकोनु सुमि झोको खिनिङ पाला पातेङ धुयाको। कालाउ हासुङ एम्बालाइको धुइका भेनेङ राउको माने हेप्याको। 28 कालाउ इन्ता इङकोको माने हेपिका हासुङ मान्थुहि पानु भेनेङ राउ धुइका मन्डलिता सिपापा ह्याको। कालाउ इङको ताइमिङदोफा रो परमेस्वरदोफा धुयाको। 29 आगाधुइ धुइकालाइ बुङ न्हेमि माकोनु सुमि झोको खिनिङ ह्याको। कालाउ बोगेलाइचाहिँ एम्बालाइको धुइका काथा रेम्फा हिनाको रो जाच पाको। 30 कालाउ इन्ता हिका हिदिङ एमिहेङ परमेस्वर हिदिङ काथाता फाइसालामका पितेङ धुइलि लागाइहि पानु लाङफा धुइतेङहिका द्याङ सिपापा ह्याको। 31 नेलाइ झाराङ पालापातेङ आगाधुइ धुइलि दोस्वाना। कालाउ हिङकालाइ धिरावा रो हाउसा निनावा। 32 आगाधुइकालाइको हाङसा आगाधुइकालाइकोङ आधिनता हिखे। 33 हाइदोनु परमेस्वर आवाइपाका परमेस्वर माको, सुबिस्ताको परमेस्वर हि। परमेस्वरको द्याङगेलाइको गोताङ मन्डलिता हिका चलनआन्सार, 34 मन्डलिता जोम्लाउ बेबालाइ सिपापा ह्याको। एम्बालाइ काथाबाथा मापाको। मोसाको नियमता दोअ्काभाइपाङ एम्बालाइ आधिनताङ ह्याको। 35 एदि एम्बालाइ हाइदोङ धिरलि भोखे पानु सिता हानेतेङ ताइको केअ्हेङ दोङ हिअ्ताको। हाइदोनु मन्डलिता जोम्लाउ बेबालाइ धुइलि लेदेरको काथा एइ। 36 हाइ परमेस्वरको बचन नेलाइसो सुरु जेङका? हाइ नेलाइकोता खिनिङ इदोइ परमेस्वरको बचन लोका एइ? 37 एदि नेलाइता हासुङ ताइमिङहेङ आगाधुइका माकोनु पुनित हाङसाको पिका बर हि दोअ्तेङ फोमपाखे पानु, काङको लेखेका इदोइ काथागेलाइ प्रभुको हुकुम दोङ एइ दोअ्का इङको ग्याको। 38 कालाउ एदि इङको काङको लेखेका काथाहेङ खान्धुर मापाहि पानु इङकोको काथाहेङ बुङ खान्धुर मापासु। 39 इदोइखातिर दादाओने बाइओनेगेलाइ, आगाधुइ धुइलि बाराका लाल्सा पासु रो भेनेङ राउ धुइकालाइहेङ बुङ धुइलि मारोकेसु। 40 कालाउ गोताङ काथा रेम्फा मिलिपातेङ पासु। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.